Մուրացան «Գևորգ Մարզպետունի»

2023-01-11 26142

► Ազգերի զորությունը ընտանիքների մեջ է: Զորավոր է այն ազգը, որն ունի զորավոր ընտանիքներ, սիրով, միությամբ, առաքինի և հավատարիմ կենակցությամբ ապրող ընտանիքներ: Այն գեղջուկ խրճիթները, որոնց մեջ ապրում են ցնցոտիներով ծածկված մանկտիք, որոնց շատ անգամ արհամարհում են մեծամեծ իշխաններ, նույնիսկ դրանք են, որ ամփոփում են իրենց մեջ հայրենիքի ուժը: Սիրեցե՛ք միմյանց, այդ սերը կերջանկացնի ձեզ և ձեր զավակներին:

► Աշոտը Սևադայի աչքերն է կուրացրել, բայց իմ՝ սիրտը: Կույր աչքը կարող է ներել, բայց կույր սիրտը չի ների:

► Ես զարմանում եմ, որ զույգ աչքերից զրկված մարդը ներում է չարագործին, իսկ ես չեմ ներում:

► Չդատապարտեք այն մարդուն,որ ճշմարտությունը խոսելու չափ քաջություն ունեցավ:

► Ամեն լեզու իրավունք ունի ճշմարտությունը խոսելու:

► Չկա մի սուտ, որ հանցանք չհամարվի, և չկա մի հանցանք, որ անպատիժ չմնա:

► Մենք թշվառ խաղալիքներ ենք բնության հզոր ձեռքում:

► Ամեն մեծ գործ, նախ փոքրով է սկսվում:

► Մեր վշտերը կմեղմանային, եթե ընկեր մարդիկ կարողանային նրանց էությունն ըմբռնել:

► Օձը միշտ պիտի խայթե, քանի մականը չէ ջախջախել նրա գլուխը:

► Ազատ հոգին չի բռնանալ ընկերոջ ազատության վրա:

► Չուրախանամ իսկ, չպիտի խանգարեմ ուրիշների ուրախությանը:

► Ինչու՞ աստված մարդուն տալիս է երջանկություն և հետո խլում է այն նրանից:

► Ինձ թվում էր, թե այլևս սեր չկա ոչ մի տեղ: Մեր սերը չորացավ: Բայց ահա հենց այդ չորացած ծառի մոտ ես տեսնում եմ մի դալար բողբոջ՝ ոստիկներով ու տերևներով զարդարուն: Այո՛, սերը չի մեռել աշխարհում:

► - Մենք միայնակ ենք. "Մի ձեռը ծափ չի տա, մի ծաղկով գարուն չի գա"-ասաց սեպուհը: - Իսկ ես կասեմ, որ "մի ձեռը ծափ կտա և մի ծաղկով գարուն կգա": Հաստատուն կամքի և անձնվեր աշխատության առաջ անկարելի ոչինչ չկա,- վստահ պատասխանեց Մարզպետունին:

► Երդվում եմ ձեր առաջ, երդվում եմ իմ հայրենիքի անունով և այս սուրբ գերեզմանով, որ ես չեմ վերադառնա իմ հարկի տակ, իմ ընտանյաց գիրկը, մինչև վերջին հագարացուն չհալածեմ հայրենի սահմաններից: Պիտի ապացուցեմ, որ հայրենիքի ուժը նրա որդիների անձնվիրության մեջ է:

 Հ.Գ. Եթե դուք ունեք մեջբերումներ` դուրս բերված այս գրքից, ապա կարող եք ուղարկել մեզ հետադարձ կապով:

Դիտեք ավելին Մեջբերումներ Գրքերից բաժնում

մեկնաբանություններ