Քննարկում Արմեն Աշոտյանի հետ. Հենրի Միլեր «Խեցգետնի արևադարձը»

2014-12-04 4010
Դեկտեմբերի 2-ին The Club ակումբում մեկնարկեց Հայաստանի ժամանակակից արվեստների միության «Խորհուրդ են տալիս հայտնիները» նախագիծը, որի նպատակն է հայ ընթերցասերներին համախմբել ամենահաճելի զբաղմունքի՝ ընթերցանության վրա: Միջոցառման անդրանիկ հյուրն էր ՀՀ կրթության և գիտության նախարար Արմեն Աշոտյանը, քննարկվում էր Հենրի Միլերի «Խեցգետնի արևադարձը» գիրքը: Նախարարը սկզբում հանդես եկավ ողջույնի խոսքով, ապա իր կարծիքը արտահատեց գրքի վերաբերյալ. - Չի կարելի շեշտը դնել միայն սեռականը նկարագրող հատվածների վրա, գրքի արժեքն ընդգրկում է շատ ավելի լայն շրջանակ, իսկ առհասարակ ով չի կարդացել գիրքը, թող իրեն թույլ չտա ուրիշից լսած կարծիքը հրապարակավ արտահայտել,- իր խոսքում համոզված էր պարոն Աշոտյանը: - Եթե «գերազանցիկի» հոգեբանությամբ եք կարդալու այդ գիրքը՝ ասելու համար, որ կարդացել եք, ավելի լավ է չանեք այդպիսի բան, իսկ եթե դուք ձեր կյանքում ունեցել եք ապրումներ, սիրել եք, բաժանվել, դավաճանվել, ներել, մոռացել, ապա «Խեցգետնի արևադարձը» ձեզ հոգեհարազատ կթվա և գուցե սիրելի գրքերից մեկը դառնա»: Սրան հաջորդեց ընթերցողների և նախարարի միջև հարց ու պատասխանը: Քննարկումը բուռն էր. կարծիքները՝ բազմաթիվ և հակասական: Ընթերցողների մեծամասնության տեսակետից այնուամենայնիվ պարզ դարձավ, որ մինչ այժմ էլ հասարակության մի ստվար զանգված գիրքը չի ընդունում և չի կարող ընդունել որպես գրական արժեք և քննադատաբար է վերաբերում դրա տարածմանը հայ իրականության մեջ, սակայն մի մասն էլ համաձայնվեց պարոն Աշոտյանի կարծիքի հետ ու Միլլերի գիրքը դասեց իր սիրելի գրքերի ցանկին: Հանդիպման ևս մեկ առավելություն էր այն, որ ընթերցասերների մի մեծ բանակ՝ լսելով մյուսների կարծիքները, իր համար արեց նորանոր բացահայտումներ գրքի վերաբերյալ՝ որոնք որ նա չէր նկատել գիրքը առանձին ընթերցելիս և սովորեց մյուս կարդացողներին լսելով: Քննարկմանը մասնակցում էին նաև «Գրքամոլ ակումբի» անդամները, ով հանդիսանում է «Խորհուրդ են տալիս հայտնիները» նախագծի ինֆորմացիոն հովանավորներից: Հ.Գ. Հաջորդ հանդիպումը տեղի կունենա դեկտեմբերի 4-ին, որտեղ Ստյոպա Սաֆարյանի հետ կքննարկվի Միշել Ուելբեքի «Տարրական մասնիկներ» գիրքը: Ջուլիա Եղիազարյան

մեկնաբանություններ