Grqamol.am » Գրքամոլ Ակումբ » Խումբ Երրորդ » Գրքամոլ Ակումբ. Խումբ Երրորդ. Քննարկում Տասնմեկ. Հրանտ Մաթևոսյան «Աշնան Արև»

Գրքամոլ Ակումբ. Խումբ Երրորդ. Քննարկում Տասնմեկ. Հրանտ Մաթևոսյան «Աշնան Արև»

Մարտի 18-ին Ավ. Իսահակյանի գրադարանը նորից լեցուն էր գրքամոլցիներով։ Այս անգամ հավաքվելու առիթը Հ. Մաթևոսյանն էր, քննարկման թիրախը՝ «Աշնան արև» ստեղծագործությունը։ Քննարկումը, ինչպես միշտ, անցավ ջերմ և հաճելի մթնոլորտում, միևնույն ժամանակ՝ լեցուն ամենատարբեր կարծիքներով, իսկ արդյունքը մեկն էր՝ հեղինակի կյանքի և ստեղծագործության համալիր վերլուծությունն ու ընկալումը։ Առաջին փուլում գեղեցիկ տեսահոլովակների միջոցով, որոնք պատրաստել էին «Գրքամոլ» 3-րդ ակումբի անդամները, ներկայացվեցին գրողի կյանքը, ստեղծագործությունը, հետաքրքիր փաստեր վերջինիս կյանքից, ինչի հիմժման վրա էլ ստեղծվեց այն կոլորիտը, որը ակումբականներին տարավ ոչ վաղ անցյալ՝ ըմբոշխնելու հեղինակի գործերը։ Դրանից հետո սկսվեց ստեղծագործության բուն քննարկումը։ Հենց կարդացողները փաստեցին, որ Մաթևոսյանին հասկանալու համար պետք է նրան ուսումնասիրել ամբողջովին, քանի որ Մաթևոսյանը մեկ ստեղծագործություն չէ, նա ամբողջանում է իր բոլոր ստեղծագործությունների համախմբության մեջ։ Ինչևիցէ, ոմանք գտել էին իրենց ստեղծագործության մեջ, ոմանք՝ ոչ, բայց բոլորն էլ փաստեցին, որ հեղինակը կարողացել է ստեղծել հայկական գյուղական կյանքի կատարյալ կոլորիտ՝ ներառելով այնտեղ այնպիսի ուժեղ կնոջ կերպար, ինչպիսին էր Աղունը, և այլ տիպիկ կերպարներ, ինչպիսիք էին Սիմոնը, Արմենակը, Արուսը, Սերոն և այլք։ Ոմանց կարծիքով հեղինակն ուներ սոցիալական խնդիր՝ տվյալ ժամանակաշրջանում ներկայացնելու հայ ժողովրդի վիճակը և նպատակ՝ վեր հանելու բարքերի ու սովորույթների երբեմնի կործանարար ազդեցությունը, ոմանք էլ գտնում էին, որ, այո՛, միգուցե հեղինակը տեղայնացրել է ստեղծագործությունը, սակայն դրանով հանդերձ այն տարածել է նաև վերազգային սահմաններում՝ ցույց տալով անհատի հոգեվիճակը, էությունն ու կյանքի անձնական դրաման։ Բոլոր կարծիքները հատվեցին այն յուրահատուկ, ուրույն ոճում, որով հեղինակը կառուցել է իր ստեղծագործությունը։ Այս անգամվա հանդիպումը մի փոքր այլ էր, այն այնքան հագեցած էր տարբեր կարծիքներով, որ գրքամոլցիները հենց տեղում որոշեցին շարունակել հեղինակի բացահայտումը մեկ ուրիշ գործում և միասին ընթերցեցին հեղինակի «Կանաչ դաշտ» ստեղծագործությունը, որը բացահայտեց մեկ այլ Մաթևոսյանի, և ինչի արդյունքում ակումբի բոլոր անդամները փաստում էին՝ շարունակելու են բացահայտել և ուսումնասիրել գրողին։

Այսքանով ավարտվեց հանդիպումը՝ նոր հանդիպման սպասումով, որի ժամանակ կքննարկվեն ավստրիացի գրող Ստեֆան Ցվայգի նովելները:

Հանդիպման բոլոր նկարներն՝ այստեղ:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: