Գրիգոր Բալասանյան «Ով հանգցրեց լույսը»

2014-08-21 5182

► Կայարան: Սովորական եռուզեռ: Բաժանման արցունքներ, ժպիտ ու ծիծաղ: Միայն մեկը, երիտասարդ մի կին, մենակ է այդ հոծ բազմության մեջ: Կանգնել է վերջին վագոնի դռան առաջ ու ասես տատանվում է՝ բարձրանա՞լ, թե՞ ետ դառնալ: Գուցե սպասում է ինչ-որ մեկին, բայց սպասողի նման չէ. չի նայում չորս կողմը, հայացքը գետնին է հառած: Ինքնամփոփ, մենակ, թվում է՝ մարդկանց մեջ չի, այլ հեռու անմարդաբնակ մի կղզում: Չի լալիս, բայց արցունքները գլորվում են, ասես տիրոջից անկախ, առանց նրա գիտության ու համաձայնության... Խփեց հերթական զանգը: Իսկ երիտասարդ կինը կանգնած էր նույն անշարժ վիճակում՝ լուռ ու ինքնամփոփ: Հետո, ասես ինքն իրեն հարկադրելով, բարձրացավ վագոն: Վերջին աստիճանի վրա ետ շրջվեց, նայեց մոլորված հայացքով: Քիչ հետո ուրվագծվեց մի պատուհանի առաջ ու այլևս չերևաց: Շարժվեց գնացքը: Հևիհև կառամատույց ընկավ մի երիտասարդ..Խելագարի նման աջ ու ձախ էր նայում: Հետո սկսեց վազել դանդաղ շարժվող վագոնների երկարությամբ: Վազում էր, ու շրթունքներն ինչ-որ բառեր էին շշնջում: Փնտրում էր, կանչում էր մեկին: Հասավ վերջին վագոնին, ու մի կիսաբաց պատուհանում խաչաձևվեցին նրանց հայացքները. մի վայրկյան միայն, մի ակնթարթ: Վագոնն անցավ: Նույն պատուհանից մի ձեռք դուրս սահեց. հրաժեշտի շարժում, ու ձեռքն անօգնական կախվեց պատուհանից... Արագացավ գնացքի ընթացքը: Գնա՜ց: Տարա՜վ...

► Ի՞նչ բան է այդ ընտանիք կոչվածը, ինչու՞ ոմանք կառչում են ընտանիքի փեշից, ամենածանր պայմաններում անգամ պահել են ուզում այն, քայքայման, տարրալուծման հեռանկարն անգամ նրանց սարսափ է պատճառում, իսկ շատերի համար բաժանվելը մի բաժակ ջուր խմելու նման բան է:

► Դժվար է մարդուն ճանաչել, նրա հոգու խորքերը ներթափանցել, շատ է դժվար, ոչ մեկն այն չի բացում մինչև վերջ...չբացված գիրքնել ինչպե՞ս կարդաս...

► Մարդ ամենից առաջ իր աչքում չպետք է ստորանա, թե չէ մարդիկ մեկը տեսնում, տասը՝ չեն նկատում, տասը՝ լսում, մեկին են հավատում: Մարդու ամենաանաչառ դատավորն իր խիղճն է:

► Ես գնում եմ` սրտիս մեջ տանելով մի ջերմ ու քաղցր զգացում, և այդ զգացումն է ինձ կապում կյանքի հետ. նրա օգնությամբ է, որ ես պիտի փորձեմ նոր կյանք ապրել...

Հ.Գ. Եթե դուք ունեք մեջբերումներ` դուրս բերված այս գրքից, ապա կարող եք ուղարկել մեզ հետադարձ կապով:

Դիտեք ավելին Մեջբերումներ Գրքերից բաժնում

մեկնաբանություններ