Grqamol.am » Գրքամոլ Ակումբ » Խումբ Երկրորդ » Գրքամոլ Ակումբ. Խումբ Երկրորդ. Քննարկում տասնութ. Բերնհարդ Շլինկ «Ընթերցողը»

Գրքամոլ Ակումբ. Խումբ Երկրորդ. Քննարկում տասնութ. Բերնհարդ Շլինկ «Ընթերցողը»

«Գրքամոլ» ակումբի երկրորդ խումբը օգոստոսի 27-ին Ավ. Իսահակյանի անվան գրադարանի հարկի ներքո համախմբվել էր գերմանացի իրավաբանական գիտությունների պրոֆեսոր և դատավոր Բերնհարդ Շլինկի հայտնի վեպի` «Ընթերցող»-ի շուրջ (1995թ., Գերմանիա): Գրքում քննարկվում է հետպատերազմյան շրջանի սերնդի խնդիրները Գերմանիայում (Բերթհոլդ Բրեխտն այս սերունդը անվանում է Nachgeborenen՝ նրանք, ովքեր եկան հետո)։ Պատմությունը, որը բաժանված է երեք մասի, մեզ ներկայացվում է գլխավոր հերոսի` Միխայել Բերգի կողմից՝ նրա հիշողությունների տեսքով:
Ներկաներից ոմանք կարծիք հայտնեցին, որ «Ընթերցող»-ը դեռահաս տղայի և հասուն կնոջ սիրավեպի մասին ստեղծագործություն է, իսկ ոմանք էլ ուշադրություն դարձրին Հոլոքոստի թեմային, որը հեղինակը նրբորեն բարձրացնում է վեպում: Գրքամոլցիների մի մասը նկատեց, որ «Ընթերցող»-ի գլխավոր հերոսուհին` Հաննան, Հոլոքոստն իրականացրած գերմանացիների սերնդի ներկայացուցիչ է, ընդ որում` անգրագետ: Ակումբի անդամների համոզմամբ` հեղինակը, հնարավոր է, փորձել է մասնավոր խնդրից ընդհանուր խնդիր անցում կատարել` ակնարկելով, որ գերմանացիները, գուցե, Հոլոքոստը գործել են առանց գիտակցելու, թե ինչ ոճրագործության են դիմում, ճիշտ այնպես, ինչպես Հաննան չէր գիտակցել, որ կործանել էր համակենտրոնացման ճամբարում գտնվող հրեաներին, որոնք, նրա հսկողության ներքո գտնվելով, այրվել էին եկեղեցում: Գրքամոլցիները առանձին անդրադարձ կատարեցին գրքի գլխավոր հերոսին` Միխայելին, որը, լինելով գերմանացիների նոր սերնդի ներկայացուցիչ, շարունակ ապրում էր Հաննայի հանդեպ մեղքի զգացումով: Քննարկման ժամանակ կարծիք հնչեց, որ դա հենց ժամանակակից գերմանացիների մեղքի զգացումն է, որը նրանց հանգիստ չի տալիս` իրենց նախնիների գործած ոճիրի պատճառով, սակայն միեւնույն ժամանակ, այդ մարդիկ շարունակում են սիրել իրենց նախնիներին:
Քննարկումն էլ ավելի հետաքրքրացավ, երբ ակումբի անդամները դիտեցին ռեժիսոր Սթիվեն Դոլդրիի համանուն ֆիլմը` նույն թեմայով: Ամբողջ աշխարհում ճանաչում ձեռք բերած եւ մի շարք նշանավոր մրցանակների արժանացած կինոնկարը տպավորեց ներկաներին իր պատկերայնությամբ, դետալային նկարագրություններով, կտրուկ, խորը եւ անսպասելի անցումներով: Ներկաներից շատերը կարծիք հայտնեցին, որ սա այն եզակի դեպքերից է, երբ ֆիլմը` որպես առանձին գեղարվեստական արժեք, չի զիջում գրքին:
Այսպիսով` գրքամոլցիների հերթական հանդիպումը, միանշանակ, հագեցած էր եւ ստացված:

Հ.Գ. Հանդիպման բոլոր նկարներն այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: