Grqamol.am » Մեջբերումներ Գրքերից » Ջեյն Օսթին «Հպարտություն և նախապաշարմունք» (Գրքամոլ Ակումբ)

Ջեյն Օսթին «Հպարտություն և նախապաշարմունք» (Գրքամոլ Ակումբ)

«Հպարտություն և նախապաշարմունք» գիրքը դասվել է «Գրքամոլ Ակումբի» քննարկվելիք գրքերի շարքին, և մեր ակումբի կողմից ստորև ներկայացնում ենք՝

1. Հեղինակի և իր աշխատության մասին ներկայացրած հետաքրքիր փաստեր:

2. Նկարագրված են հերոսների անհատական կերպարները:

3. Ակումբի անդամների կողմից գրքից առանձնացրած բոլոր մեջբերումները:

1. Հետաքրքրիր փաստեր

1. Անգլիացի նշանավոր կին գրող, ընտանեկան «կանացի» վեպի հիմնադիր Ջեյն Օսթինը ծնվել է 1775թ. դեկտեմբերի 16-ին: Ընտանիքում, բացի նրանից, 7 երեխա կար: Նա շատ վաղ տարիքում է սկսել գրել: Իր համեմատաբար կարճատև կյանքի ընթացքում Օսթինը գրել է վեց վեպ, որոնք աչքի են ընկնում իրենց նրբաճաշակ «անգլիական հումորով», գործող անձանց կերպարների ռեալիստական կատարյալ նկարագրությամբ, հոգեբանական ապրումների փոխանցմամբ:
Դրանցից ամենահայտնին «Հպարտություն և նախապաշարմունք» վեպն է: Կենդանության օրոք գրական գործունեությունը Ջեյն Օսթինին փառք չբերեց, որովհետև նա իր բոլոր ստեղծագործությունները տպագրում էր գրական կեղծանունով: Նրա համար միշտ առաջնային տեղում ընտանիքն է եղել՝ ծնողներն ու քույրերը, և նա այդպես էլ չի ամուսնացել:
Մահացել է 1817 թ. հուլիսի 18-ին: Կյանքում ունեցել է երկու անչափ կարևոր շրջան՝

1. 1795—1798թթ. Սկսել է գրել առաջին վեպերը:
2. Գրվել են այնիպիսի հայտնի վեպեր, ինչպիսիք են «Հպարտություն և նախապաշարմունք», «Զգացում եւ զգացմունքայնություն»:

«Հպարտություն և նախապաշարմունք»

Ջեյն Օսթինը սկսել է աշխատել վեպի շուրջ, երբ դեռ ընդամենը քսանմեկ տարեկան էր: Սակայն բնագիրը հրաժարվել են տպագրել, և գիրքը մնացել է անտպագիր ավելի քան տասնհինգ տարի: Բայց, երբ Ջեյնը հաջողության է հասնում իր «Զգացում եւ զգացմունքայնություն» գրքով (1811թ.), տպագրում է «Հպարտություն և նախապաշարմունք»՝ արդեն կատարելագործված տարբերակով:
Գիրքն առաջին անգամ էկրանավորվել է 1940թ.՝ ԱՄՆ-ում, սև-սպիտակ տարբերակով: Բայց ամենահաջողակ էկրանավորում համարվում է 2005թ.-ին դուրս եկած տարբերակը:
2009թ. տպագրվել է Սետ Գրեմ-Սմիթի «Հպարտություն և նախապաշարմունք ու զոմբի», որտեղ հեղինակը համադրում է Օսթինի ստեղծագործությունը ֆանտաստիկ ժանրի հետ:
Գիրքը զբաղեցնում է 2-րդ տեղը BBC-ի կողմից ընտրված լավագույն երկու հարյուր գրքերից:

Այս գրքում պատմվում է, թե ինչպես անգլիացի հարուստ հողատեր Դարսին հմայվում է մանր ազնվականի դուստր էլիզաբեթի աշխույժ մտքով և արժանավայել պահվածքով: Թվում է՝ երիտասարդի հասարակական դիրքից ու ազգակցական կապերից բխող հպարտությունը և նրա մասին տեղի հասարակության բացասական կարծիքից առաջացած՝ աղջկա նախապաշարմունքը բացառում են, որ իրականանա էլիզաբեթի մոր թերևս միակ երազանքը՝ ամուսնացած տեսնել իր հինգ դուստրերին…Ջեյն Օսթինի այս ստեղծագործությունը գրավում է հետաքրքրական ու խոսուն կերպարներով, որոնք իրենց ժամանակի ծնունդը լինելով՝ արդիական են բոլոր ժամանակների համար:

2. Ջեյն Օսթին՝ «անգլիական գրականության առաջին լեդի»: Այս կոչմանը նա արժանացավ, երբ առաջինը անգլիական գրականության մեջ ներմուծեց «առօրեականությունը»: Օսթինը գրում էր այն ամենի մասին, ինչ կատարվում էր իր կյանքում և իր շրջապատում, գրում պարզ, առանց չափազանցությունների և անկեղծ: Նա կարդում էր անդադար, վայելում էր բացառիկ ինտելեկտուալ կնոջ համբավ և նրա ստեղծագործությունները վայելում էին մեծ մասսայականություն: Որոշ ժամանակ նա հանդես էր գալիս կեղծանուններով, և բավականին երկար ժամանակ պահանջվեց նրանից՝ հրապարակելու իր անունը:
Ջեյն Օսթինը ծնվել է 1775թ. դեկտեմբերի 16-ին, Անգլիայում: Նրա ամենահայտնի ստեղծագործություններն են «Բանականություն և փաստարկներ», «Էմմա», «Մենսֆիլդպարկ», «Հպարտություն և նախապաշարմունք», «Զգացում և զգացմունքայնություն», «3 քույրեր»:
Օսթինը սովորել է Օքսվորդում: Նրա գրական գործունեության վրա մեծ ազդեցություն են թողել Ֆրանսիական հեղափոխությունն ու Հարավային Ամերիկայի անկախացման պատերազմը: Նրա ստեղծագործությունների ու կյանքի ամենաբնորոշ գիծը «զսպվածությունն» է, որն արտահայտվեց կյանքի բոլոր դրսևորումներում: Ջեյնը խուսափում էր մարդաշատ վայրերից , անծանոթների հետ խոսելուց և ուներ միայն մեկ լավագույն ընկեր՝ Կասանդրա Էլիզաբեթը, ով Ջեյնի մորաքրոջ աղջիկն էր: Օսթինի անձնական կյանքի մասին քիչ բան է հայտնի՝ Ջեյնը չի ամուսնացել և գաղտնի է պահել սիրելի տղամարդու անունը: Նա այրել է իր բոլոր օրագրերն ու նրանից մնացել են միայն այն նամակները, որոնք նա ուղարկել է: Ջեյն Օսթինը մահացել է 1817 թ. հուլիս 7-ին:
Մեզ են հասել մի քանի նամակներ, որոնց հասցեատերերն անհայտ են:
« 1795թ.
Իմ հորեղբայրը դառնում է ավելի խիստ, իսկ հորաքույրս ավելի ժլատ,իսկ ես ամեն օր Ձեզ սիրում եմ ավելի շատ: Եթե ամենինչ շարունակվի այսպես, ի՞նչ կլինի մեզ հետ մինչև տարեվերջ: Ես շատ երջանիկ էի, երբ առավոտյան ստացա Ձեր նամակը»:
«1795թ. հունվարի 7
Երկար ժամանակ է անցել այն պահից, երբ ես որոշեցի գրել Ձեզ, և պետք է ասեմ միայն մեկ բան. «Ես առաջին անգամ կարծես կորցրեցի իմ տեսողությունը, երբ տեսա Ձեզ: Ձեր սերն այնքան աստվածային է: Դուք երբևԷ լսե՞լ եք նման բան: Սակայն ես անկեղծ եմ և իսկապես հավատում եմ այն ամենին, ինչ գրում եմ Ձեզ: Ես այնքան եմ սիրում Ձեզ, որ պատրաստ եմ արտասվելու մի քանի ժամ: Եվ ուզում եմ փառաբանել սերն այն, որ զգում եմ Ձեր հանդեպ: Ճշմարտությունը հանգեցնում է մելամաղձության, սակայն այդպիսին է նա և իմ սերը, և ես ոչինչ անել չեմ կարող: Եվ որքան ազնվություն է դեռ անհրաժեշտ սիրելու Ձեզ»:
Ջեյն Օսթինին ուղղված այս նամակը հայտնաբերվել է վերջերս: Հեղինակն անհայտ է: Սակայն գրականագետները պնդում են,որ հենց այս նամակն է հետագայում տեղ գտել նրա՝ «Զգացում և զգացմունքայնություն» ստեղծագործության մեջ:

4. «Հպարտություն և նախապաշարմունք» գրքից վաճառվել է ավելի քան 20 միլիոն օրինակ ամբողջ աշխարհում:

5. Դեռևս այսօր շատ հարսանիքներ Անգլիայում ոգեշնչված և ձևավորված են գրքի մոտիվներով:

6. Ջեյն Օսթինի մասին կարծիքները շատ տարբեր են. ոմանք նշում են, որ նա Անգլիայի կին վիպագիրների գլխավորն է, իսկ, օրինակ, Շառլոտե Բրոնտեն (հեղինակ «Ջեյն Էյրի» և այլ աշխարհահռչակ գրքերի) նրան նույնիսկ ատում էր:

7. «Ջեյն Օսթին» ամենամյա փառատոնը անցկացվում է շքեղ զբոսաշրջային Բաթ հարավարևելյան քաղաքում, որի պատմությունը կապված է վիպասանուհու անվան հետ: Տոնակատարությանը կարելի է տեսնել 200 տարվա վաղեմության ոճով հագնված հազարավոր մարդկանց: Հագեցած ծրագիրը ներառում է թեմատիկ ճաշկերույթներ, տոնավաճառներ, զբոսանքներ, ներկայացումներ և դասախոսություններ՝ նվիրված Ջեյն Օսթինի ժամանակաշրջանին:

8. 2013թ. լրացել է Ջեյն Օսթինի «Հպարտություն և նախապաշարմունք» վեպի 200-ամյակը: Հոբելյանին նվիրված տոնակատարությունների շրջանակներում Մառախլապատ Ալբիոնի բնակիչներին և հյուրերին հնարավորություն է ընձեռվել ծանոթանալու տվյալ ժամանակաշրջանի զգեստներին և շրջայց կատարելու «վեպի պատմական վայրերով»:

9. Ջեյն Օսթինը վերոհիշյալ ստեղծագործությունը գրել է առաջին ու թերևս միակ սիրո տպավորությունների ներքո: Օսթինի սերը եղել ապագա հաջողակ փաստաբան Թոմաս Լեֆրոյը, ով ևս անչափ սիրել է նրան: Սակայն հանգամանքների բերումով նրանք չեն կարողանում միասին լինել :Ի տարբերություն Լեֆրոյի, ով չնայած իր սիրուն ամուսնանում է ուրիշ կնոջ հետ, Օսթինը հավատարիմ է մնում իր զգացմունքներին: Նա չէր կարող ամուսնանալ առանց սիրելու, իսկ սիրել ուրիշին, առավել անկարող էր:
Լեֆրոյն իր ավագ դստերը Ջեյն է անվանում: Օսթինը կյանքի ընթացքում պատիվ է ունենում հանդիպելու աղջկան:

10. «Հպարտություն և նախապաշարմունք» վեպի բազմաթիվ կերպարներ ու դրվագներ չնչին փոփոխություններով վերցված են հենց Ջեյն Օսթինի կյանքից: Նրանցից են Քոլինզի, Գարդիներների, Լեդի դը Բըրի կերպարները, ինչպես նաև Լիդիայի ու Ուիքեմի փախուստին վերաբերվող որոշ տեսարաններ:

11. 2009թ. լույս է տեսել Հելեն Հոլստեդի 36 գլխից բաղկացած «Հպարտություն և նախապաշարմունք-2» գիրքը: Հեղինակը փորձել է շարունակություն տալ սիրված հերոսների կյանքին: Այստեղ Էլիզաբեթը հայտնվում է մարկիզուհի Ինգլբուրի և նրա շրջապատի ուշադրության ու նախանձի կենտրոնում, ինչն էլ հաճախ խաթարում է նրա և Դարսիի ընտանեկան անդորրը:

13. Գիրքն առաջին անգամ անվանվել  է «Առաջին տպավորություն» և հրատարակվել է 1813թ.-ին:

 

2. Կերպարներ

1. Էլիզաբեթ Բենեթ․ Բենեթների երկրորդ դուստրը կերպար, ով լինելով գրքի գլխավոր հերոսներից մեկը, իր մեջ պարունակում է բացառապես նախապաշարմունքներ։ Որպես այդպիսիք կարելի է ներկայացնել այն դրվագը, երբ Ուիքհեմը՝ չարախոսելով Դարսիի մասին, վերջինիս վերաբերյալ Էլիզաբեթի մեջ առաջացրեց բացասական կարծիքներ և նրա մեջ ստեղծեց նախապաշարմունքներ՝ առ այն, որ Դարսին գոռոզ, դաժան և անգութ հարուստ հողատեր է, ինչը ստեղծեց լարվածութուն Էլիզաբեթի և Դարսիի հարաբերությունների մեջ: Բարեբախտաբար որոշ ժամանակ անց Դարսին իրեն ճիշտ հասկացնել տվեց, և Ուիքհեմի չարախոսությունները չտվեցին իրենց ցանկալի արդյունքը:

 

2. Լիդիա Բենեթ. Բենեթների կրտսեր դուստրը: Տասնվեցամյա աղջկա կերպար, որ գտնվելով մոր ազդեցության ներքո, ժամանակից շուտ էր հայտնվել« հասարակությունում» (տվյալ ժամանակաշրջանում «հասաարակությունում»` հասարակական միջոցառումներում, պարահանդեսներում, առավել հաճախ հանդիպում էին այն օրիորդները, ովքեր պատրաստ Էին ամուսնության): Անհեռատես, սկզբունքներ չունեցող, հաճախ նույնիսկ անլուրջ մի կերպար, ում գլխավոր հոգսը հերթական զինվորականի ուշադրությունը գրավելն է: Նրա միակ նպատակը ամուսնությունն էր և նա ոչ մի միջոց չխնայեց նպատակին հասնելու համար` անտեսելով նույնիսկ արժանապատվությունն ու ամոթը: Նա մտածեց (սիրահարվեց գեղեցկադեմ զինվորական Ուիքեմին), քայլ արեց (փախչեց նրա հետ) ու հաղթեց (ամուսնացավ): Թեև նա իրոք սիրահարվել էր Ուիքեմին, այնուամենայնիվ երկուսի զգացմունքներն էլ հաջորդաբար սառեցին: Բայց դա շատ չէր հուզում Լիդիային: Ի վերջո, լինելով դուստրերից ամենափոքրը ընտանիքում, նա ամուսնացավ առաջինը: Դրանից հետո նա սկսեց պարբերաբար ներկայանալ հասարակության մեջ՝ որպես ամուսնացած լեդի: Իսկ իր և ամուսնու անպատասխանատվությունը չէին խանգարում նորանոր պարտքեր կուտակելուն և միևնույն ժամանակ կյանքը՝ ըստ իրենց, վայելելուն:
Լիդիան ստեղծագործության մեջ ներկայացնում էր նախապաշարմունքները, որոնք ոչնչացնում է սերը: Հասարակության նախապաշարմունքներն առ այն՝ որ լինելով քիչ թե շատ հասուն և ձևավորված աղջիկ, հանուն իր շրջապատի և ծնողների ցուցադրեց՝ որ զինվորականին գրավելը և իրենով անելը ամբողջովին մտնում է իր ուժերի մեջ և որ նա ունի բոլոր տվյալները նույնպես հասարակության մեջ ներկայանալու: Իսկ հպարտության մասին խոսելը Լիդիայի դեպքում ավելորդ է:
Եթե Լիդիային դիտենք որպես Օսթինի ներկայացրած երտասարդ պարմանուհու հինգ դասական տիպերից մեկը, ապա ակնհայտ է դառնում, թե որքան ստացված է կերպարը: Այնուամենայնիվ, ցավալի է, բայց մեր շրջապատում այսօր էլ շատ «Լիդիաներ» կան: Նրանց խնդիրը շպարի ու թանկարժեք արդուզարդի, հագուստի միջոցով «ամենա» լինելն է: Նրանց գերնպատակն է հակառակ սեռի ուշադրությունը գրավելը: «Լիդիաները» ճանաչում են միակ արժանիքը, որ կարևորում են կյանքում` գեղեցկությունը:

3. Տիկին Բենեթ. Բենեթների մայրը

Տիկին Բենեթը, լինելով աղքատ, տգետ, բայց միևնույն ժամանակ հպարտ անձնավորություն, ամբողջ գրքի ընթացքում չի փոխում իր կերպարային տեսակը: Նա շատ մեծ նշանակություն էր տալիս նախապաշարմունքներին, քանի որ լսում և դատում էր մարդկանց ըստ հասարակության կարծքիքի և մարդկանց վերաբերմունքի իր աղջիկների նկտամամբ: Որպես լավ կողմեր կարելի է նշել, որ նա անկեղծ, ազնիվ, ռեալիստ կին էր, իսկ որպես վատ կողմեր այն, որ նա քաղքենի էր, տգետ և տարբերություն էր դնում իր աղջիկների միջև:

4. Լեդի Կետրին դը Բըր: Դարսիի մորաքույրը

Լեդի Կետրինը Ռոզինգսի տիրուհին էր: Բարդ բնավորությամբ մի կին, չափազանց ինքնավստահ, իրեն երևակայում էր ուղղամտության և անկեղծության օրինակ: Բոլորը նրա հետ հաշվի էին նստում, նույնիսկ, երբ չէին կիսում նրա կարծիքը: Նա իր դստեր համար պլանավորել էր փառահեղ ապագա և չէր պատկերացնում, որ կհայտնվի ինչ-որ մեկը, այն էլ գյուղաբնակ մի աղջիկ, որը դրանք կխատարի:

5. Չարլզ Բինգլի: Դարսիի ընկերը. Ջեյնի ամուսինը

Մարդկային հատկանիշներից Բինգլին կենսուրախ, բարի, մարդամոտ երիտասարդ էր, ինչպես նաև աչքի էր ընկնում իր ազնվական պահվածքով: Նա նույնպես հպարտ անձնավորություն էր ինչպես իր ընկեր Դարսին, սակայն նրան իր հպարտ և ազնվական տոհմից լինելը չխանգարեց սիրահարվել շատ ավելի ցածր խավի ընտանիքում մեծացած և դաստիարակություն ստացած աղջնակին՝ Ջեյն Բենեթին: Եվ չնայած իր ընկերոջ՝ Դարսիի միջամտությանը, ով կարողանում էր ընկերոջ վրա իր ազդեցությունը թողնել, նա վերջում ամուսնացավ Ջեյն Բենեթի հետ:

3. Մեջբերումներ

Գրքից բոլոր մեջբերումների դուրսբերումը՝ Համլետ Մուրադյանի

► Մեծ միջոցների տեր երիտասարդը պետք է իր համար կին գտնի:

► Մարդիկ այնքան շատ են փոխվում, որ ամեն անգամ կարող ես նրանց մեջ ինչ-որ նոր բան նկատել:

► – Դու՞ ինչ կասես, Մերի: Ախր դու այնքան դատող աղջիկ ես, շատ գրքեր ես կարդացել, նույնիսկ քաղվածքներ ես դուրս գրում:

► Հպարտությունը շատ տարածված թերություն է: Իմ ամբողջ կարդացածն ինձ համոզել է, որ հպարտությունն իրոք շատ տարածված է, ու մարդն իր բնույթով խիստ հակված է դրան: Մեր մեջ քչերը կան, ովքեր ինքանգոհ չեն ու չեն փայփայում այն միտքը, թե իրենք մյուսներից ավելի լավն են, լինի դա իրական թե մտացածին: Սնափառությունն ու հպարտությունը տարբեր բաներ են, թեև այդ բառերը հաճախ որպես հոմանիշներ են օգտագործվում: Մարդը կարող է հպարտ լինել` զերծ լինելով սնափառությունից: Հպարտությունն այն է, ինչ մենք ենք մեր մասին մտածում, իսկ սնափառությունը` ինչ որ կցանկանայինք` ուրիշները մեր մասին մտածեին:

► Շատ հնարավոր է` լավ բան է, որ կարողանաս քեզ այնքան տիրապետել, որ նման հանգամանքներում զգացմունքներդ չմատնես, բայց ախր այդքան զսպված լինելուց ևս օգուտ չկա: Եթե կինն իր համակրանքը թաքցնում է նրանից, ում դա վերաբերում է, կարող է նրան իր մոտ պահելու հարմար պահը կորցնել: Եվ արդեն նրան դժվար թե մխիթարի այն միտքը, որ կարողացել է իր զգացմունքները թաքցնել: Երբ մարդ նվիրված է ինչ-որ մեկին, դրանում այնքան երախտագիտություն կամ սնափառություն կա, որ դրանից հրաժարվելն ամենևին էլ անվտանգ չէ: Մենք բոլորս էլ կարող ենք ազատորեն փոքր-ինչ նախապատվություն տալ որևէ մեկին, դա բնական է, բայց մեզնից քչերը բավականաչափ քաջություն կունենան իրոք սիրահարվել առանց որևէ ակնկալիքի: Տասից իննի դեպքում կինը լավ կանի ցույց տա, թե ավելի շատ է սիրահարված, քան իրականում կա:-Շառլոթ Լուկաս

► Ամուսնական կյանքում հաջողակ լինելը միանգամայն պատահական բան է: Եթե նույնիսկ ամուսինները շատ լավ գիտեն միմյանց հակումները, եթե անգամ դրանք լիովին համապատասխանում են, դա չի երաշխավորում, թե իրար հետ երջանիկ կլինեն: Միշտ էլ մեջտեղ կգան ու կկուտակվեն բավական շատ տարաձայնություններ, որոնք նրանց համար կյանքը անախորժ կդարձնեն: Այդ դեպքում ավելի լավ չէ՞` հնարավորինս քիչ իմանալ թերությունների մասին մի մարդու, ում հետ կյանքդ կապում ես:-Շառլոթ Լուկաս

► Որքան հեռուն է գնում կանանց երևակայությունը: Այն մի ակնթարթում հիացմունքից հասնում է սիրուն, սիրուց՝ պսակադրությանը:-Դարսի

► Հեռավորությունը չնչին բան է երբ այն հաղթահարելու պատճառ ունես:

► Չկա ավելի մոլորեցնող բան, քան կեղծ համեստությունը: Հաճախ դա պարզապես մարդկանց մտքերը հաշվի չառնելն է, իսկ որոշ դեպքերում` սքողված պարծենկոտությունը:

► Կարևոր է, որ հատկապես նրանք, ովքեր իրենց կարծիքը երբևէ չեն փոխում, ամենասկզբից ճիշտ դատեն:-Էլիզաբեթ

► Ես ու դու մի մեծ տարբերություն ունենք` գովասանքը քեզ միշտ անակնկալի է բերում, իսկ ինձ` երբեք:

► Սարքովի անկեղծությունը բավական տարածված է…համարյա ամենուրեք:

► Ապուրից վառվողը մածունի վրա էլ է փչում:-Շառլոթ Լուկաս

► Ամեն զգացմունք պետք է մտքով ղեկավարվի: Ու ես կարծում եմ` երբ ուզում ես մի բան անել, պետք է դրան համապատասխան էլ  հնարավորություն ունենաս:

► Էլիզա Բենեթը մեկն է այն երիտասարդ լեդիներից, ովքեր հակառակ սեռին ներկայանում են սեփականը ստորադասելով, և շատ տղամարդկանց վրա, համարձակվում եմ ասել, դա տպավորություն է գործում: Իմ կարծիքով` դա ողորմելի հնարք է, սակայն լավ է ներգործում:
– Անկասկած, ստորություն է ցանկացած հնարք, որը լեդին ժամանակ առ ժամանակ գործադրում է թովելու նպատակով: Ինչ էլ լինի` նենգության հակումն անգնահատելի է:

► Ամենաիմաստուն և լավագույն մարդկանց, ավելի ճիշտ` նրանց ամենաիմաստուն և լավագույն արարքները կարող են որպես անմտություններ մատուցել այն մարդիկ, ում համար կյանքում առաջինը սրամտելն է:

► -Գեղեցիկ, կայուն, առողջ սիրո համար երևի հենց այդպես էլ կա: Ամեն բան, որ փայփայում են դառնում է դիմացկուն: Բայց եթե խոսքը թույլ, նվազ հակվածության մասին է, համոզված եմ` մեկ լավ սոնետն ի վիճակի է դա լիովին վերացնել:

► Բարդ բնավորություններն աելի գրավիչ են:

►Ոչ մեկը չի կարող իրոք կրթված համարվել, եթե սովորական շրջապատին էապես չի գերազանցում: Այդպիսի կոչման արժանի կինը պետք է հիմնավոր գիտելիքներ ունենա երաժշտությունից, երգեցողությունից, նկարչությունից, պարից, ժամանակակից լեզուներից: Այս ամենից բացի՝ պետք է վայելուչ կեցվածքի ու քայլվածքի, ձայնի հնչերանգի ու արտահայտչականության տիրապետի, այլապես այդ բառին միայն կիսով չափ արժանի կլինի:

► – Կյանքում ես ջանացել եմ հեռու մնալ այն արատներից, որոնք մեկ-մեկ ծաղրի առարկա են դարձնում անգամ զորեղ մտքի տեր մարդկանց:
– Ինչպես օրինակ` սնափառությունն ու հպարտությունը:
– Իհարկե, սնափառությունն իրոք արատ է: Սակայն հպարտությունը…Եթե մարդն իրոք խելացի է, կարող է իրեն հպարտ պահել:-Դարսի

► Ոտով-գլխով դժբախտություն է գտնել լավ բան մի մարդու մեջ, ում որոշել ես ատել:

► – Ես հաճախ եմ նկատել, որ մեզ համար հրաժարումը երբեք այնքան կատարյալ չի լինում, որքան այն ժամանակ, երբ բարիքը սկսում է կորցնել իր նշանակությունը:-Քոլինզ

► – Ինչքան ավելի եմ աշխարհը ճանաչում, այնքան այն նվազ է ինձ գրավում: Ամեն օրն ավելի է ամրապնդում իմ համոզմունքը, որ մարդն էությամբ անկատար է, և պետք չէ կախում ունենալ թվացյալ արժանիքներից կամ զգացմունքներից:-Էլիզաբեթ

► – Պետք չէ միայն մեկ անհատի սիրույն փոխել սկզբունքայնության ու ուղղամտության մասին ունեցած պատկերացումներդ: Եվ ոչ էլ փորձիր քեզ կամ ինձ համոզել, թե եսասիրությունը հեռատեսություն է, կամ որ առողջ դատողությունն արհամարհելով` երջանկությունդ կապահովես:-Ջեյն

► – Մենք բոլորս էլ սիրում ենք դասեր տալ, թեև սովորեցնում ենք բաներ, որոնք ինքներս էլ կարգին չգիտենք:-Էլիզաբեթ

► Երբ մարդ նեղության մեջ է, ժամանակ չունի հետևելու պատշաճ պահվածքին, որը մյուս մարդիկ պարտադիր են համարում:

► – «Բուռն կերպով սիրել» արտահայտությունն այնքան ծեծված է, այնքան խաբուսիկ, այնքան անորոշ, որ գրեթե բան չի ասում: Դա հաճախ կիրառում են թե ընդամենը կես ժամ տևած ծանոթությունից հետո զգացածի վերաբերյալ, թե այն դեպքում, երբ ուժգին ու խիստ զգացմունք կա:-տիկին Գարդեներ

► – Կարևոր լինելու համար երբեմն պետք է թանկ վճարես:-Էլիզաբեթ

► – Գլխին եկած դժբախտության պարագայում որքան հարևաններիդ քիչ տեսնես, այնքան լավ: Օգնել, մեկ է, չեն կարողանա, իսկ ցավակցելն էլ անտանելի է: Թող նրանք մեզ վրա ծիծաղելու բավականությունը մեզնից հեռու վայելեն:-Էլիզաբեթ

►  – Մեջս մի համառություն կա, որը չի թողնում, որ ուրիշների

կամքով վախի մատնվեմ: Ամեն անգամ, երբ մեկը փորձում է ինձ

վախեցնել, խիզախությունը մեջս գլուխ է բարձրացնում:-Էլիզաբեթ

► Հակակրանքն ինքնին մարդուն մղում է բացահայտորեն սրամտել` շարունակ վատաբանելով մեկին և ոչ մի ճշմարիտ խոսք չասելով: Բայց հնարավոր չէ որևէ մեկի վրա անընդհատ ծիծաղել` առանց սրամտության դեմ ժամանակ առ ժամանակ մեղանչելու:

► Զայրույթը երբեք էլ լավ խորհրդատու չէ:

► – Հիմա դու պետք է շատ ծանր ընտրություն անես, Էլիզաբե՛թ: Մայրդ երեսդ տեսնել չի ուզում, եթե հրաժարվես ամուսնանալու պարոն Քոլինզի հետ: Իսկ եթե ամուսնանաս, ես չեմ ցանկանա երեսիդ նայել:-պարոն Բենեթ

► – Ինչ-որ բանի մասին մտածիր միայն այն ժամանակ, երբ հիշելը հաճելի է:-Էլիզաբեթ

► Որքան ենք խախտում բարոյականությունը, եթե մեր բարօրությունը կառուցում ենք խոստումնազանցության հիմքի վրա:

► Չկա ավելի մեծ, քան ընթերցանությունը: Ընթերցանությունից բացի մնացած բաները մարդուն այնքան արագ են հոգնեցնում: Երբ ես իմ սեփական տունն ունենամ, ինձ ուղղակի ողորմելի կզգամ, եթե հրաշալի գրադարան չունենամ:-օրիորդ Բինգլի

► Եթե դու լավ ես վերաբերվում քեզնից ինչ-որ բան պահանջողին, դա կարող է քեզ մղել, որ անվերապահորեն ենթարկվես նրա ասածին՝ անգամ չսպասելով, որ դրա համար որևէ հիմնավորում հնչի:

► Ես չեմ կարող ոչ էլ հարկավոր է, որ մտքիցս դուրս մղեմ այնտեղ ներխուժած ցավոտ հիշողությունները: Ամբողջ կյանքումս եսասեր եմ եղել, գոնե այդպես ապրել եմ, թեև սկզբունքներս այլ են եղել: Երեխա ժամանակ ինձ սովորեցրել են, թե ինչն է ճիշտ, բայց չեն սովորեցրել բնավորությունս շտկել: Ինձ բարձր սկզբունքներով են դաստիարակել, բայց թույլ են տվել, որ դրանց հետեվելիս լինեմ հպարտ եվ մեծամիտ:

► Երբ կինն անտարբեր չէ որևէ տղամարդու նկատմամբ և չի էլ փորձում թաքցնել, պետք է, չէ՞, որ այդ տղամարդը դա նկատի:-Էլիզաբեթ Բենեթ

► Միակ բանը, որի համար նրան մեղադրում էին, հպարտությունն էր. թերևս նա իրոք հպարտ էր, բայց եթե նույնիսկ այդպիսին չլիներ, դա հաստատ նրան կվերագրեին:

► Ուրիշին ցավ պատճառել կարողանալու համար պարոն Դարսիի անամոթ պարծենկոտությունն ավելի էր ընդծում քրոջ տառապանքների սրությունը:
Երբ մեկը գործն արագ կատարելը ամենակարևորն է համարում, հաճախ դրա որակին որևէ նշանակություն չի տալիս: Սակայն դրվատելի ի՞նչ կա հապճեպության մեջ, որի պատճառով կարևոր գործը թերի ես կատարում՝ օգուտ չտալով ոչ քեզ, ոչ էլ որևէ այլ մարդու:

► Այն անձինք, ովքեր երևակայում են, թե շատ կարևոր են ու բերանը երբեք չեն բացում, շատ են սխալվում, թե իրենք մի բան արժեն:

► Ամենաձանձրալի, ամենաչարչրկված թեման անգամ հետաքրքիր է դառնում, երբ խոսողը հմտորեն է զրույցը վարում:

► Էլիզաբեթը հիացած էր, թե ինչ զգացմունքներով է առաջնորդվում Ուիքհեմը, և մտածում էր, որ այդ զգացմունքներն արտահայտելիս նա առավել քան գեղեցիկ է:

► – Ի՞նչ կասեք գրքերի մասին,- ժպտալով հարցրեց Դարսին:
– Գրքերի՞: Դեհ, ոչ: Համոզված եմ, որ մենք նույն գրքերը չենք կարդացել, ոչ էլ կարդալիս նույն բանն ենք զգացել:

► – Ես չեմ կարողանում արագ մոռանալ այլոց տխմարությունն ու արատները, ինչպես նաև ինձ հասցված վիրավորանքները: Իմ զգացածները ոչինչ են դրանք առաջ բերող փորձությունների համեմատ: Եթե մեկը կորցնում է իր մասին իմ լավ կարծիքը, ուրեմն դա վերջնական է:-Դարսի

► Շատերը նրա մեջ տեսնում են այն, ինչ ինքն է ցանկանում, որ տեսնեն:

► Անհաշտ բարկությունը ստվեր է ձգում մարդու վրա:-Էլիզաբեթ

► – Ես հաճախ եմ նկատել, թե երիտասարդ աղջիներին ինչքան քիչ են հետաքրքրում լուրջ բովանդակությամբ գրքերը, որոնք գրված են բացառապես ի շահ իրենց:

► – Երիտասարդ լեդիները սովորություն ունեն առաջին անգամ մերժելու նույնիսկ այն առաջարկությունը, որը սրտի խորքում մտադիր են ընդունել: Եվ նույնսիկ լինում է, որ դա կրկնում են երկրորդ, պատահում է՝ երրորդ անգամ:-Քոլինզ

► – Կանայք հիցամունքի դրսևորումներին չափազանց մեծ նշանակություն են տալիս:-Ջեյն
– Դե, իսկ տղամարդիկ ամեն ջանք գործադրում են, որ հենց այդպես լինի:-Էլիզաբեթ

► – Հնարավոր է՝ մարդ մտադրություն չունենա մեկին վատություն անելու կամ այլոց բախտի հետ խաղալու, այդուհանդերձ այնպիսի սխալ գործի, որ նրանց հոգու խաղաղությունը խաթարի:-Էլիզաբեթ

► – Մի՞թե շրջապատողներին չնկատելը սիրահարված լինելու ամենաբնորոշ նշանը չէ:-Էլիզաբեթ

► – Եu իրոք էլ զուրկ եմ որոշ մարդկանց հատուկ տաղանդից,- խոսեց Դարսին:- Չեմ կարողանում անկաշկանդ զրուցել մարդկանց հետ, ում առաջին անգամն եմ տեսնում: Չի հաջողվում որսալ խոսակցության հնչերանգը կամ էլ ցույց տալ, թե հետաքրքրված եմ նրանց գործերով:
– Իմ մատները,- շարունակեց էլիզաբեթը,֊ այս նվագարանի վրա այնքան վարպետորեն չեն շարժվում, ինչքան իմ տեսած շատ ու շատ կանանցը: Հարկ եղած ուժն ու դիպուկությունը չունեն և ոչ էլ բավականաչափ արտահայտիչ են նվագում: Բայց ես միշտ ենթադրել եմ, որ թերացողը ես եմ, որովհետև ինձ նեղություն չեմ տվել հարկ եղածին չափ վարժվել: Դա չի նշանակում, թե մտածում եմ՝ մատներիս պատճառով է, որ չեմ կարողանում մյուսների նման բարձրակարգ երաժշտություն հնչեցնել:

► Քանի որ երբևէ երևակայության մեջ անգամ սիրահարված չէր եղել, Ջեյնի զգացմունքներն առաջին սիրո ամբողջ ուժով էին հոգին խռովում և, պայմանավորված տարիքով ու խառնվածքով’ շատ ավելի հաստատուն էին, քան ընդհանրապես առաջին հրապուրանքն է լինում:

► Որքանով է արդար մերկացնել որևէ մեկի անցյալի սխալները` առանց իմանալու, թե նա ինչ է զգում տվյալ պահին:

► – Կյանքումս չեմ լսել, որ դու որևէ մեկի մասին վատ բան ասես:-Ջեյն
– Ես չէի ցանկանա որևէ մեկին պարսավել, եթե նրան լավ չեմ ճանաչում: Բայց ես միշտ այն եմ ասում, ինչ մտածում եմ:-Լիզի

► Ես սիրով նրան կներեմ հպարտ լինելու համար, եթե ինքն իմ հպարտությանը չդիպչի…

► Երբեք չի կարող հաջող լինել մի ծրագիր, որի բոլոր կետերը հրաշալի են: Լիակատար հիասթափությունից կարող է ազատել միայն այն, որ այղ ծրագիրը որևէ փոքրիկ անախորժությամբ պաշտպանված լինի:

► – Ես նկատել եմ, որ երբ մարդ մանկության տարիներին բարի է լինում, մեծանալով` դա անպայման պահպանում է: Իսկ նա աշխարհի ամենաբարեհամբույր, ամենաառատաձեռն տղան էր:-տիկին Ռեյնոլդս

► էլիզաբեթը երբեք այդքան անկեղծորեն չէր գիտակացել, որ ինքը կարող էր նրան սիրել, որքան այդ պահին, երբ սերն արդեն անիմաստ էր…

► Որքան փոփոխական են մարդու զգացմունքները. այժմ իր ցանկությունն է շարունակել մի ծանոթություն, որին նախկինում ամեն կերպ ուզում էր վերջակետ դնել…

► – Երբ կնոջ պատիվն արատավորվում է, դա արդեն անուղղելի է: Կնոջ գեղեցկությունից է կախված, թե որքան խոցելի կլինի նրա բարի անունը, և որ շատ դժվար է անհրաժեշտ զգուշություն պահպանել հակառակ սեռի անարժան ներկայացուցիչների հետ հարաբերություններում:-Մերի

► Ամեն ինչ արա, որ առանց սիրո չամուսնանաս:

► – Դու երբեք երջանիկ ու ապահով չես լինի, եթե ամուսնուդ խորապես չհարգես, եթե նրան լուրջ չընդունես: Այդ դեպքում դժվար թե կարողանաս զերծ մնալ հիասթափությունից ու խուսափել հուսախաբությունից: Զավա՛կս, ինձ ազատիր ցավից, որը կզգամ, եթե տեսնեմ, որ դու կյանքիդ ընկերոջը չես հարգում: Դու չգիտես, թե դա ինչ բան է…-պարոն Բենեթ

► – Բուռն սիրահարված երիտասարդներն ամեն ինչ իրենց ուզածով են անում:-պարոն Բենեթ

► Հասարակությունը մեղ բոլորիս էլ պահանջներ է ներկայացնում, իսկ ես հենց մեկն եմ նրանցից, ովքեր երբեմն ամենքի նման ժամանակ են տրամադրում հանգստին ու զվարճությանը:

► Եթե վերջինն ես ծնվել, չի նշանակում, թե իրավունք չունես առաջինը ծնվածների պես կյանքը վայելել:

► Առանց համառ և կանոնավոր ուսուցման կրթությունը ոչինչ տալ չի կարող:

► Ես համոզված եմ, որ երբ մարդ մեկին ասում է, թե նրա հանդեպ զգացմունքներ ունի, լինեն դրանք փոխադարձ, թե ոչ, այդ մեկը  պետք է գոնե գոհունակություն զգա: Այդպիսին է մարդու էությունը:

► Որքան ենք խախտում բարոյականությունը, եթե մեր բարօրությունը կառուցում ենք խոստումնազանցության հիմքի վրա:

► Երջանկության զգացողությունը, որով այդ պատասխանը համակեց Դարսիին, նա երբևէ չէր ունեցել: Եվ նա արձագանքեց իրավիճակին վայել զգացմունքայնությամբ ու ջերմությամբ,  ինչպես սաստիկ սիրահարված մարդը կարող է անել: Եթե էլիզաբեթն ի զորու լիներ նայելու նրա աչքերի մեջ, կնկատեր, թե  դեմքին փայլող անկեղծ հիացմունքի արտահայտությունն ինչպես է գեղեցկացրել երիտասարդին: ճիշտ է, դա չէր տեսնում, բայց լսում էր, թե ինչպես է Դարսին իրեն պատմում իր զգացմունքների ու այն մասին, թե որքան թանկ է աղջիկն իր  համար, և նրա սերը էլիզաբեթի աչքին րոպե առ րոպե ավելի էր վեհանում:

► – Երբեմն ինչքա՞ն դժվար է լինում մարդկանց համոզել, որ քեզ հավատան:
– Երբեմն էլ ուղղակի անհնար է լինում:

► Կինը կարող է ամուսնու հետ այնքան ազատ վարվել, ինչքան չի կարող եղբոր հետ վարվել նրանից տասը տարով փոքր քույրը:

► Եթե դու պարել սիրում ես, ուրեմն կարող ես վստահ լինել, որ դեպի սերը մեկ քայլ արդեն արել ես:

► էլիզաբեթը նորից ու նորից եզրակացնում էր, որ երբ այնքան ցանկալի իրադարձությունը տեղի ունենա, ինքը դրանից ակնկալվող ամբողջ բավականությունը վայելել չի կարողանա: Հետևաբար անհրաժեշտություն էր առաջանում իսկական երանության մեջ հայտնվելու համար մեկ այլ ժամկետ նշել` հասնելու համար մեկ այլ նպատակակետի, որին կսևեռվեին իր իղձերն ու ակնկալիքները: Դա հնարավորություն կտար կրկին վայելելու սպասումի հաճույքը, որն անդորր կբերեր հոգուն և կնախապատրաստեր նոր հիասթափությունների:

► Որտեղ ուրիշները չեն կարողանում ուրախություն գտնել, իսկական փիլիսոփան դա կորզում է այն ամենից, ինչ իրեն տրված է:

– Հինգ չափահաս դուստր ունեցող կինը չի կարող մտածել սեփական գեղեցկության մասին:
– Նման պարագայում դժվար թե կնոջն այնքան գեղեցկություն մնացած լինի, որ դեռ մտածելու բան էլ լինի:

Հ.Գ. Եթե դուք ունեք մեջբերումներ` դուրս բերված այս գրքից, ապա կարող եք ուղարկել մեզ հետադարձ կապով:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: