Grqamol.am » Գրքամոլ Ակումբ » Գրքամոլ Ակումբ. Քննարկում երրորդ. Գաբրիել Գարսիա Մարկես «Հարյուր տարվա մենություն»

Գրքամոլ Ակումբ. Քննարկում երրորդ. Գաբրիել Գարսիա Մարկես «Հարյուր տարվա մենություն»

Հոկտեմբերի 3-ին «Գրքամոլ Ակումբ»-ի շրջանակներում Ավ. Իսահակյանի գրադարանում տեղի ունեցավ «Գրքամոլ Ակումբ»-ի երկար սպասված արդեն երրորդ հանդիպումը, որն այս անգամ իր քննարկվելիք գրքերի ցանկում ներառում էր համաշխարհային գրականության գոհար հանդիսացող Գաբրիել Գարսիա Մարկեսի «Հարյուր տարվա մենություն» գիրքը: Քննարկման սկզբում ակումբի անդամները տեսանյութերով դիտեցին և ծանոթացան Մարկեսին ու նրա «Հարյուր տարվա մենություն» ստեղծագործությանը, ինչպես նաև իրենց կողմից ներկայացրին բազմաթիվ հետաքրքիր փաստեր գրքի վերաբերյալ: Ինչպես Գրքամոլ Ակումբ-ի բոլոր հանդիպումների ժամանակ, այս անգամ ևս մասնակիցներին պարուրում էր հաճելի գրական մթնոլորտը, ինչպես նաև Մարկեսյան շունչը՝ գրքի միջոցով փոխանցված ակումբի բոլոր անդամներին, ովքեր իրենց հետաքրքիր տեսակետներով և գրքի մասին առաջացած խորը տպավորություններով կիսվում էին ակումբի մյուս անդամների հետ: Շուրջ երկու ժամ ծավալված քննարկումից հետո ակումբի անդամներից շատերը եկան այն համոզմունքին, որ Մարկեսի գրքում ներկայացրած հերոսները տառապում էին միայնության մեջ, ինչը գալիս էր Բուենդիա ընտանիքում սիրո պակասից, և վերջապես, որ մեզնից յուրաքանչյուրս այս կյանքում իր ներսից իրեն զգում է յուրովի միայնակ:

Գրքամոլ Ակումբը շարունակում է համաշխարհային գրականության արժեքների ներկայացումը հայ հասարակությանը՝ ինչպես Ակումբի ներքին շրջանակներում, այնպես էլ տասնյակ հազարավոր ընթերցողների ամենասիրելի Գրքամոլ էջում, և այս անգամ մենք արդեն անցում ենք կատարում դեպի ռուս գրականություն: Հոկտեմբերի 13-ին, Գրքամոլ Ակումբի ասպնջական օջախ հանդիսացող Ավ. Իսահակյանի գրադարանում քննարկվելու է ռուս դասական Միխայիլ Լերմոնտովի «Մեր ժամանակի հերոսը» գիրքը:

© Գրքամոլ Նախաձեռնություն



Yandex.Metrica Display Pagerank

Բոլոր հեղինակային իրավունքները պաշտպանված են. Copyright © 2013-2017 Grqamol.am: All Right Reserved
Այլ կայքերում կամ հեռուստառադիոընթերցումներում մեջբերումներ անելիս հղումը Grqamol.am-ին պարտադիր է: