Լիլի Մկրտչյան | թվԱնցյալ

2020-03-01 1169

Անցած լինի․
վատնված հինը,
չշահած հետոն էլ։

Մատներիցդ պոկածս ծխահոտը,
որ հիմա էլ սովորությունդ չէ,
անցած լինի։

Բացածդ դուռը,
որով չանցա,
ու թողածս բանալին,
որ չվերադարձրիր,
անցած լինի։

Խարխուլ ակնարկն ու
չմեկնված խոսքը,
կիսատ թողածդ
անցած լինի։

Էն կեռը,
որ շուրթիդ ժպտալն է հուշում,
որ երբեմն դեռ հիշում եմ,
անցած լինի։

Ու դու,
թվացյալ մտերիմս,
երբեմնի սիրելիս,
անցած լինես։

Հեղինակ՝ © Լիլի Մկրտչյան

Դիտեք ավելին Ստեղծագործություններ բաժնում

մեկնաբանություններ