Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում հինգ. Գաբրիել Գարսիա Մարկես «100 տարվա մենություն»

Գրքամոլ Ակումբ. Խումբ Երկրորդ. Քննարկում հինգ. Գաբրիել Գարսիա Մարկես «100 տարվա մենություն»

Գրքամոլցիներին հերթական անգամ մեկ հարկի տակ հավաքողը եղավ Մարկեսը: Ակումբի երկրորդ խումբը նոյեմբերի 14-ին Ավ. Իսահակյանի անվան գրադարանում տեղի ունեցած հանդիպման ժամանակ քննարկեց լատինաամերիկյան և համաշխարհային գրականության գլուխգործոցներից մեկը` կոլումբիացի գրող Գաբրիել Գարսիա Մարկեսի «Հարյուր տարվա մենություն» վեպը (1967 թ.): Ակումբի անդամները, անդրադառնալով վեպի գործողություններին, որոնք տեղի էին ունենում մտացածին Մակոնդո քաղաքում, դրանք կապեցին Մարկեսի կենսագրական էջերի հետ, իրադարձությունների, որոնք առնչվում են նրա հայրենի Կոլումբիայի, մասնավորապես` Արակատակա քաղաքի հետ, որտեղ նրան դաստիարակել են մայրական կողմից տատն ու պապը:

Գրքամոլցիները խոսեցին վեպի ժանրի` մոգական ռեալիզմի մասին, ըստ որի, մոգական տարրերը սովորական, ռեալիստիկ միջավայրի բնական մաս են կազմում: Նրանք քննարկեցին վեպում ֆանտազիայի և իրականության միախառնումի, ամբողջ մայրցամաքի կյանքի ու կոնֆլիկտների արտացոլման հարցը:

Ակումբի անդամներն առանձնակի անդրադարձան մենության, եւ հատկապես` Բուենդիաների ընտանիքի հարյուր տարվա մենության, այդ բնածին անեծքի թեմային: Մոռացության և մշտական ողբերգական իրադարձությունների մթնոլորտում գտնվող Մակոնդոն, որը աշխարհից ամեն առումով կտրված տարածք էր, հավաքվածներից շատերն ասոցացրին իրենց իսկ բնակավայրերի հետ:

Գրքամոլցիները քննարկեցին նա7 վեպում հումորի, ինչ-որ տեղ նաև՝ ցինիզմի առկայության հարցը՝ նկատելով, որ հաճախ դժվար է լինում զատել ծիծաղելիի 7 ողբերգականի սահմանագիծը:

Այսպիսով` հերթական տպավորիչ «ճանապարհորդությունից» հետո ակումբի անդամները պատրաստվում են նոյեմբերի 28-ին կայանալիք հանդիպմանը, որի ընթացքում կքննարկվի Արշակ Գյումրյանի «Գնչուհին» վեպը:

Հ.Գ. Հանդիպման բոլոր նկարներն՝ այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: