Ջեյմս Թեյթն ամերիկացի բանաստեղծ է, ով հայտնի է իր յուրահատուկ և հեգնական ոճով։ Նա ավելի քան 20 բանաստեղծական ժողովածուների հեղինակ է, որը ներառում է նաև 2018թ․-ին հետմահու հրատարակված «Գավըրմենթ լեյք» ժողովածուն։ Թեյթը պարգևատրվել է Պուլիցերյան մրցանակով «Ընտիր բանաստեղծություններ» ժողովածուհի համար, որում ներկայացված բանաստեղծությունները իր նախորդ ինը գրքերից են:

Թեյթը հաճախ ներկայացնում է աբսուրդիստական սցենարներ և սյուրռեալիստական պատկերներ՝ ցույց տալու կյանքի իռացիոնալությունը: Թեյթն անդրադառնում է ինքնության, ինքնաբացահայտման և կյանքի քաոսի մեջ իմաստի որոնմանը: Նրա բանաստեղծությունները նաև հումորով քննադատում են հասարակական նորմերն ու մարդկային թուլությունները։ Հիշողության, կարոտի և ժամանակի անցման թեմաները սովորական են, ինչպես նաև ժամանակակից կյանքում միայնության և մեկուսացման մասին խորհրդածությունները:

«Ստերի գիրքը»

Կուզեի խոսել
ձեզ հետ։ Հնարավո՞ր է մի րոպե
մենակ մնանք։ Ես ստել եմ
մինչ հիմա։ Կարծում եք՝

հավատու՞մ եմ ինքս ինձ։ Ինքդներդ ձեզ
հավատու՞մ եք ինձ հավատալիս։ Ստելը
բնական է։ Ներեցե՛ք ինձ։ Կարո՞ղ ենք մենակ մնալ
ընդմիշտ։ Ներեցե՛ք մեզ բոլորիս։ Խոսքն

իմ թշնամին է։ Ես երբեք մենակ չեմ եղել․
կաշառք, դավաճանություններ։ Ես նույնիսկ
հիմա եմ ստում։ Հավատու՞մ եք:
Երդվում եմ։

Թեյթի պոեզիայում գերակշռում են ողբերգական, կատակերգական, աբսուրդիստական, հեգնական ու սյուրռեալիստական հայացքները: Paris Review-ին տված իր հարցազրույցում Թեյթը նշել է. «Չկա ավելի լավ բան, քան ընթերցողին խորապես հուզելը: Ես սիրում եմ իմ զվարճալի բանաստեղծությունները, բայց կնախընտրեի կոտրել ձեր սիրտը: Եվ եթե ես կարողանամ երկուսն էլ անել նույն բանաստեղծության մեջ, հիասքանչ կլինի։ Եթե դուք ավելի վաղ ծիծաղել եք բանաստեղծությունը կարդալիս, և վերջում արցունքներ են գալիս, դա լավագույնն է»։

© Նյութը պատրաստեց՝ Հենրիետա Ավագյանը