Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում ութ. Լև Տոլստոյ «Աննա Կարենինա»

Գրքամոլ Ակումբ. Խումբ Երկրորդ. Քննարկում ութ. Լև Տոլստոյ «Աննա Կարենինա»

Գրքամոլ ակումբի երկրորդ խմբի անդամները փոքրիկ դադարից հետո՝ հունվարի 23-ին կրկին իրենց մտքերով փոխանակվելու և զգացողություններով կիսվելու առիթ ունեցան: Այս անգամ նրանք իրենց պրիզմայով անցկացրին ռուս դասականներից մեկի` Լև Տոլստոյի «Աննա Կարենինա» հայտնի վեպը: Ստեղծագործությունը, սակայն, գրքամոլցիները չդիտարկեցին զուտ որպես ամուսնացած կնոջ և սպա Վռոնսկու ողբերգական սիրո պատմություն. նրանք փորձեցին թափանցել այն աշխարհ, ուր ուղեկցում է հեղինակը` բացահայտելու կին տեսակին` իր հույզերով, մտքերով, տագնապներով ու վախերով: Խմբի անդամներից ոմանք ընկալեցին Կարենինայի քայլերը, արդարացրեցին նրա` այս կամ այն իրավիճակում թույլ տված քայլերը, իսկ մյուսները փորձեցին գտնել այլ ելքեր` առաջարկելով անգամ վեպի այլընտրանքային ավարտի տարբերակներ: Ներկաները հետաքրքիր համեմատականներ անցկացրեցին նաև Տոլստոյի և գրքի հերոսներից մեկի` Լևինի միջև` փորձելով նմանություններ գտնել նրանց կենսակերպերի միջև:  

Վեպը, որտեղ պատկերված է  19-րդ դարի երկրորդ կեսի Մոսկվայի ու Սանկտ Պետերբուրգի ազնվականների  շրջանում ստեղծված  միջավայրը, նրանց առօրյան ու այնտեղ տիրող բարքերը, խմբի անդամներին հետաքրքրիր էր նաև մարդ-հասարակություն  հավերժական պայքարի դիտանկյունից: Այս առիթով հնչեցին կարծիքներ այն մասին, որ Կարենինային կործանողը հենց հասարակությունն էր, ոմանք, սակայն, շտապեցին  հանդես գալ հակադարձումներով` պնդելով, որ ինքը Կարենինան էր իր բոլոր խնդիրների պատճառը, քանզի նա չէր կարողանում լինել երջանիկ և վայելել այն ամենը, ինչն ուներ:

Այսպիսով` հանդիպումն անցավ թեժ  մթնոլորտում: Այն խոստացավ շարունակական լինել նաև հաջորդ անգամ, երբ խմբի անդամները կքննարկեն արդեն Ագաթա Քրիստիի «Սպանություն գոլֆի դաշտում» դետեկտիվ վեպը:

Հ.Գ. Հանդիպման բոլոր նկարներն՝ այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: