Էքզյուպերիի 5 գիրք, որոնք թարգմանվել են հայերեն
2021-06-30 16135
Ես ուզում եմ դառնալ ուրիշ մի բան, մինչև իմ մահանալու ժամը կհասնի
Անտուան Մարի Ժան-Բատիստ Ռոժե դը Սենտ-Էքզյուպերին՝ բանաստեղծը, վիպասանը, օդաչուն և փիլիսոփան. ընթերցասեր հասարակությունը նրան գլխավորապես ճանաչում է «Փոքրիկ իշխանը» վիպակով: Այն Էքզյուպերիին գրական մեծ փառք է բերել՝ թարգմանվելով աշխարհի բազմաթիվ լեզուներով և ունենալով ընթերցողների մեծ բանակ: Հեղինակը, սակայն, իր ողջ կյանքի ընթացքում գրել է նաև տարբեր ժանրերի այլ ստեղծագործություններ՝ վիպակներ, ինքնակենսագրականներ, փիլիսոփայական ակնարկներ, առաջաբաններ, որոնք ևս արժանի են հիշատակության։
Ստորև ներկայացված են Էքզյուպերիի 5 գիրք, որոնք թարգմանվել են հայերեն և որոնց մասին գուցե քիչ է խոսվել:
«Մարդկանց երկիրը»
«Մարդկանց երկիրը» գրքում տեղ են գտել Էքզյուպերիի՝ տարիների ընթացքում գրած պատմվածքները, խոհագրությունները, հուշերը; Դրանք գրքում ներկայացված են որպես առանձին գլուխներ: Այստեղ տեղ են գտել օդաչուի՝ իր կենսագրության, օդագնացության վերաբերյալ խնդիրների, ընկերների, անապատի, օազիսի, անապատի թափառական ցեղերի կենսակերպի մասին պատմող դրվագներ և մտորումներ։ Ըստ Էքզյուպերիի՝ յուրաքանչյուր մարդու ճակատագիր բացահայտվում է միայն ու միայն շարունակական ինքնահաղթահարման ճանապարհին: Գիրքը հենց այդ ինքնահաղթահարման և ինքնաճանաչողության մասին է։
«Գիշերային թռիչք»
Այս գիրքը պատմում է Էքզյուպերիի՝ Արգենտինայի օդանավակայանի օդաչու և տնօրեն եղած տարիներից։ Սա պատմություն է այն մասին, թե ինչպես են փոստային առաքումներ իրականացնող ավիաընկերության տնօրեն Ռիվիերն ու նրա գործընկերները պայքարում օդաչուներից անիմանալի խիզախում պահանջող գիշերային թռիչքների համար:
«Ռազմական օդաչու»
«Ռազմական օդաչու»-ն ինքնակենսագրական վիպակ է: Այն մի մահապարտի առաքելության պատմություն է, որտեղ իրադարձությունները ներկայացվում են հենց օդաչուի`Էքզյուպերիի կողմից։
«Նամակ պատանդին»
Անտուան դը Սենտ-Էքզյուպերին այս աշխատությունը գրել է լավագույն ընկերոջ՝ Լեոն Վերթի վեպի համար որպես նախաբան: Ստեղծագործությունը տպագրվել է 1943 թվականի հունիսին` «Փոքրիկ իշխանը» վիպակի հետ միաժամանակ: Աշխատությունը բաղկացած է 6 կարճ գլուխներից, որտեղ տեղ-տեղ հիշատակվում է հենց Լեոն Վերթը։ Սա ավելին է, քան պարզապես ընկերոջը հասցեագրված նամակների հավաքածու. սա պոետիկ լեզվով և խորը փիլիսոփայությամբ գրված ստեղծագործություն է, որն, անշուշտ, արժե ընթերցել։
«Միջնաբերդ»
Էքզյուպերիի այս աշխատությունն անավարտ է և տպագրվել է հեղինակի մահվանից հետո`1948 թվականին։
«Միջնաբերդ»-ը ավելի շուտ փիլիսոփայական ակնարկ է՝ առանց հատուկ սյուժեի և փիլիսոփայական տերմինաբանության, ինչն ավելի է հեշտացնում ընթերցանությունը։ Գրքում հիմնականում ներկայացված են Էքզյուպերիի փիլիսոփայական գաղափարները մարդկային կյանքի իմաստի և ինքնաճանաչողության վերաբերյալ։
Նյութի հեղինակ՝ Ֆլորա Օհանյան
Դիտեք ավելին Հետաքրքրի մասին բաժնում
մեկնաբանություններ