Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում ինը. Ագաթա Քրիստի «Սպանություն Գոլֆի Դաշտում»

Գրքամոլ Ակումբ. Խումբ Երկրորդ. Քննարկում ինը. Ագաթա Քրիստի «Սպանություն Գոլֆի Դաշտում»

Առաջին գրողը, որն իր շուրջ փետրվարի 20-ին  հավաքել էր դեպի երկրորդ մակարդակ տանող ուղին հաղթահարած «Գրքամոլ» ակումբի  երկրորդ խմբին, դետեկտիվի թագուհին էր` անգլիացի հեղինակ Ագաթա Քրիստին: Հավաքվածներից շատերի համար նախևառաջ նորություն էր ժանրը, որն արտացոլում է առեղծվածային իրադարձությունների բացահայտման պրոցեսը:  Քրիստիի 3-րդ  դետեկտիվ վեպը` «Սպանություն գոլֆի դաշտում» (1923 թ.) ստեղծագործությունը, ոմանց համար հող նախապատրաստեց ժանրի առանձնահատկություններին ծանոթանալու և դրա յուրահատկություններն ընկալելու համար: Ներկաներից ոմանք նշեցին, որ իրենք  սպանության մեղավորին և դրա հետ կապված հանգամանքները բացահայտելու համար «մտքի ճամփորդություն» են ունեցել վեպի առանցքային կերպարներից մեկի` հետախույզ Էրքյուլ Պուարոյի հետ, իսկ ոմանք էլ խոստովանեցին, որ վեպը կարդացել են մարդասպանի դիտանկյունից: Թե ով էր ճիշտ դուրս եկել մարդասպանի ինքնության վերաբերյալ իր վարկածներում, թերևս այնքան էլ կարևոր չէր. էականն այն էր, որ ինչպես Պուարոն էր ասում, բոլորն էլ, ի վերջո, «շարժել էին իրենց ուղեղի գորշ բջիջները»:

Նշենք, որ երկրորդ մակարդակի քննարկումը նախորդ քննարկումներից տարբերվում էր իր ֆորմատով: Նոր մակարդակում ներկաները, որոնք նախապես բաժանվել էին 3 խմբի, ներկայացրեցին  իրենց հեղինակած տեսանյութերը, կարդացին իրենց կողմից առանձնացված մեջբերումներն ու հեղինակի, ստեղծագործության վերաբերյալ հայտնի ու անհայտ փաստերը, հետաքրքիր մանրամասները: Այս ձևաչափը նոր շունչ և ռիթմ հաղորդեց քննարկմանը:

Գրքամոլցիները սպասում են մարտի 5-ին կայանալիք իրենց հերթական հանդիպմանը, որի ընթացքում հեղինակի ներկայությամբ կքննարկվի Հովիկ Չարխչյանի «Մինչև աշխարհի ծայրը» վիպակը:

 Հ.Գ. Հանդիպման բոլոր նկարներն՝ այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: