Grqamol.am » Տարբեր Ժանրեր » Արտասահմանյան Հեղինակներ » Պաբլո Ներուդա «Հարյուր սոնետ սիրո մասին» ժողովածուից

Պաբլո Ներուդա «Հարյուր սոնետ սիրո մասին» ժողովածուից

Սիրում եմ քեզ`
անհասկանալի
չխոստովանվող
իրարամերժ։

Սիրում եմ քեզ
բոլոր հոգեվիճակներովս, որոնք շատ են,
և որ շարունակ փոխվում են.
թե ինչու` ինքդ գիտես
ժամանակը, կյանքը, մահը։

Սիրում եմ քեզ…
աշխարհով, որը չեմ հասկանում,
մարդկանցով, որոնք չեն հասկանում,
հոգուս երկվությամբ,
արարքներիս հակասությամբ,
տրված ճակատագրով,
թաքուն ցանկությամբ,
երկիմաստ փաստերով։

Նույնիսկ երբ ասում եմ, թե քեզ չեմ սիրում, սիրում եմ քեզ,
նույնիսկ երբ խաբում եմ քեզ, քեզ չեմ խաբում,
հոգու խորքում այդպես քեզ ավելի շատ եմ սիրում։

Սիրում եմ քեզ…
առանց մտածելու, անգիտակցաբար,
անպատասխանատվությամբ, ինքնաբերաբար,
ակամա, բնազդաբար,
հախուռն, չկշռադատված։

Իրականում չունեմ տրամաբանական փաստեր,
ոչ էլ նույնիսկ հանպատրաստից
հիմնավորելու այս սերը, որ զգում եմ քո հանդեպ,
որ ծագեց ոչնչից խորհրդավոր ձևով
որ չհանգեց ոչնչի մի հրաշքով
բայց որը քիչ-քիչ ու հրաշալի
իմ մեջ վատը լավ դարձրեց։

Սիրում եմ քեզ,
սիրում եմ մարմնով, որը չի մտածում,
սրտով, որը չի կշռադատում,
մտքով, որը չի համակարգում։
Սիրում եմ քեզ`
անհասկանալի
առանց հարցնելու ինձ` ինչու եմ սիրում,
կարևորություն չտալով, թե ինչու եմ սիրում,
իմ առաջ հարց չդնելով, թե ինչու եմ սիրում։

Սիրում եմ քեզ
պարզապես, որովհետև սիրում եմ,
ինքս էլ չգիտեմ, թե ինչու:

(c) Թարգմանիչ Ռուզաննա Պետրոսյան



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: