Grqamol.am » Ստեղծագործություններ » Ընթերցողից » Նորիկ Հերգնյան «Նամակ»

Նորիկ Հերգնյան «Նամակ»

Բարև սիրելի *******: Ինձ մոտ ամեն ինչ լավ է: Գրում եմ քեզ հեռավոր հուշերի աշխարհից: Այստեղ հաճախ եմ լինում, քանի որ շատ կիսատ գործեր ունեմ անելու: Գործեր, որոնք կիսատ էլ կմնան, որովհետև այստեղ ժամանակը կանգ է առել ու դժվար թե կրկին շարունակի իր ընթացքը: Հիմա դու հեռու ես ինձնից, ու հեռավորության ընդունված չափման միավորները այնքան խղճուկ են այսօր, որ նրանք էլ են խեղճանում մեր միջի տարածությունը չափելու գործում:
Ինձ մոտ ամեն ինչ լավ է: Գրում եմ քեզ, քանի որ ունեմ մի չնչին խնդրանք, որը չեմ ուզում մերժես: Հիմա, երբ դու գտնվում ես որիշի հեքիաթում, այնուամենայնիվ խնդրում եմ քեզ, որ չմոռանաս այն ամենը, ինչը մի ժամանակ հպարտությամբ անվանում էինք ՄԵՐԸ: Խնդրում եմ չմոռանաս այն քնքշանքը, որը այդպես էլ չհասցրի քեզ տալ: Խնդրում եմ չմոռանաս այն խոսքերը, որոնք չեմ ասել, բայց որոնք մինչ օրս կանգնած են կոկորդիս ու էլ չունեն հասցեատեր: Կուզենամ չմոռանաս այն անձրևը, որը խոստացել էր գալ իմ ու քո առաջին համբույրի ժամանակ, որը ո՞վ գիտե, գուցե մինչև հիմա էլ սպասում է ու տեղյակ էլ չէ, որ էլ երբեք չի գալու: Խնդրում եմ, որ չմոռանաս այն ձեռքերը, որոնք անասելի սիրով ու երազանքով կգրկեին քեզ ու որոնց մեջ դու կգտնեիր քո ամենաապահով անկյունը, ջերմությունը: Եվ ի վերջո ես շատ կցանկանայի, որ չմոռանաս այն աչքերը, որտեղ արևներ էին վառվում լոկ այն պատճառով, քանի որ բախտ ունեին քեզ տեսնելու, հիանալու քեզնով: Այն աչքերը, որոնք հիմա լցված են մի լռությամբ, որն իր մեջ ամփոփել է թե՛ սերը, թե՛ կարոտը: Այն աչքերը, որտեղ հիմա տխրությունն ու ափսոսանքը ձեռք-ձեռքի են տվել, դարձել են և՛ տեր, և՛ պահանջատեր: Այն աչքերը, որոնք էլ չեն նայի քեզ առաջվա պես…
Ինձ մոտ ամեն ինչ լավ է: Գուցե ինձ հանդիմանես և ասես, թե պետք չէ կառչել անցյալից, պետք է ապրել հիմա, այստեղ ու մտածել ապագայի մասին: Դու ճիշտ ես: Սակայն ինչպե՞ս մտածել ապագայի մասին, երբ իմ երազած ապագան կառուցված էր անցյալիս հիմքերի վրա: Անցյալ, որը դաջվել է իմ մեջ անջնջելի խարանի նման: Էլ ի՞նչ ապագա…
Ինչ էլ որ լինի, ցանկանում եմ քեզ այնպիսի կյանք, որը նման կլինի իմ պատկերացրածին, իմ նկարածին:
Դու մի՛ անհանգստացիր, ինձ մոտ ամեն ինչ լավ է:
Միշտ Քեզ մոտ ու Քեզնից հեռու…

Հեղինակ՝ Նորիկ Հերգնյան

Սեղմեք այստեղ՝ ստեղծագործությունը Գրքամոլ էջում կարդալու համար:



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: