Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում տաս. Հովիկ Չարխչյան «Մինչև աշխարհի ծայրը»

Գրքամոլ Ակումբ. Խումբ Երկրորդ. Քննարկում տաս. Հովիկ Չարխչյան «Մինչև աշխարհի ծայրը»

Մարտի 5-ին «Գրքամոլ» ակումբի երկրորդ խմբի անդամները միավորվել էին մինչև աշխարհի ծայրը հասնելու գաղափարի շուրջ: Գրող Հովիկ Չարխչյանի վիպակը նրանցից ոմանց ընձեռել էր յուրահատուկ ճամփորդության հնարավորություն: «Մինչև աշխարհի ծայրի» (2014թ.)  հերոսների հետ գրքամոլցիներն էլ փորձել էին ամեն մեկն իր համար պարզել՝ որն է այդ աշխարհի ծայրը և արդյոք արժե այնտեղ հասնել: Ոչ ֆիզիկական այդ «տարածության» ճանապարհին նրանց համար գրողը ստեղծվել էր խորհելու տարբեր առիթներ: Իսկ հավաքվածների համար հանդիպումն առանձնահատուկ էր նաև նրանով, որ հեղինակն ինքը ներկա էր այնտեղ, և ակումբի անդամները նրա հետ մտքերով փոխանակվելու, բանավիճելու բացառիկ հնարավորություն ունեին:

Ներկաներից ոմանք ներկայացրեցին մինչև աշխարհի ծայրը հասնելու կամ-չհասնելու իրենց պատճառաբանությունները, իսկ ոմանք պատկերացրեցին՝ ինչ կարող էր լինել, եթե վիպակի հերոսներն իսկապես գնային մինչև պայմանական այդ տարածք: Հեղինակը, պատասխանելով հավաքվածների հարցերին՝ նշեց, որ վիպակի գաղափարն իր մտքում «եփվել է» երկար տարիներ և թղթին հանձնվել ու հրատարակվել է երկու տարի առաջ միայն: Նա ներկաների հետ խոսեց իր հերոսների առաքելության մասին,  կիսվեց նրանց մտահոգություններով, վերջիններիս հուզող հարցերով, իսկ ակումբի անդամներից ամեն մեկը փորձեց իր համար գտնել դրանց պատասխանները: Ընդհանուր առմամբ՝ հանդիպումը կարելի է համարել արդյունավետ՝  վիպակի համար հիմնաքարային երևույթների էությանը ծանոթանալու, գրական առողջ բանավեճի կայացման և վերջապես ջերմ մթնոլորտի ապահովման առումով:

Այժմ արդեն գրքամոլցիները պատրաստվում են մարտի 19-ի հանդիպմանը, որի ընթացքում կքննարկվի Ստեֆան Ցվայգի «Շախմատային նովել»-ը:

Հ.Գ. Հանդիպման բոլոր նկարներն այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2016 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: