Գրքամոլ Ակումբ. Խումբ Երրորդ. Քննարկում Ութ. Ռիչարդ Բախ «Պատրանքներ»
2017-02-15 5010
Փետրվարի յոթին գրքամոլցիները հանդիպել էին Ավետիք Իսահակյանի գրադարանում՝ քննարկելու Ռիչարդ Բախի «Պատրանքներ» ստեղծագործությունը։ Քննարկումն անցավ ջերմ մթնոլորտում՝ լի տարբեր կարծիքներով։ Քննարկման սկզբում ակումբի անդամները իրենց պատրաստած տեսահոլովակներով ներկայացրին գրողի կյանքը, ստեղծագործությունը, հետքրքիր փաստեր վերջինիս կյանքից, ինչին հաջորդեց գրքի քննարկման բուն փուլը, որն անցավ հակասական կարծիքների բախմամբ։ Բայց ինչպես կասեր Սոկրատեսը՝ հենց հակասություններն են ծնում ճշմարտությունը։ Սրա արդյուքնում գրքամոլցիները դուրս հանեցին ստեղծագործության բուն նպատակը, էությունն ու գաղափարը։ Բախի ստեղծագործության առանցքը միշտ կազմել են բարու հաղթանակը ու հավատը սեփական ուժերի հանդեպ։ Ստեղծագործությունում հնարավոր չէ չնկատել թռիչքը, հենց սա էր այն կետը, որտեղ Բախի կյանքն ու ստեղծագործությունը հատվում էին։ Բազմապիսի կարծիքների արանքում հնչեցին այնպիսիք, որոնցից մեկը ստեղծագործության մեջ տեսավ Բախի անձնական կյանքի մենակությունը, որին հեղինակը նախապատվություն է տվել հանդիպել երկնքում, ոմանք առաջ քաշեցին այն գաղափարը, որ իսկապես մարդիկ լույս աշխարհ են գալիս կոնկրետ միսիայով, որը պետք է իրականացնեն, ոմանք էլ այն կարծիքին էին, որ մարդկային հոգիները նախքան լույս աշխարհ գալն են ընտրում այն վայրը ու ժամանակը, որում պիտի ապրեն։ Ամենատարբեր կարծիքները վկայում են ստեղծագործության արժեքը։ Իրականում Բախն ունեցել է մեկ նպատակ՝ ցույց տալ, որ յուրաքանչյուրս՝ անկախ նրանից մեր փրկչին համարում ենք Քրիստոսին, Բուդդային թե մեկ այլ էակի, կարող ենք հանդիսանալ այդ փրկիչը, եթե ինքներս երևակայենք ու ունենանք այնքան հավատը, որ իրականություն դարձնենք մեր երևակայությունը։ Բախն իր ստեղծագործությունով փորձել է ցույց տալ մարդկանց, որ պետք չէ միայն նայել հրաշքին և այն կոչել անհնարին, այլ պետք է տեսնել հրաշքը՝ կերտելով այն մեր մեջ։ Ինչպես Բախն է նշում իր պատրանքներում ՝ մենք սովորում ենք այն, ինչ արդեն գիտենք, ուրեմն մեզ միայն մնում է հավատալ ինքներս մեզ ու մեր մտքերին, մեր երևակայությանը։ Ինչ է կյանքը, եթե ոչ մեր պատկերացումները կյանքի մասին, ահա սա էր Բախի պատրանքը, երբ նա նույնացնում էր կյանքն ու պատրանքը։ Եվ ահա այս համադրությունը նուրբ հոգու և չբացահայտված երկնքի ծնեցին այն Բախին, ում ստեղծագործությունները պատիվ ունենք վայելել այսօր։
Հանդիպման վերջում ակումբի անդամները լի էին նոր գաղափարներով ու գիտելիքներով, իսկ ընկերական ջերմ մթնոլորտը ուղեկցեց ողջ ընթացքում։
Այսքանով ավարտվեց Գրքամոլ ակումբի երրորդ խմբի երկրորդ մակարդակի առաջին հանդիպումը. հաջորդ քննարկումը կլինի փետրվարի 25-ին, որտեղ կքննարկվի Էդգար Ալլան Պոյի ստեղծագործությունները:
Հ.Գ. Հանդիպման բոլոր նկարներն՝ այստեղ:Դիտեք ավելին Գրքամոլ Ակումբ բաժնում
մեկնաբանություններ