Առաջին նախադասության արվեստը

Գրքի մասին պետք չէ դատել իր կազմով: Իսկ ի՞նչ կասեք առաջին նախադասության մասին։ Եկե՛ք կարդանք մի քանիսը, որից հետո ինքներդ խոստովանեք՝ որ առաջին նախադասությունը դարձավ «թակարդ» ամբողջ գործը կարդալու համար։

Խավիեր Մարիաս-«Այնքան սպիտակ սիրտը»  Չեմ ցանկացել իմանալ, սակայն իմացել եմ, որ աղջիկներից մեկը, որն արդեն փոքր չէր և նոր էր վերա­դարձել ամուսնական ճանապարհորդությունից, մտավ լոգասենյակ, կանգնեց հայելու առաջ, հանեց բլուզը, արձակեց կրծկալը և հարազատ հորը պատկանող ատրճանակի ծայրն ուղղեց սրտին, այդ պահին հայրը և ընտանիքի մնացած անդամները երեք հյուրերի հետ ճաշասենյակում էին։

Միլան Կունդերա-«Կեցության անտանելի թեթեւությունը»  «Հավերժ վերադարձը խորհրդավոր գաղափար է, որով Նիցշեն շատ փիլիսոփաների նեղը գցեց. Մտածել, որ մի օր այն ամենը, ինչ մի անգամ արդեն ապրել ենք, կկրկնվի, եւ որ նույնիսկ այդ կրկնությունն անվերջորեն կկրկնվի»:

Նիկոս Կազանձակիս-«Հույն Զոռբան» «Առաջին անգամ նրան հանդիպեցի Պիրեայի նավահանգստում, ուր իջել էի, որ Կրետե գնացող նավ նտեմ»:

Միգել դը Ունամունո-«Մառախուղը» «Դուրս գալով տնից՝ Ավգուստոն աջ ձեռքի բաց ափը ձգեց առաջ, մի պահ աչքերը հառեց երկնքին եւ հիացմունքից քարացած՝ մնաց տեղում կանգնած»:

Ռեյ Բրեդբըրի-«Խատուտիկի գինի» «Խաղաղ առավոտ էր, քաղաքը՝ դեռ պարուրված մթով, հանգիստ ու անխռով փռված քաղաքում»:

Աննի Էռնո-«Տեղը»  «Capes»-ի գործնական քննությունները հանձնեցի Լիոնի մի լիցեյում՝ Կռուա-Ռուսում»:

Ֆյոդոր Դոստոեւսկի-«Կարամազով եղբայրներ» «Ալեքսեյ Ֆյոդորովիչ Կարամազովը երրորդ որդին էր կալվածատեր Ֆյոդոր Պավլովիչ Կարամազովի, որն իր ժամանակին հանրածանոթ մարդ էր մեր գավառում եւ հիմա էլ դեռ հիշվում է իր ողբերգական ու խորհրդավոր մահվան պատճառով»:

Լեոնիդ Ցիպկին-«Ամառը Բադենում» «Գնացքը ցերեկվա էր, բայց դեկտեմբերի վերջն էր՝ ձմեռվա թունդ ժամանակը, դրանից բացի գնացքը շարժվում էր Լենինգրադի ուղղությամբ՝ դեպի հյուսիս, ուստի պատուհանից այն կողմ սկսեց արագ մթնել. միայն վառ լույսերով բռնկվում ու կորչում էին կարծես մի անտեսանելի ձեռքով շպրտված հրեղեն ժապավենում ի մի եկած շարան-շարան առկայծող լապտերներով մերձմոսկովյան ամառանոցային կայարանների ձյունաթաղ կառամատույցները, որոնք փախչում էին խուկ դղրդյունով, ասես գնացքը գնալիս լիներ կամրջի վրայով…»:

Վլադիմիր Նաբոկով-«Լոլիտա» «Լոլիտա, իմ կյանք, իմ արեւ, իմ ազդրերի հուր: Մեղք իմ, հոգի իմ»:

Ալբերտո Մուսսա-«Ձախ կողմի վարպետը» «Քաղաքի բնութագիրը տալու համար կարեւոր չեն ոչ աշխարհագրությունը, ոչ ճարտարապետությունը, ոչ հերոսներն ու ճակատամարտերը, ոչ էլ, առավելեւս, սովորույթների ժամանակագրությունը կամ պոետների երեւակայությամբ ծնունդ առած պատկերները: Քաղաքի բնութագիրն այնտեղ կատարված հանցանքների պատմությունն է»:

Լութց Զայլեր-«Կրուզո» «Այն պահից ի վեր, ինչ ճանապարհ էր ընկել, Էդը զգոնության այնպիսի արտակարգ վիճակում էր, որը թույլ չէր տալիս քնել գնացքում»:

Պետեր Հանդկե-«Դանդաղ վերադարձ տուն» «Ջեֆերսոն սթրիթը խաղաղ փողոց է Պրովիդենսում»:

Ումբերտո Էկո-«Վարդի անունը» «1968 թվականի օգոստոսի 16-ին ձեռքս անցավ ոմն աբբա Վալեի լույս ընծայած մի գիրք՝ «հայր Ադսոն Մելքեցու հիշատակարանը» ֆրանսերեն թարգմանությամբ՝ ըստ հայր Ժ. Մաբիյոնի հրատարակության»:

Կամիլ Լըմոնյե-«Տղամարդու սերը» «Բժիշկը, ոսկեզօծ մատիտը խաղացնելով, ասաց ինձ. «Խնայող ռեժիմ»»:

Օրհան Փամուկ-«Կարմրահեր կինը» «Ես գրող էի ուզում դառնալ, բայց ներքոհիշյալ դեպքերից հետո ճարտարագիտական երկրաբան ու կապալառու դարձա»:

Ջերոմ Սելինջեր-«Փրկիչը տարեկանի արտում» «Եթե իսկապես ցանկանում եք լսել այս պատմությունը, երեւի նախ կուզենաք իմանալ՝ որտեղ եմ ծնվել, ինչպես եմ անցկացրել իմ անպետք մանկությունը, եւ ինչով էին զբաղված ծնողներս մինչեւ իմ ծնվելը. մի խոսքով այդ ամբողջ դեյվիդկոպերֆիլդյան զիբիլը»:

Ջորջ Օրվել-«Անասնաֆերմա» «Գիշերվա դեմ «Մենըր» ֆիրմայի տեր Ջոնզը կողպեց հավաբները, սակայն չափից դուրս հարբած էր, որ հիշեր գոմերը փակել»:

Սերվանտես-«Դոն Կիխոտ» «Մանչայի գյուղերից մեկում մի կալվածատեր էր ապրում»:

Բիրգյուլ Օղուզ-«Հահ» «ՄՈՐԻՑ ԱՇԽԱՐՀ ԵՍ ՉԵԿԱ»:

Վլադիմիր Վոյնովիչ-«Տիրուհին» «Այս պատմությունը շատերից եմ լսել: Ոմանք ասում էին՝ վաղու~ց, վաղու~ց է պատահել այս ամենը՝ տասներեքերորդ, թե տասնչորսերորդ դարում, ինչ-որ տեղ Սիբիրում, ոմանք էլ՝ Վոլգայի ափին, իսկ տարեցները պնդում էին, թե՝ հյուսիսում, ցուրտ ծովի եզերքին»:

Ֆրեդերիկ Բեգբեդեր-«99 ֆրանկ» «Ամեն ինչ անցողիկ է՝ սերը, արվեստը, Երկիր մոլորակը, դուք, ես»:

Ֆյոդոր Դոստոեւսկի-«Ոճիր եւ պատիժ» «Հուլիսի սկզբին, չափազանց շոգ ժամանակ, իրիկնադեմին մի երիտասարդ դուրս եկավ իր խցիկից, որ վարձել էր Ս… նրբանցքում ապրողներից, փողոցի կողմում, ու դանդաղ, ասես հապաղելով գնաց դեպի Կ… կամուրջը»:

Հերման Հեսսե-«Հուլունքախաղ» «Այս գրքով ցանկանում ենք կորստից փրկել չնչին մասն այն ամենի, ինչ կարողացանք գտնել Յոզեֆ Կնեխտի, ինչպես որ Հուլունքախաղի արխիվներում է անվանված՝ Ludi Magister Josephuss III-ի կենսագրությունից»:

Ալեքսանդր Դյումա որդի-«Կամելիազարդ տիկինը» «Իմ կարծիքով հնարավոր չէ կերպարներ ստեղծել առանց խորապես ուսումնասիրելու մարդկանց, ինչպես չի կարելի խոսել մի լեզվով առանց լրջորեն ուսումնասիրելու այն»:

Վիլյամ Գոլդինգ-«Ճանճերի տերը» «Խարտյաշ տղան ցած իջավ վերջին քարափից եւ սկսեց ճանապարհ հարթել դեպի ծովախորշը»:

Լեւ Տոլստոյ-«Աննա Կարենինա» «Բոլոր երջանիկ ընտանիքները նման են իրար, բոլոր դժբախտ ընտանիքները դժբախտ են յուրովի»:

Ֆերդինանդ Բորդեւայք-«Խառնվածք» «Տարվա ամենամռայլ շրջանում՝ Սուրբ ծննդյան տոներին, Ռոտերդամի ծննդատանը կեսարյան հատումով լույս աշխարհ եկավ Յակոբ Վիլեմ Կատադրոյֆեն»:

Աղբյուրը՝ https://angelagrigoryan.wordpress.com