Մայքլ Շեյբոն «Կավալիերի և Քլեյի անհավանական արկածները»

2024-07-19

Մայքլ Շեյբոնն ամերիկացի վիպասան, էսսեիստ և սցենարիստ է, ով հայտնի է փոխաբերական լեզվի և համաշխարհային առասպելաբանության նրբագեղ կիրառմամբ: Նրա պատմվածքները հաճախ լի են իր իսկ հրեական ժառանգության հղումներով: Վեպերից ու պատմվածքներից զատ՝ Մայքլ Շեյբոնը հեղինակել է մանկական գրքեր, կոմիքսներ և աշխատել կինոսցենարների վրա։ 1988թ․-ից սկսած մինչ օրս բազմաթիվ մրցանակների դափնեկիր է ՝ ներառյալ Օ․ Հենրիի մրցանակ, Նեբուլա մրցանակ լավագույն վեպի համար, Պուլիցերյան մրցանակ գեղարվեստական արձակ անվանակարգում։

Շեյբոնի բազմաբովանդակ ու լայնածավալ գործունեությունն ընդգրկում է 2000թ․-ին հրատարակած «Կավալիերի և Քլեյի անհավանական արկածները» վեպը, որի համար հեղինակն արժանացել է Պուլիցերյան և Ֆոլկների մրցանակների։ Պատմությունը ծավալվում է Երկրորդ համաշխարհային պատերազմին նախորդող ժամանակաշրջանում և շարունակվում է պատերազմի տարիներին և դրանից հետո: Գլխավոր հերոսները երկու հրեա զարմիկներն են, ովքեր ապրում են Նյու Յորքում և հաջողություն են փնտրում զարգացող կոմիքսների բնագավառում: Մեկը հրեա դեռահաս Ջոզեֆ Կավալիերն է, ով պատերազմից առաջ ապրում էր Գերմանիայի կողմից օկուպացված Չեխոսլովակիայում: Դժբախտ պատահարի պատճառով նա իր ընտանիքի միակ անդամն է, ով կարող է արտագաղթել Միացյալ Նահանգներ: Իսկ մյուս զարմիկը Բրուքլինում ծնված գրող Սեմ Քլեյն է:

Սեմ Քլեյը հանդիպում է իր զարմիկ Ջոզեֆ «Ջո» Կավալիերին 1939 թվականին: Նկարիչ Ջոն ու գրող Քլեյը միավորվում են՝ մշակելու կոմիքսների շարք, և նրանց հանձնարարվում է ստեղծել նոր սուպերհերոս։ Ջոն իր վրդովմունքը նացիստների դեմ արտահայտում է «Escapist» (փախչող) կերպարի միջոցով։ Նա օգտագործում է փախչողին որպես նացիստների դեմ պատերազմ վարելու միջոց՝ փախչողին հակադրելով հենց Հիտլերին: Առաջին համարի շապիկին «Escapist»-ը բռունցքով հարվածում է Հիտլերի դեմքին։ Աստիճանաբար «Escapist»-ը հանրաճանաչ է դառնում և խոսվում է «Escapist»-ի մասին ռադիոհաղորդում պատրաստելու մասին։ Խոսակցությունների շրջանակներում Ջորջ Դիսին, խմբագիրը, զարմիկներին տանում է խնջույքի, որտեղ Ջոն հանդիպում է Ռոզա Սաքսին, ում նա հետագայում սիրահարվում է։

Միաժամանակ, Ջոն կրտսեր եղբորը՝ Թոմին Նահանգներ տեղափոխելու ճանապարհ է գտնում, սակայն նավը, որի մեջ եղբայրն էր, ոչնչացվում է գերմանացիների կողմից։ Ջոն, իմանալով պատահարի և չիմանալով Ռոզայի՝ իրենից հղի լինելու փաստի մասին, գնում է ռազմածովային ուժերում զորակոչվելու ու գերմանացիների դեմ կռվելու։ Ջոի մեկնելուց հետո Սեմն ու Ռոզան ամուսնանում են ու մեծացնում փոքրիկ Թոմիին, ով մեծանալուն զուգահեռ կասկածում է՝ արդյո՞ք Սեմն իրեն չի որդեգրել։ Ջոն ի վերջո հայտնվում է ու երեխան իմանում է՝ ով է իր հայրն իրականում, իսկ Սեմը տեղափոխվում է մեկ այլ քաղաք։

© Նյութը պատրաստեց՝ Հենրիետա Ավագյանը

մեկնաբանություններ