Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում տասնչորս. Անտոն Չեխով «Պատմվածքներ»

Գրքամոլ Ակումբ. Խումբ Երկրորդ. Քննարկում տասնչորս. Անտոն Չեխով «Պատմվածքներ»

«Մարդու մեջ ամեն ինչ պետք է գեղեցիկ լինի՝ և՛ դեմքը, և՛ հագուստը, և՛ հոգին, և մտքերը»,-սրանք ռուս հայտնի գրող Անտոն Չեխովի խոսքերն են, ով իր պատմվածքներից մի քանիսի շուրջ  Ավ. Իսահակյանի անվան գրադարանի հարկի տակ ապրիլի 30-ին «հավաքել էր» «Գրքամոլ» ակումբի երկրորդ խմբի անդամներին: Վերջիններս հանդիպմանը եկել էին պատրաստված. նրանց մի մասը  տեսանյութի միջոցով ներկայացրեց գրողի անձնական կյանքը` կրոնական-պահպանողական ավանդներին հավատարիմ ընտանիքի պատմությունից մինչև իր իսկ կողմից կանխատեսված մահ, իսկ մյուս մասն անդրադարձավ նրա ստեղծագործական կյանքին և գրողի մասին արտասովոր փաստերին:

Գրքամոլցիները խոսեցին մասնագիտությամբ բժիշկ Չեխովից, ով սկզբնական շրջանում  հանդես է եկել «Անտոշա Չեխոնտե», «Մարդ առանց փայծաղի», «Եղբորս եղբայրը» գրական կեղծանուններով, քննարկեցին նրա երեք պատմվածքները` «Անվանակոչություն», «Հիվանդասենյակ  №6» և «Ձորակում»: Ակումբի անդամներն այն կարծիքին էին, որ իրական կյանքի արտացոլման միտումը կարմիր թելի պես անցնում է  Չեխովի պատմվածքներով և նրա հերոսները`  «պատյանի» մեջ փակված, կրթված ու անտարբեր կերպարից մինչև ժողովրդի ծոցից ելած մոռացված ու տանջված մարդ, ունեն նմանատիպ խնդիրներ, հաճախ միևնույն արատավոր երևույթների տուժածներ են: Պատահական չէ, որ Չեխովը մի առիթով ասել է. «Ինձ հաճախ են հանդիմանում, թե գրում եմ մանրուքների մասին, թե ես չունեմ դրական հերոսներ՝ հեղափոխականներ:  Իսկ որտե՞ղ են դրանք: Ես ուրիշ բան եմ ուզում. ես ուզում եմ մարդկանց ասել ՝ նայե՛ք ձեզ և տեսե՛ք, թե ինչ վատ ու ձանձրալի եք ապրում: Կարևորն այն է, որ մարդիկ հասկանան սա, իսկ երբ հասկանան, անպայման կստեղծեն մեկ այլ, լավագույն կյանք»:

Ակումբի անդամները հատուկ անդրադարձ կատարեցին նաև  1890-ին գրողի` Սախալին կատարած ուղևորությանը և դրա արդյունքում ստեղծված «Սախալին կղզին» գործին,  որը հետագայում դարձավ դարի գեղարվեստական փաստաթուղթ, խոսեցին նաև Չեխովի դրամատուրգ տեսակից` շեշտելով վերջինիս այն համոզմունքը, թե բեմում ամեն բան պետք է նույնքան պարզ լինի, որքան կյանքում:

Այսպիսով` գրքամոլցիները հերթական քննարկումը կարելի է համարել ստացված, իսկ այժմ արդեն նրանք պատրաստվում են իրենց հաջորդ հանդիպմանը, որի ընթացքում անդրադառնալու են Ալեքսանդր Պուշկինի «Եվգենի Օնեգին» չափածո վեպին:

Հանդիպման բոլոր նկարներն այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: