Կուրթ Վոնեգութ | քանի դեռ կյանքը ձեզ դուր չի գալիս՝ այն անցնում է․․․ |ԽՈՐՀՈՒՐԴՆԵՐ|

Հարգելի՛ շրջանավարտներ, արևապաշտպան քսուքներ օգտագործեք։

Եթե ապագայի համար ես ընդամենը մեկ խորհուրդ տալու հնարավորություն ունենայի, այն հենց արևապաշտպան քսուքների մասին կլիներ։ Այն օգտագործելու արդյունավետությունը ապացուցել են գիտնականները: Պետք է նշել, որ իմ մնացյալ բոլոր խորհուրդները ավելի ամուր հիմքեր չունեն, քան սեփական շփոթեցնող փորձը։

Հենց այդ խորհուրդներն էլ հիմա կտամ ձեզ․․․

Վայելե՛ք ձեր երիտասարդության ուժն ու գեղեցկությունը․ քանի դեռ կյանքը ձեզ դուր չի գալիս՝ այն անցնում է։ Հավատացե՛ք ինձ, քսան տարի անց նայելու եք ձեր նկարներին և վերհիշելու եք զգացողությամբ, որը այս պահին, սակայն, չեք կարողանում հասկանալ. և որքան հնարավորություններ էին բացվել ձեր առաջ և իրականում ինչ հեքիաթային տեսք ունեիք այն ժամանակ։

Ձեր քաշն այնքան շատ չէ, որքան ձեզ է թվում։

Մի՛ անհանգստացեք ապագայի համար. կամ, լավ, անհանգստացե՛ք, բայց իմացե՛ք, որ այդ անհանգստությունները նույնքան էֆեկտիվ են, որքան մաստակ ծամելու միջոցով հանրահաշվական հավասարում լուծելու փորձերը։ Իրական անհաջողությունները երբևէ ձեր անհանգիստ մտքով չեն անցնում։

Ի՞նչն է ձեզ վախեցնում. ամեն օր մի փոքր զբաղվեք դրանով:

Երգե՛ք։

Զգո՛ւյշ վարվեք ուրիշի սրտի հետ։

Մի՛ հաշտվեք նրա հետ, ով անտարբեր է ձեր սրտի նկատմամբ։

Մի՛ մոռացեք ատամները լվանալ։

Ժամանակ մի՛ ծախսեք նախանձի վրա․ երբեմն դուք առջևում եք, երբեմն՝ հետևում։ Մրցավազքը երկար է և ի վերջո, դուք այն ինքներդ ձեզ հետ եք վարում։

Հիշե՛ք ձեր հասցեին հնչած հաճոյախոսությունները և մոռացե՛ք վիրավորանքները։ Եվ եթե հաջողվի, խնդրում եմ ինձ ասեք՝ այդ ինչպե՞ս։

Պահպանե՛ք ձեր հին սիրային նամակները և դե՛ն նետեք բանկային հին քաղվածքները։

Պարբերաբար մարզե՛ք ձեր մարմինը։

Ձեզ մեղավոր մի՛ զգացեք, եթե չիմանաք, թե ինչ անել ձեր կյանքի հետ։ Իմ ճանաչած ամենահետաքրքիր մարդիկ քսաներկու տարեկանում գաղափար անգամ չունեին, թե ինչպես են ուզում ապրել իրենց կյանքը։ Ընդ որում, նրանցից ամենահետաքրքիրները՝ քառասուն տարեկանները, մինչև օրս դա չգիտեն։

Կալցիում շատ օգտագործեք։

Հո՛գ տարեք ձեր ծնկներին։ Դրանց կարիքը շատ կզգաք, երբ շարքից դուրս գան։

Գուցե ամուսնանաք, գուցե ոչ։ Գուցե երեխաներ ունենաք, գուցե ոչ։ Գուցե քառասունում ամուսնալուծվեք, գուցե հակառակը՝ փոքրիկ բադիկների պարը պարեք ամուսնության յոթանասունհինգամյակին։

Ինչ էլ որ անեք, ձեզ չափից շատ մի՛ գովեք։ Բայց նաև մի՛ փնովեք։ Ձեր ընտրությունը, ինչպես բոլորի մոտ, կիսով չափ պահի ազդեցությունից է։

Վայելե՛ք ձեր մարմինը։ Օգտագործեք այն, ինչպես կկարողանաք։ Եվ մի՛ վախեցեք ինչ են ուրիշները մտածում այդ մասին։ Ձեր մարմինը ամենահրաշալի գործիքն է, որ դուք երբևէ կունենաք։

Պարե՛ք։ Նույնիսկ եթե միակ պարելու վայրը ձեր հյուրասենյակն է։

Եվ խնդրում եմ՝ մի՛ կարդացեք գեղեցիկ կյանքի մասին ամսագրեր։ Դրանք միայն ստիպելու են ձեզ զզվելի զգալ։

Բարեհամբույր եղեք ձեր քույրերի և եղբայրների հանդեպ։ Նրանք անցյալի հետ ձեր լավագույն կապն են, և հենց նրանք են, որ հավանաբար ձեզ հետ կլինեն ապագայում։

Հիշե՛ք, որ ընկերները գալիս ու գնում են, բայց մի քանի թանկարժեք ընկերոջ պետք է պինդ պահել։

Ջանք մի՛ խնայեք կենսագրության մեջ և կյանքում հանդիպող բոլոր խզումները հաղթահարելու համար։ Քանի որ որքան մեծանաք, այնքան ձեզ պետք են գալու այն մարդիկ, որոնց ճանաչել եք, երբ երիտասարդ էիք։

Մի որոշ ժամանակ ապրեք Մոսկվայում, բայց հեռացեք ավելի շուտ, քան այն ձեզ կարծր կդարձնի։

Մի որոշ ժամանակ ապրեք Բալի կղզում, բայց հեռացեք ավելի շուտ, քան այն ձեզ փափուկ կդարձնի։

Եվ ընդհանրապես, ճափորդե՛ք։

Մի քանի անխուսափելի ճշմարտություններ հիշեք․

• Գներն աճելու են,
• Քաղաքական գործիչները դավաճանելու են իրենց կանանց,
• Դուք էլ եք ծերանալու և երբ ծերանաք, երևակայելու եք, որ ձեր ժամանակ գները խելքին մոտ էին, որ քաղաքական գործիչները ազնվականներ էին, և որ երեխաները հարգում էին մեծերին։

Ի դեպ, հարգե՛ք մեծերին․ դուք երբեք չգիտեք, երբ են նրանք ընդմիշտ հեռանալու։

Հույս մի՛ ունեցեք, որ ինչ-որ մեկը ձեզ ապահովելու է։ Հնարավոր է՝ ձեր սեփական ներդրումային ֆոնդն ունեք, հնարավոր է՝ ձեր ամուսինը կամ կինը հարուստ է, բայց դուք չգիտեք, թե ով և երբ ձեզ կլքի։

Ձեր մազերի վրա շատ փորձարկումներ մի արեք, հակառակ դեպքում քառասուն տարեկանում դրանք ութսունհինգ տարեկանի տեսք կունենան։

Մենք բոլորս մի օր մեռնելու ենք։ Կարևոր է վերջնակետին հասնել ինչ-որ բանի հավատալով։ Եվ հենց սա է ամենադժվարը, քանի որ թվում է, թե ոչինչ էլ չկա, որին, հիրավի, կարելի է հավատալ։

Ահա այսպիսի խորհուրդներ, հարգելի՛ շրջանավարտներ։

Բայց զգույշ և համբերատար եղեք նրանց հանդեպ, ովքեր ձեզ խորհուրդներ են տալիս։ Խորհուրդը կարոտախտի տեսակ է։ Խորհուրդը աղբակույտի միջից անցյալը որսալու միջոց է, տհաճ պահերը թարմ ներկերով ներկելու և դրանք եղածից ավելի թանկ մի բան դարձնելու փորձ։

Բայց այն, որ արևապաշտպան քսուքները իսկապես փրկում են մաշկը այրվելուց, ապացուցել են գիտնականները։

Այնպես որ, համարձակորեն օգտվեք արևապաշտպան քսուքներից։

1995

Թարգմանեց՝ Հասմիկ Մելիքսեթյանը