Պուլիցերյան մրցանակի դափնեկիր, դրամատուրգ, սցենարիստ, բանաստեղծ և լիբրետիստ Դեյվիդ Լինդսի-Ըբեյրը հանրաճանաչ «Նապաստակի փոս»^[1] պիեսի հեղինակն է։ Պիեսի պրեմիերան կայացել է 2006թ․-ին Նյու Յորքի Բիլթմոր թատրոնում և մի քանի տարի անց էկրանավորվել։ Համանուն ֆիլմի սցենարային մշակումը նույնպես կատարվել է հեղինակի կողմից, որը բացի վերոնշյալ ստեղծագործությունից, մի շարք այլ ֆիլմերի սցենարների հեղինակ է։

«Նապաստակի փոս» պիեսի հիմքում դժբախտ պատահարի արդյունքում առաջացած ողբերգությունն է, որը և՛ միավորում, և՛ որոշակիորեն հեռվացնում է պիեսի կերպարներին։ Պիեսի ընթացքում նկարագրվում են կերպարներին հանդիպած փորձությունները, վիշտը հաղթահարելու կարողությունը և կյանքի հանդեպ հայացքները անդառնալի պատահարից հետո։

Բեքքա և Հոուի Քորբեթները երջանիկ ամուսնացած զույգ են, որոնց կատարյալ աշխարհը ընդմիշտ փոխվում է, երբ իրենց մանկահասակ որդին՝ Դենին, ավտովթարի զոհ է դառնում: Բեքքան, ով իր կարիերան թողել է հանուն ընտանիքի և դարձել տնային տնտեսուհի, դեպքից հետո փորձում է վերաիմաստավորել իր գոյությունը ընտանիքի և ընկերական շրջապատի օգնությամբ։ Պիեսի ողջ ընթացքում Բեքքան իր հիշողությունից ցանկանում է ջնջել Դենիի հետ կապված պահերը՝ նա ամուսնուն առաջարկում է տեղափոխվել մեկ այլ տուն, որդուց մնացած հագուստը և իրերը տեսադաշտից թաքցնում է և ազատվում այն շնից, որի հետևից վազելիս էր տղան վթարի զոհ դարձել։ Բացի այդ, Բեքքան, իմանալով քրոջ անակնկալ հղիության մասին, սաստիկ դեպրեսիաների և տառապանքների մեջ է ընկնում՝ աշխարհին մեղադրելով իր անձնական դժբախտության մեջ։ Սակայն Ջեյսոնի՝ ավտովթարի հեղինակի այցը Քորբերթների տուն որոշ չափով մեղմացնում է Բեքքայի ցավագին տրամադրվածությունը կյանքի հանդեպ։ Հակառակ սպասելիքներին, կինը չարությամբ լցված չէ 17-ամյա երիտասարդի հանդեպ և նրան չի մեղադրում կատարվածի մեջ։

Հակառակ կնոջ տրամադրվածությանը, Հոուին նպատակադրված է հաղթահարել տրված փորձությունը և փախուստի ուղիներ չի փնտրում։ Բայց Բեքքայի անտարբերությունն ու սառնությունը, անվերջանալի ընտանեկան վեճերը նրան շարունակ հետ են պահում նպատակի իրագործումից և աստիճանաբար կանխորոշում ընտանեկան կյանքի կործանում։ Այնուամենայնիվ, չնայած այս անձնական ողբերգությունից հետո աշխարհի հետ կրկին առերեսվելու միտքը սարսափելի է թվում, բայց նրանք համաձայնում են միասին դիմակայել այդ մարտահրավերներին և պիեսն ավարտվում է զույգի՝ իրենց տուն վերադառնալու տեսարանով, որտեղ նրանք քննարկում են իրենց նախկին հարաբերությունները վերականգնելու ճանապարհներ, որոնք փլուզվել էին Դենիի մահից հետո:

[1] Rabbit hole արտահայտությունն անգլերենում դարձվածք է, որը նկարագրում է խառը, անելանելի իրավիճակ (դարձվածքը եկել է Լուիս Քերոլից)։

© Նյութը պատրաստեց՝ Հենրիետա Ավագյանը