Grqamol.am » Ամփոփումներ » Օրվա ամփոփում ►24.12.13◄

Օրվա ամփոփում ►24.12.13◄

Լեոնիդ Ենգիբարյան

Ես գրպանահատ եմ:
Ես գրպանահատների արքան եմ:
Ես հարուստ եմ և երջանիկ:
Գրեթե երջանիկ:
Միայն թե ափսո՜ս,
որ ոչ ոք գրպանում
իր սիրտը չի պահում։

 

 

 

Բերնար Վերբեր «Կյանքի ինստրուկցիա»

1. Դու մարմին կունենաս: Այն քեզ դուր կգա կամ չի գա, բայց դա միակ բանը կլինի, որ քո ձեռքին կլինի մինչև կյանքիդ վերջ:

2. Դու ստիպված կլինես Երկրի վրա գտնվող Կյանք կոչվող դպրոցում սովորել: Յուրաքանչյուր մարդ ու յուրաքանչյուր իրադարձություն քո ունիվերսալ ուսուցիչը կլինի:

3. Սխալներ չկան, միայն դասեր են: Ձախողումները հաջողության կարևոր պայմանն են: Անմեղ զոհեր չկան, բոլորն էլ սովորողներ են:

4. Դասը ամենատարբեր ձևերով կտևի այնքան, մինչև լիովին կըմբռնվի: Եթե հեշտ դասերը չսովորես, դրանք կբարդանան: Հենց մի դասը յուրացրեցիր, կանցնես հաջորդ մակարդակին:

5. Արտաքին խնդիրները քո ներաշխարհի ճիշտ արտացոլումն են: Եթե փոխես քո ներքին աշխարհը, կոխվի նաև արտաքինը:

6. Դու կհասկանաս, որ դասը սերտել ես այն ժամանակ, երբ կփոխվի քո տրամադրությունն ու պահվածքը տանջանքի հանդեպ: Իմաստնության հասնում են պրակտիկայով: Մի քիչ ինչ-որ բանից ավելի լավ է, քան մի քիչ ոչ մի բանը:

7. Ավելի լավ տեղ ու ժամանակ չկա, քան Այստեղն ու Հիման:

8. Ուրիշները միայն քո հայելային արտացոլումն են: Դու ուրիշների մեջ չես կարող սիրել կամ ատել այն, ինչ քո սեփական որակներին չի համապատասխանում:

9. Կյանքը շրջանակն է պատրաստում իսկ կտավը դու ես նկարում: Եթե դու չվերցնես նկարելու պատասխանատվությունը քո նկարը ուրիշները կպատկերեն:

10. Բոլոր պատասխանները քո մեջ են: Դու ավելին գիտես, քան գրված է գրքերում: Բայց որպեսզի հիշես դա, պետք է գրքեր կարդաս, նայես քեզ, լսես քեզ հավատաս քեզ:

 

Շալվա Ամոնաշվիլի «Թևեր» («Հավատ և սեր» գրքից)

Նստել էր ծերունին ճամփեզրին ու նայում էր ճանապարհին: Տեսնում է՝ գալիս է մի մարդ, իսկ նրա ետևից՝ փոքրիկ մի տղա: Մարդը կանգ է առնում, տղային պատվիրում ծերունուն իրենց ունեցածից հաց ու ջուր տալ:
-Ի՞նչ ես անում այստեղ, ծերո՛ւկ,-հարցնում է անցորդը:
-Սպասում եմ քեզ,-պատասխանում է ծերունին: Քեզ են, չէ՞, վստահել այս երեխայի դաստիարակությունը:
-Ճի՛շտ է,-զարմանում է մարդը:
-Ուրեմն վերցրու այս իմաստությունը.
Եթե ուզում ես մեկի համար ծառ տնկել՝ տնկի՛ր պտղատու ծառ:
Եթե ուզում ես մեկին ձի նվիրել՝ նվիրի՛ր լավագույն նժույգը:
Իսկ, եթե քեզ վստահել են դաստիարակության գործ, ապա հավատա՛ երեխայի թռիչքին:
-Ինչպե՞ս ես կարող եմ դա անել, ծերո՛ւկ, եթե ինքս թռչել չգիտեմ,-զարմացավ մարդը:
-Այդ դեպքում տղային դաստիարակության մի՛ վերցրու,-ասաց ծերունին՝ սևեռուն հայացքն ուղղելով երկինք:
Անցան տարիներ:
Ծերունին նստել էր նույն տեղում և նայում էր երկնքին:
Տեսնում է՝ թռչում է տղան, իսկ ետևից՝ նրա ուսուցիչը:
Իջնելով ծերունու մոտ՝ նրանք խոնարհվեցին:
-Ծերո՛ւկ, հիշո՞ւմ ես, դու ինձ պատվիրեցիր տղային թևեր տալ: Ես գտա ճանապարհը… Տեսնո՞ւմ ես՝ ինչպես են նրա թևերը աճել,-հպարտությամբ ասաց ուսուցիչը՝ քնքշորեն նայելով իր աշակերտի թևերին:
Բայց ծերունին թեթևակի հպվեց ուսուցչի թևերին, շոյեց ու շշնջաց.
-Ինձ ամենաշատը ուրախացրին քո փետուրները…

 

Պաբլո Ներուդա «Իմացիր, որ սիրում եմ քեզ և չեմ սիրում»

Իմացիր, որ սիրում եմ քեզ և չեմ սիրում
Որովհետև կյանքը երկու սեռ ունի.
Բառը լռության մի թևն է,
Կրակը ցրտի մի կեսն է:

Քեզ սիրում եմ, որ սկսեմ քեզ սիրել,
Որ վերսկսեմ անվերջը,
Որ չդադարեմ քեզ սիրել երբեք,
Դրա համար քեզ նորից չեմ սիրում:

Քեզ սիրում եմ և չեմ սիրում, ինչպես եթե ունենայի
Ուրախության բանալիներ իմ ձեռքերում,
և անորոշ ճակատագիր մի դժբախտ:

Իմ սերը երկու կյանք ունի քեզ սիրելու,
Դրանից է, որ քեզ սիրում եմ, երբ չեմ սիրում
Եվ դրանից է, որ քեզ սիրում եմ, երբ սիրում եմ:

Չարլզ Բուկովսկի

Կանայք. ինձ դուր են գալիս նրանց զգեստների գույները, այն, թե ինչպես են նրանք քայլում: Ոմանց դեմքերին խստություն կա: Ժամանակ առ ժամանակ` զտարյուն գեղեցկություն որևէ դեմքի վրա, բացարձակ, պաղեցնող կանացիությամբ: Նրանք կարողանում են այդ բանը անել մեզ հետ: Նրանք շատ ավելի լավ են ծրագրեր կազմում և ավելի կազմակերպված են: Մինչ տղամարդիկ ֆուտբոլ են դիտում, կամ գարեջուր են խմում, կամ թրև են գալիս կեգելբաններում, նրանք` այդ կանայք, մտածում են մեր մասին, կենտրոնանում են, ուսումնասիրում են, որոշում են` ընդունել մեզ, դեն նետել, փոխանակել, սպանել կամ պարզապես լքել: Եվ արդյունքում, հազիվ թե դա նշանակություն ունի, ինչ էլ նրանք անեն, մենք ավարտում ենք միայնակությամբ և խելահեղությամբ:

«Գեղեցկությունը կփրկի աշխարհը» արտահայտությունը բոլորն են լսել, սակայն քչերը գիտեն, թե ով է այդ խոսքերի հեղինակը, և արդյո՞ք այն տեղին է օգտագործվում:

Նարինե Ավագյան «Արյան Կանչը»-Կարդում է Գոհար Ավագյանը (նվիրված է Հայոց եղեռնի զոհերի հիշատակին)



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: