10 փաստ Ուիլյամ Շեքսպիրի մասին

2023-06-15 1155

Ձեզ ենք ներկայացնում տաս հետաքրիր փաստ Ուիլյամ Շեքսպիրի մասին։

  1. Ուիլյամ Շեքսպիրի ծննդյան և մահվան օրերը համընկնում են․ նա ծնվել է 1564 թվականի ապրիլի 23-ին և մահացել 52 տարի անց՝ 1616 թվականին նույն օրը։
  2. Անգլիացի բանաստեղծ, դրամատուրգ և դերասան, խոշորագույն անգլիալեզու գրող ու աշխարհի լավագույն դրամատուրգներից մեկը՝ Ուիլյամ Շեքսպիրը, իր մի շարք գրվածքներում չի թողել իր անվան ամբողջական մակագրությունը։ Իր կենդանության օրոք նրա ազգանունը գրվել է ավելի քան 80 տարբեր ձևերով՝ սկսած «Shappere»-ից մինչև «Shaxberd», օգտագործվել են իր անվան տարբեր հապավումներ ինչպիսիք են՝ «Willm Shakp», «Willm Shakspere» և «William Shakspeare»:
  3. Ուիլյամ Շեքսպիրի արտաքին տեսքի մասին մեր պատկերացումը գալիս է 17-րդ դարի մի քանի դիմանկարներից, որոնք, սակայն, հնարավոր է իրականությանը չեն համապատասխանում։ Ամենահայտնի պատկերներից մեկում նա ունի մորուք, հետ սանրած մազեր, թույլ արձակած օձիքով վերնաշապիկ, իսկ ձախ ականջին կրում է փայլուն ոսկե օղակ։ Դեռևս Շեքսպիրի ժամանակներում տղամարդկանց ականջօղեր կրելու ոճը բոհեմական ապրելակերպի նշան էր, որը ոգեշնչված է եղել նավաստիներից, ովքեր կրել են մեկ ոսկե ականջօղ՝ ծովում մահանալու դեպքում իրենց մահվան ծախսերը հոգալու համար։
  4. Ուիլյամ Շեքսպիրն ամուսնացել է 1582 թվականի նոյեմբերին՝ Աննա Հեթուեյի հետ: 18-ամյա Ուիլյամն ու 26-ամյա Աննան ամուսնացել են, երբ վերջինս կրծքի տակ կրում էր իրենց առաջնեկին: Եկեղեցում տեղի ունեցող հարսանեկան արարողության ժամանակ, զույգի ամուսնանալու մասին համաձայնությունը՝ ընդունված երեք անգամի փոխարեն, հայտարարվեց մեկ անգամ, ինչը վկայում էր այն մասին, որ միությունը հապճեպ էր կազմակերպվել՝ Աննայի կարգավիճակը մարդկանցից թաքցնելու համար։ Զույգի համատեղ կյանքը շարունակվել է մինչև Ուիլյամի մահը, սակայն տարիների ընթացքում զույգը հաճախ առանձին է ապրել։ Շեքսպիրը կնոջն է կտակել իր «երկրորդ լավագույն մահճակալը», որը եղել է իրենց իրական ամուսնական մահճակալը, որը նա և Աննան կիսում էին՝ որպես տղամարդ և կին;
  5. Շեքսպիրի կենսագրության մեջ 1585-1592 թվականները հայտնի են որպես «կորած տարիներ», քանի որ վերջինս 1585թ․-ին՝ իր երկվորյակ երեխաների մկրտությունից հետո, հիասթափեցնելով իր կենսագիրներին, անհետացել է մինչև 1592 թվականը։ Պատմաբանները ենթադրում են, որ նա աշխատել է որպես դպրոցի ուսուցիչ, սովորել է իրավաբանություն կամ միացել դերասանական խմբին, որն անցնում էր Ստրատֆորդով։ Վերադարձից հետո դրամատուրգ Ռոբերտ Գրինը նրան անվանել է «սկսնակ ագռավ»։
  6. Ոմանք կարծում են, որ Շեքսպիրը խաբեբա էր, քանի որ գավառական հասարակ բնակիչը, ով երբեք քոլեջ չէր գնացել և իր բնակավայրից դուրս չէր եկել, հնարավորություն չուներ դառնալու պատմության ամենաբեղմնավոր և պերճախոս գրողներից մեկը: Այդ պատճառով որոշ տեսաբաններ ենթադրում են, որ մի քանի հեղինակներ, ովքեր ցանկանում էին թաքցնել իրենց ինքնությունը, որպես կեղծանուն օգտագործել են Ուիլյամ Շեքսպիրի անունը: Առաջարկվող թեկնածուների թվում են Էդվարդ Դե Վերը, Ֆրենսիս Բեկոնը, Քրիստոֆեր Մարլոուն և Մերի Սիդնի Հերբերտը:
  7. Ու․ Շեքսպիրը դադարել է պիեսներ գրել և անցել է սոնետներին, քանի որ ժանտախտի պատճառով բոլոր թատրոնները փակվել էին։ Ընդ որում, նա իր կենդանության օրոք չի հրատարակել իր պիեսներից և ոչ մեկը։ Բարեբախտաբար, նրա ընկերներ Ջոն Հեմինգեսը և Հենրի Կոնդելը դա արել են հետմահու և փրկել են թատերական աշխարհի ժառանգությունը։
  8. Շեքսպիրի ստեղծագործությունները պարունակում են ավելի քան 600 հիշատակումներ տարբեր տեսակի թռչունների մասին՝ սկսած կարապներից և աղավնիներից, մինչև ճնճղուկներ և հնդկահավեր: 1890 թվականին Յուջին Շիֆելին անունով մի ամերիկացի, ում համար Շեքսպիրը կուռք է եղել, որոշում է Միացյալ Նահանգներ ներմուծել Շեքսպիրի ստեղծագործությունների մեջ հիշատակված բոլոր տեսակի թռչուններին, որոնք բացակայում էին Միացյալ Նահանգներում: Այս նախագծի շրջանակներում նա Նյու Յորքի Կենտրոնական զբոսայգում բաց է թողնում նաև Եվրոպայում և Արևմտյան Ասիայում բնակվող սարյակի մի տեսակ, որի մասին Շեքսպիրը հիշատակել էր միայն մեկ անգամ՝ «Հենրի IV» ստեղծագործության մեջ` «Մաս 1»-ում։ Հարյուր քսան տարի անց բարձր հարմարվողականություն դրսևորած այս տեսակին հաջողվել է գրավել Միացյալ Նահանգների երկինքը:
  9. Ուրան մոլորակի (որը դեռևս հայտնաբերված չի եղել Շեքսպիրի ապրած ժամանակներում) շուրջը պտտվում են Շեքսպիրի պիեսների հերոսների անունները կրող արբանյակներ, այդ թվում՝ Օբերոնը, Արիելը և Ումբրիելը: Հաշվի առնելով, որ այլ մոլորակների շուրջ պտտվող արբանյակների մեծ մասը իրենց անունները վերցրել են հնագույն դիցաբանությունից, այս իմաստով Ուրանի արբանյակները եզակի են շեքսպիրյան կերպարների անուններով։
  10. Չնայած իր վաղաժամ մահվանը, Շեքսպիրը երկտող է թողել իր գերեզմանաքարի համար, որը, ի դեպ, գտնվում է Ստրատֆորդի եկեղեցու ներսում: Այս երկտողը թողնելու պատճառը գերեզմանների ավազակներն էին, ովքեր այդ ժամանակ թալանում էին Անգլիայի գերեզմանոցները։ Գերեզմանաքարին գրված է․

«Օրհնյալ լինի այն մարդը, ով խնայում է այս քարերը,

Եվ անիծյալ լինի նա, ով շարժում է իմ ոսկորները»:

© Նյութի հեղինակ՝ Եսթեր Սարգսյան

 

Դիտեք ավելին Հետաքրքրի մասին բաժնում

մեկնաբանություններ