Գրքամփինգ դեպի Հովհաննես Թումանյանի հայրենիք
2022-10-23 1012
Ամառվա վերջին ամիսն էր, երբ Գրքամոլ Ակումբը կազմակերպեց իր հերթական ԳրՔամփինգը դեպի Դսեղ աշխարհ։ Անմոռանալի երկու օրեր՝ հագեցած թումանյանական մտքերով և աուրայով։ Գրքամփինգը սկսվեց դեպի Հովհաննես Թումանյանի տուն-թանգարան այցով, որտեղ մասնակիցները ծանոթացան այն տանը, որտեղ գրողն անցկացրել էր իր մանկությունն ու պատանեկությունը, լսեցին հետաքրքիր պատմություններ նրա անձնական և ստեղծագործական կյանքից։ Գրողի տան երկրորդ հարկում մասնակիցներն անցկացրին շրջանաձև ընթերցանություն, որի ժամանակ կարդացին և վերլուծեցին «Թմկաբերդի Առումը» պոեմը։ Հաջորդ ուղղությունը Դսեղ գյուղի Ծովեր լիճն էր, որտեղ ակումբականները իրենց վրաններն ամրացնելուց հետո քննարկեցին մեծ գրողի «Հազարան Բըլբուլ» պոեմը և վեր հանեցին այն ամբողջ գաղափարախոսությունը, որը մեծ գրողը ուզեցել էր փոխանցել հայ ազգին։ Իսկ օրվա երեկոն կախարդական էր՝ համեմված Թումանյանի մասին զրույցներով և տարբեր կիթառային երգերով։
Հաջորդ օրը ակումբականներն այցելեցին «Գիքորի Աղբյուր», որտեղ նրանց ուղեկցում էր հենց Գիքորի դերակատար Ալբերտ Ղուլինյանը, ումից ակումբականները լսեցին հետաքրքիր պատմություններ ֆիլմի ստեղծման ընթացքի և նկարահանումների մասին, նաև տեղի ունեցավ փոքրիկ քննարկում, որտեղ խոսվեց Թումանյանի «Գիքորը» ստեղծագործության և համանուն ֆիլմի տարբերությունների մասին։ Իսկ երթուղին ավարտվեց Դսեղ գյուղում գտնվող Բարձրաքաշ Սուրբ Գրիգորի վանք այցով, որտեղ մասնակիցները ծանոթացան 13-րդ դարի հրաշագեղ կոթողին։
Հ.Գ. Հանդիպման բոլոր նկարներն՝ այստեղ:
Դիտեք ավելին Գրքամոլ Ակումբ բաժնում
մեկնաբանություններ