Համո Մուրադյան «Քո Խիղճը»

2019-02-05 5258

Քո խիղճը...քո խիղճը օրերիդ արթնացումից հետո քեզ տանջող ցավն էր, արածիդ ու չարածիդ համար ափսոսանքը, կոկորդիդ անդադար սեղմվելը, երբ էլ ուժ չունեիր պայքարելու, երբ դիմացդ անդունդ էր, իսկ ետևիդ կամուրջներն անվերադարձ այրված: Խիղճը բռնությամբ քնեցրածդ սերն էր, որ սպանեցիր էնպես, ինչպես հարազատ երեխային են խեղդելով սպանում. խիղճը կործանումդ էր, գահավիժումդ, դանդա՜ղ, քայլ-քա՜յլ, երբ չէիր նկատում, թե ոնց ես կորցնում ամեն ինչ: Խիղճդ վաղուց ճաշակած պարտությանդ դառը համն էր, որ հետո պիտի զգայիր, քանի որ արևն այն ժամանակ դեռ մայրամուտի պահին էր, իսկ սպասվող երեկոն՝ այնքա՜ն խոստումնալից: Իսկ խոստումներդ դատարկ էին, որոնք ուղեղիդ մեջ մեխված քիչ-քիչ ջնջելու էին նրանում առկա բոլո՜ր կապույտ գույները... Խիղճդ գիշերները անկողնում մենակ պառկած ցնցվող ուսերդ էին, անձայն հեկեկոցդ, երբ կաթիլ-կաթիլ քեզնից հեռանում էր այն, ինչ մի ժամանակ հարազատդ էր: Խղճիդ անունը հուսահատություն էր, ազգանունը՝ բաժանում, երբ քեզնից բաժան-բաժան պիտի լիներ էն, ինչը քո միսն ու արյունն էին: Խիղճդ հուզմունքից խոսել չկարողանալդ էր, երբ կյանքը դիմացդ կանգնած քեզնից հաշիվ էր պահանջում, իսկ պատասխանդ՝ սարսափեցնող լռություն էր...
Ու կանգնած էիք իրար դիմաց՝ դու ու խիղճդ, դու, գլխիկոր, որ այլևս չես լսելու, թե նա ինչպես է ծիծաղում, ու խիղճդ, որ բռունցքները սեղմած զուսպ կանգնած էր՝ պատրաստ երեսիդ տալու թռուցիկ վայրկյաններիդ տաք հիշողությունները: Խիղճդ վերջացած ամեն ինչդ էր, երբ փոխել ինչ-որ բան անիմաստ էր, քանզի բարեկեցիկ կյանքի երազները, որ մի ժամանակ երկուսով էիք փայփայում, հիմա փշուր-փշուր էին եղել ձեր ոտքերի տակ...
Ու այսպես խղճիդ հետ ստիպված դարձաք մենության ընկերներ՝ ձեռք ձեռքի տված, կապված միմյանց հետ հավերժական թելով, քանի որ հանգամանքների բերումով ջնջել էիր առաջվա երազանքդ, իսկ զղջումդ ուշացել էր, նախկին կյանքդ՝ ետևում մնացել, իսկ նոր ծնվող հույսերդ անորոշ էին, որովհետև հասկացել էիր, որ բորբոքված սերը սառեցնելուց հետո երբեք չէր ստացվելու նորից ջերմացնելը...

* * *

Իսկ հիշու՞մ ես, թե ինչ տաք էին ձմեռային երեկոները, ու ինչքան շատ թռչուններ կային մեր երկինքներում...

 

Հեղինակ՝ © Համլետ Մուրադյան
Հեղինակի մյուս ստեղծագործություններն այստեղ:

Դիտեք ավելին Ստեղծագործություններ բաժնում

մեկնաբանություններ