Գրքամոլ Ակումբ. Խումբ Երկրորդ. Քննարկում տասնհինգ. Ալեքսանդր Պուշկին «Եվգենի Օնեգին»
2016-05-22 5371
«Գրքամոլ» ակումբի երկրորդ խումբը մայիսի 14-ին անցկացրեց երկրորդ մակարդակի վերջին քննարկումը: Եզրափակիչ գործը, որը հայտնվել էր ներկաների ուշադրության կենտրոնում, ռուս հայտնի գրող Ալեքսանդր Պուշկինի չափածո վեպն էր` «Եվգենի Օնեգին»-ը (1823-1831թթ.): Խմբի անդամները, որոնք նախապես բաժանվել էին խմբերի, նախ անդրադարձան Պուշկինի անձնական ու ստեղծագործական կյանքին` սկսած գրողի ծագումից, ընտանեկան կարգավիճակից, էության առանձնահատուկ գծերից մինչև ուսման տարիներ, գրական հաջողություններ ու խոչընդոտներ, հետաքրքիր, ճակատագրական շրջադարձեր ու ողբերգական մահ: Դրանից հետո գրքամոլցիներն անդրադարձան վեպին, որը, ինչպես Պուշկինն է ասել, «սառը դիտողությունների և սրտի ցավալի նկատառումների» «պտուղ» է։ Ընդհանուր առմամբ, վեպում նկարագրված են 19-րդ դարի առաջին քառորդի իրադարձությունները, այսինքն այն գրելու ժամանակն ու իրադարձությունները հիմնականում համընկնում են։ Ակումբի անդամները նկատեցին, որ այնտեղ արտացոլված է ամբողջ ռուսական կյանքը։ Կարճ, բայց պարզ ձևով հեղինակը ցույց է տվել գյուղական կյանքը, ազնվական Մոսկվան, աշխարհիկ Սանկտ Պետերբուրգը։ Այս ստեղծագործությունից կարելի է եզրակացնել, թե տվյալ դարաշրջանում Ռուսաստանում որ տիպի հագուստն էր ակտուալ, ինչպես էին մարդիկ խոսում, ինչ արժեքների կրող էին և այլն: Ինչպես նաև, ընդհանուր քննարկման արդյունքում պարզ դարձավ, թե ինչի հետևանքն էր Եվգենի Օնեգինի և Վլադիմիր Լենսկու միջև թշնամանքը, որի պատճառով վերջինս սպանվեց իր հարազատ ընկերոջ կողմից:
Խմբի անդամները ուշադրություն դարձրին նաև վեպի կառուցվածքին. դրա գլուխներն այնպես են գրված, որ դրանցից յուրաքանչյուրը կարող է լինել վերջինը, կարող է ունենալ նաև շարունակություն:
Այժմ գրքամոլցիները պատրաստվում են երրորդ մակարդակի առաջին հանդիպմանը, որի ընթացքում կքննարկվի Գաբրիել Գարսիա Մարկեսի «Սերը ժանտախտի օրերին» վեպը և կդիտվի համապատասխան ֆիլմը:
Հանդիպման բոլոր նկարներն՝ այստեղ:
Դիտեք ավելին Տեսադարան բաժնում
մեկնաբանություններ