Գրքամոլ Ակումբ. Քննարկում հինգերորդ. Իվան Տուրգենև «Հայրեր և զավակներ»
2014-10-27 4132
Հոկտեմբերի 24-ին Ավ. Իսահակյանի գրադարանում տեղի ունեցավ «Գրքամոլ ակումբի» հերթական սպասված հանդիպումը: Գրականության նվիրյալների կողմից այս անգամ ևս բավական ջերմ ու հաճելի մթնոլորտում քննարկվեց ռուս դասական Իվան Տուրգենևի «Հայրեր և զավակներ» ստեղծագործությունը: Ինչպես նախորդ, այնպես էլ այս անգամ ռուս գրականությունից ընտրված գիրքը հնարավորություն է տալիս մեր ակումբի մասնակիցներին ավելի մոտիկից ծանոթանալ ռուս հեղինակների գործերին և զգալ նրանց շունչը, անգամ համեմատություններ տանելով և նմանություններ տեսնելով տարբեր գրքերի հերոսների և դեպքերի միջև: Հանդիպման սկզբում արդեն ավանդույթ դարձած կերպով ներկայացվեց հետաքրքիր փաստեր ու տեղեկություններ գրողի, ստեղծագործության և Տուրգենևի կողմից ներկայացված փիլիսոփայության ճյուղերից մեկի՝ նիհիլիզմի գաղափարի մասին: Յուրաքանչյուր մասնակցի կարծիքը լսելուց ու ընդհանուր քննարկումից հետո անդամները բաժանվեցին խմբերի և քննարկեցին վեպի գլխավոր հերոսների դրական ու բացասական գծերը, որը շուտով մենք կներկայացնենք մեր գրքամոլ հասարակությանը: Գիրքը, որը կարելի է համարել ռուս գրականության փայլուն ստեղծագործություններից մեկը, անչափ սիրվեց ակումբի մասնակիցների կողմից և վստահաբար դասվեց իրենց ԿԱՐԴԱՑԱԾ գրքերի ցանկին: Հաջորդ հանդիպումը նախատեսվում է անցկացնել նոյեմբերի 4-ին, որի ընթացքում կկազմակերպվի հանդիպում-քննարկում ժամանակակից հայ գրող Դիանա Համբարձումյանի հետ:
Դիտեք ավելին Գրքամոլ Ակումբ բաժնում
մեկնաբանություններ