Grqamol.am » Գրքամոլ Ակումբ » Գրքամոլ Ակումբ. Բաց քննարկում. Ռիչարդ Բախ «Ջոնաթան Լիվինգսթոն անունով ճայը»

Գրքամոլ Ակումբ. Բաց քննարկում. Ռիչարդ Բախ «Ջոնաթան Լիվինգսթոն անունով ճայը»

«Գրքամոլ ակումբի» նախաձեռնությամբ՝ հոկտեմբերի 23-ին Ավ.Իսահակյանի անվան գրադարանում տեղի ունեցավ երկար սպասված բաց քննարկումը:  Ինչպես նախօրոք նշվել էր, ուշադրության կենտրոնում այս անգամ ամերիկացի ժամանակակից գրող Ռիչարդ Բախի «Ջոնաթան Լիվինգսթոն անունով ճայը» վիպակն էր: Հանդիպմանը ներկա էին Գրքամոլ ակումբի երկու խմբերի անդամներն ու շատ այլ ընթերցասերներ: Մինչ բուն քննարկմանն անցնելը, մասնակիցներից ոմանք ներկայացրին գրքի ստեղծման պատմությունն ու դրա անցած ճանապարհը, հետաքրքիր փաստեր գրողի կյանքից և ստեղծագործության մասին: Գրքի մասին հնչեցին ամենատարբեր կարծիքներ, սակայն մեծամասնության համար ստեղծագործությունը մեծ բացահայտում էր, որը կարող էր իրենց համար կյանքի ուղենիշ լինել, ինչպես նաև օգնել յուրաքանչյուրիս ազատ արձակել իր մեջ բնակվող Ջոնաթան Լիվինգսթոն ճային և հասնել կատարյալ ազատության: Որոշ համեմատություններ արվեցին այս գրքի և Ֆրիդրիխ Նիցշեի «Այսպես խոսեց զրադաշտ»-ի միջև: Կային ընթերցողներ, ովքեր ստեղծագործության գլխավոր հերոսին, նրա կյանքն ու անցած ճանապարհը համեմատեցին Քրիստոսի երկրային կյանքի և համբարձման հետ:

Խոսվեց գրքում տեղ գտած ազատության, կյանքում սեփական ճանապարհն ու ազատության սեփական ձևը գտնելու մասին: Գերագույն նպատակ ունենալու, դրան պայքարի միջոցով հասնելու, անհատականություն մնալու, սեփական ես-ը գտնելու և չկորցնելու, ուրիշներին չնմանվելու ու նրանց ճանապարհը կուրորեն չկրկնելու մասին: Հատուկ ուշադրություն դարձվեց նաև գրքում տեղ գտած գլխավոր գաղափարներից մեկին՝ «Փշրեք ձեր մտքի կապանքները և դուք կփշրեք նաև ձեր մարմնի կապանքները»:

Քննարկման վերջում ներկաները բաժանվեցին երեք խմբերի, և յուրաքանչյուր խումբ ներկայացրեց գրքի երեք գլուխներից յուրաքանչյուրի գլխավոր գաղափարը:

Հյուրերը տպավորված էին ակումբի մասնակիցների պատրաստվածությամբ: Ավագ սերնդի կողմից անգամ կարծիք հնչեց, որ իրենք հույս չունեին, թե երիտասարդ սերունդը կարող է նման կայացած մտածողություն ունենալ և լինել այսքան լավ ընթերցող: Հանդիպման ամենավերջում տեղի ունեցավ Գրքամոլ ակումբի առաջին եւ երկրորդ խմբերի ծանոթությունը, որն անցավ չափազանց ջերմ մթնոլորտում:

Հ.Գ. Հանդիպման բոլոր նկարներն՝ այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: