Գրքամոլ Ակումբ. Խումբ Յոթերորդ. Հանդիպում VII. Ալբեր Կամյու «Ժանտախտը»
2020-04-18 1222
Արտակարգ դրության պայմաններում շարունակվում են «Գրքամոլ» ակումբի 7-րդ խմբի թեժ ու հետաքրքիր քննարկումները: Առցանց հանդիպման առիթ էր հանդիսացել ֆրանսիացի փիլիսոփա, գրող և լրագրող Ալբեր Կամյուի «Ժանտախտը» վեպը, որի բովանդակությունը ֆաշիզմի և նացիզմի դեմ եվրոպական դիմադրությունն է, և ժանտախտ ասելով՝ Կամյուն ի նկատի ուներ Երկրորդ համաշխարհային պատերազմը: Ստեղծագործությունից զատ անչափ հետաքրքիր անդրադարձ եղավ անմիջապես հեղինակի մասին հետաքրքիր փաստերին, ինչպես նաև անձնական և ստեղծագործական կյանքին: Պետք է նշել, որ այս ամենի վերաբերյալ կատարված խմբային աշխատանքները նոր գույն են փոխանցում քննարկումներին: Թագավարակի առկայության պայմաններում դիպուկ ընտրված ստեղծագործություն էր «Ժանտախտը», քանզի այս օրերին ստեղծված իրավիճակը հնարավորություն տվեց ավելի լավ պատկերացնել յուրաքանչյուր դետալ՝ կապված գրքում առկա համաճարակ կոչված չարիքի նկարագրի հետ: Եղան մի շարք համեմատականներ, որոնք բովանդակության, տողերի խորքային ընկալման ու մեկնաբանությունների ցայտուն արդյունք հանդիսացան: «Ժանտախտը» նմանեցվեց մի մեծ գազանի, որ իր հսկայական սև ստվերով պատել է ամբողջ քաղաքը և վնասում է նրան տարբեր ուղղություններից՝ խախտելով մարդկանց անդորրը, բնականոն կյանքը, վերցնելով հազարավոր կյանքեր, փոխելով հարյուրավոր ճակատագրեր, բայց և այնպես, տալով բազմաթիվ՝ խղճի, համախմբվելու, միմյանց օգնելու, արժևորելու դասեր: Գրքից մեջբերվեցին շատ ու շատ հատվածներ, տողեր, որոնք պահանջում էին իրենց ուրույն վերլուծություններն ու բացատրությունները: Դե իսկ մեր խմբի անդամները ճիշտ և ճիշտ դրա վարպետներն են: Եվ չնայած առցանց քննարկման արդյունավետությանը, խումբն անհամբեր սպասում է, որ հաջորդ քննարկումն արդեն տեղի ունենա Ավ. Իսահակյանի անվան գրադարանում՝ ջերմ ու կարոտած գրկախառնությունների հույսով:
Հանդիպման բոլոր նկարներն՝ այստեղ:
Դիտեք ավելին Գրքամոլ Ակումբ բաժնում
մեկնաբանություններ