Գրողներ, որոնք ունեցել են ոչ պակաս հետաքրքիր կյանք, քան իրենց գրքերն են | Ներկայացնում է Գրքամոլը

Գրողներ, որոնք ունեցել են ոչ պակաս հետաքրքիր կյանք, քան իրենց գրքերն են:

Ներկայացնում է Գրքամոլը:

Էռնեստ Հեմինգուեյ. «Կորուսյալ սերնդի» վառ ներկայացուցիչներից մեկը: Հեմինգուեյը եղել է շտապ օգնության վարորդ առաջին աշխարհամարտի ժամանակ: Նա ամբողջ կյանքում տրվել է հարբեցողությանը՝ ապրելով Փարիզում որպես ամերիկացի ներգաղթյալ: Ամուսնացել է չորս տարբեր կանանց հետ և երկու անգամ ավիավթարի է ենթարկվել Աֆրիկայում՝ հազիվ փրկվելով մահից: Ավարտել է իր կյանքը ինքնասպանությամբ, իր իսկ սիրելի ատրճանակով, Այդահոյի իր իսկ տանը: Ենթադրվում է, որ ուենցել է գենետիկ հիվանդություն, որը ժամանակի ընթացքում հանգեցրել է նրա մտավոր և ֆիզիկական վիճակի վատթարացմանը:

Ջեկ Լոնդոն. Լոնդոնը համարվում է աստղագետ և լրագրող Ուիլյամ Չեյնի ապօրինի որդին: Իր կյանքի ընթացքում նա եղել է Կալիֆորնիայի ձկնորսական նավատորմի անդամ, լուսաբանել է ռուս-ճապոնական պատերազմը և մեքսիկական հեղափոխությունը: Մի քանի տարի ապրելով Լոնդոնի արևելյան ծայրամասում՝ գրել է «Անդունդի մարդիկ» սոցիալական ակնարկը, որտեղ նկարագրվում է ավելի քան հինգ հարյուր հազար ծայրահեղ աղքատ լոնդոնցիների կյանքը: Այն տպագրվել է 1903 թ.-ին: Լուրեր են պտտվել, որ Լոնդոնը ինքնասպան է եղել, բայց նրա մահվան վկայականը փաստում է, որ մահվան պատճառ է հանդիսացել ուրեմիան՝ ցավալի հիվանդություն, որը առաջանում է երիկամների քարերից:

Էդգար Ալան Պո. Պոյի ողջ կյանքը լի է առեղծվածով: Ասում են, որ նա իր ստեղծագործությունները գրում էր ցաքուցրիվ և գրեթե անընթեռնելի, ինչն էլ շատ հաճախ խոչընդոտում էր նրա ստեղծագործությունների տպագրմանը և «խելագարության» էր հասցնում խմբագիրներին: Ֆինանսական ոչ բարվոք վիճակը հետապնդել է նրան ողջ կյանքի ընթացքում:
Ինչ վերաբերում է նրա վախճանին, դա մինչև օրս էլ պարուրված է առեղծվածով, և ոչ ոք հստակ չգիտի, թե ինչ է տեղի ունեցել նրա կյանքի վերջին օրերին: Շատերը մատնացույց են անում հարբեցողությունը, որոշները՝ կնոջ մահը, սակայն 1849 թ.-ի հոկտեմբերի 7-ի մահվան հանգամանքները մինչ այսօր պարզված չեն: Ավելին, Պոյի մահվան վկայականը մինչ օրս այդպես էլ չի հայտնաբերվել: