Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում տասնվեց. Ֆրենսիս Սքոթ Ֆիցջերալդ «Մեծն Գեթսբի»

Գրքամոլ Ակումբ. Խումբ Երկրորդ. Քննարկում տասնվեց. Ֆրենսիս Սքոթ Ֆիցջերալդ «Մեծն Գեթսբի»

«Գրքամոլ» ակումբի երկրորդ խմբի անդամները հունիսի 18-ի` իրենց հերթական  հանդիպման ընթացքում քննարկեցին ամերիկացի գրող Ֆրենսիս Սքոթ Ֆիցջերալդի «Մեծն Գեթսբի» սիրավեպը (1925թ.), որը 20-րդ դարում անգլերեն լավագույն 100 գրքերի ցուցակում զբաղեցրել է երկրորդ տեղը: Ամերիկյան գրականության մեջ «Ջազի դարին» բնորոշ ստեղծագործություններից մեկը (Ժամանակաշրջանի անվանումը  դրվել է հենց Ֆիցջերալդի կողմից: Այն ընդգրկում է Առաջին աշխարհամարտի ավարտից մինչև 1930-ականների Մեծ ճգնաժամի տարիները) պատմում է  չբացահայտված անցյալով հայտնի մեծահարուստ Գեթսբիի և նրա շուրջ ծավալվող իրադարձությունների մասին: Ակումբի անդամները նախ անդրադարձան Ջեյ-Դեյզի-Թոմ սիրային եռանկյունուն, Գեթսբիի արտասովոր, խորհրդավոր կերպարին և տարիներ շարունակ փայփայած երազանքին: Գրքամոլցիները  խոսեցին նաև այն շքեղ միջավայրի մասին, որի մեջ ապրում էր Գեթսբին և միևույն ժամանակ` նրա  անմխիթար, անփառունակ վախճանի  մասին` միայնության մեջ: Առանձին անդրադարձ կատարվեց ստեղծագործության գեղարվեստական ձևին, այն հետաքրքիր, գրավիչ ֆորմային, որն ընտրել էր Ֆիցջերալդը` իր վեպը մատուցելու համար:

Հանդիպման երկրորդ հատվածում  ակումբի անդամները դիտեցին «Մեծն Գեթսբի»-ի էկրանավորումը`ռեժիսոր Բազ Լուրմանի համանուն ֆիլմը: Նրանք հայտնեցին իրենց տեսակետները այն  մասին, թե որքանով էր կարողացել ռեժիսորը փոխանցել վեպի ասելիքը, և որքանով էր դերասաններին հաջողվել մարմնավորել վեպի հերոսներին: Գրքամոլցիների մի մասը նախապատվությունը տվեց վեպին, իսկ մյուսը մասի համոզմամբ` ֆիլմը Ֆիցջերալդի ասելիքը փոխանցել է շատ ավելի վառ, ազդեցիկ և գունեղ երանգներով:

Այսպիսով` ակումբի անդամների հերթական հանդիպումը, միանշանակ, ստացված էր: Հիմա արդեն նրանք պատրաստվում են հուլիսի 2-ի` իրենց հաջորդ քննարկմանը, որի ընթացքում կանդրադառնան Ջեյն Օսթինի «Հպարտություն և նախապաշարմունք» ստեղծագործությանը:

Հանդիպման բոլոր նկարներն՝ այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2016 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: