Grqamol.am » Չդասակարգված » Էդուարդ Հարենց | Բանաստեղծություններ

Էդուարդ Հարենց | Բանաստեղծություններ

Եկեք ծանոթանանք։
Ազգանունս Սեր է,
Իսկ անունս՝Համբույր,
Ունեմ աչքեր կանաչ
Ու կապուտակ լուսին
Ու տիեզերք-երակ՝
Լուսայգերանգ արյամբ։
Ու ծնվել եմ ահա Հավերժ դարասկզբին՝
Կենսաժպիտ տարվա
Ակնթարթներ ամսում,
Առասպելերորդ օրվա՝
լույս Գաղտնիքի գիշերը՝ Կարոտի ու Վերադարձի սիրուց,
Առեղծվածի մարմնով…
Հա, մի բան էլ ասեմ.
Ես սիրում եմ նրանց,
Ում անունը Սեր է ,
Ազգանունը՝ Համբույր…
Եկեք ծանոթանանք։

***
Այսօր,
ավելի քան երբևէ,
ես սկսում եմ
Աստծո գոյության կարիքն ունենալ:
Իսկ եթե նա կա,
այդ դեպքում
այսօր,
ավելի քան երբևէ,
ես հետզհետե սկսում եմ հավատալ
այն սուրբ լեգենդին,
որ նրա որդին
ինձ պես հասարակ մի մարդ է եղել,
թեև կարող էր ծովալիքները
պահել ոտքի տակ:
Քանզի
այս էլ քանի՜ տարի է,որ
ես ոչ թե քայլում,
այլ վազվզո՜ւմ եմ
Սիրո ու Ցավի
օվկիանի վրա…

Աղբյուրը՝ granish.org



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: