Պատուհանը

12734036_1006612476048743_4037375322323309253_nՊատուհանիցս դուրս ոչինչ չի փոխվել…
Ամեն ինչ նույն է, կյանքը ու մարդիկ,
Նույն փողոցներն են, շենքերը մռայլ,
Բայց այս թախիծը նոր է ինձ համար:
Անհրաժեշտ է լոկ ուշադիր լինել,
Սկսում եմ տեսնել փոփոխությունը.

Փոխվել է ահա աղմուկը դրսի, որ օրվա վազքում խեղդված է թվում,
Փոխվել են նաև գույները ներսիս, որ քեզնից հետո էլ չեն երևում:
Ու մայրամուտի շողերը վերջին
Ուժ չեն խնայում ինձ տաքացնելու,
Բայց մեկ է ցուրտ է, մրսում եմ, մրսում,
Առաջվա շողերն էլ ինձ չեն շոյում:

Ու օրն էլ ասես հուսահատիս պես
Փորձում է ապրել կյանքը շարունակվող,
Որ կանգ է առել լոկ պատուհանիցս ներս,
Պատուհանիցս դուրս կյանքն է եռացող:
Պատուհանիցս դուրս ոչինչ չի փոխվել,
Կյանքը շարունակում է հոսել իր հունով,
Հոգուս պատուհանն ես գնալիս բացել,
Ու ցուրտն է լցնում հոգիս իրենով:
Եվ հիմա քամին այնպես է փչում,
Կարծես քո շունչն է ուզում հետ բերել,
Հետքերդ է ցրել, ու հոգիս այրել,
Բայց հոգուս խորքում կարոտ սերմանել:
Սիրտ իմ բաբախիր,
Սիրտ իմ պայքարիր,
Այդ մեծ կարոտը քամին է բերում,
Բայց դու համբերիր, չհանձնվես հանկարծ,
Քամիներից զատ փոթորիկներ դեռ կան առջևում:
Իմ պատուհանից ես քանի անգամ
Գալուդ տեսիլքն եմ անխոս պատկերել,
Բայց խելառ քամին հոգիս խուժելով
Ոտնաձայներիդ հետքերն է ցրել…
Դեղին ապակուս թախիծ է հպվել,
Հազար կորստի մի անսանձ թախիծ ,
Եվ մշուշվել են մտքերս բոլոր,
Գալուդ ծարավից, ժպիտիդ տենչի՜ց:
Մարտի է ելել ժամանակը քեզ հետ,
Փորձում է փոխել, ջնջել քեզ անհետ,
Բայց այդ պայքարից լոկ ես եմ տուժում.
Տարիների ակոսներն են երեսս պատում,
Խեղդվում եմ անվերջ, անվերջ տառապում
Բայց պատուհանիցս դուրս ոչինչ չի փոխվում,
Մեկ է աչքերս դեռ քեզ են փնտրում,
Ես քեզ եմ սպասում…
Պատուհանիցս դուրս ոչինչ չի փոխվել ,
Փոխվել եմ լոկ ես. ես դարձել եմ ցավ,
Խտացած կարոտ, ու լուծվող խոր վիշտ,
Ու հայհոյում եմ բոլոր կարճատև սերերն աշխարհի,
Որ ներս են խուժում, փոխում մեզ ընդմիշտ:
Ինչո՞ւ պարզապես էլ չնայել դուրս,
Ու էլ չփնտրել փոփոխությունը,
Չէ որ ինչքան էլ ձգվում են օրեր,
Միշտ նույնն է մնում մեր էությունը։

Ու ես մենակ եմ…
Լոկ լռություն է դատարկ սենյակի
Ժամացույցի հետ տնքում ժամ առ ժամ,
Ու հույսը վաղվա ջերմ լուսաբացի
Պատուհանիս տակ ծնվում է այդժամ…

Հեղինակ` Հայ Գրքամոլներ
Խմբագրեց` Հասմիկ Մելիքսեթյան.



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: