Գրքամոլ Ակումբ. Խումբ Երկրորդ. Քննարկում երրորդ. Էրիխ Մարիա Ռեմարկ «Երեք Ընկեր»

«Գրքամոլ»-ի նորակազմիկ ընտանիքը` ակումբի երկրորդ խումբը,  հոկտեմբերի 17-ին հերթական անգամ համախմբվելու առիթ ունեցավ: Այս անգամ «մեղավորը» Էրիխ Մարիա Ռեմարկն էր, իսկ «թիրախում»` նրա «Երեք ընկեր» վեպը  (1936թ.): Ավ. Իսահակյանի անվան գրադարանի արդեն հարազատ դարձած դահլիճում նախաձեռնության անդամները ստեղծել էին բուռն քննարկման մթնոլորտ: Գրքամոլցիները Ռեմարկի վեպը զուգադրեցին նախ նրա կենսագրության հետ` համոզմունք հայտնելով, որ գրողի կյանքը մեծապես իր արտացոլումն է գտել նրա այս և մյուս գործերում: Օրինակ` Ռեմարկի կինը` Իլզե Յուտտա Զամբոնան, տառապում էր թոքախտով. ապագայում նա նախատիպ դարձավ «Երեք ընկեր» վեպի հերոսուհի Պատի համար: Խմբի անդամները Ռեմարկի վեպը դիտարկեցին երեք հիմնական տեսանկյունից` որպես կորուսյալ սերնդի պատմություն, երեք ընկերոջ, նրանց նվիրական հարաբերությունների և վերջապես` որպես սիրո պատմություն: Նրանք, ովքեր կարդացել էին հեղինակի «Հաղթական կամար» վեպը, որոշ զուգահեռներ տարան վերջինիս և քննարկվող ստեղծագործության միջև: Քննարկումը եզրափակվեց հետաքրքիր խաղ-առաջադրանքով: Խմբի անդամները բաժանվեցին 4 մասի: Ամեն թիմ ներկայացնում էր վեպի մի հերոսի: «Իրենց մասին» պատմեցին Ռոբբին, Պատը, Լենցն ու Օտտոն: Այս կերպ գրքամոլցիները կերպարային վերլուծություններ արեցին և ավելի լավ ընկալեցին հերոսների էության առանձնահատկությունները: Խմբի անդամները չէին դադարեցնում քննարկումները, և դրանք կարող էին շարունակվել դեռ շատ երկար, սակայն ժամանակն էր անցում կատարելու  հաջորդ գրքին:  Այսպիսով` գրքամոլցիները պատրաստվում են հոկտեմբերի 31-ին կայանալիք  հանդիպմանը` քննարկելու Սեյրան Գրիգորյանի «Ինչու ես տխուր» ստեղծագործությունը:

Հ.Գ. Հանդիպման բոլոր նկարներն՝ այստեղ: