10 հետաքրքիր փաստ գրական աշխարհից

1. Երբևէ վաճառված ամենաթանկ գրական աշխատությունը

Երբևէ վաճառված ամենաթանկ գրական աշխատությունը Լեոնարդո դա Վինչիի գիտական նոթատետրերից մեկն է՝ «Լեսթերի կոդեքս»-ը, որը 1994 թվականին տեղի ունեցած աճուրդի ժամանակ վաճառվել է 30.8 միլիոն ԱՄՆ դոլարով։ Գնորդը Բիլ Գեյթսն էր։

2․ Մարգարետ Միտչելը «Քամուց քշվածները» վեպի վրա աշխատել է 10 տարի

Մարգարետ Միտչելը սկսել է գրել «Քամուց քշվածները» վեպը 1926 թվականին՝ երբ բուժվում էր ավտովթարի ժամանակ ստացված վնասվածքներից։ 1935 թվականի ապրիլին Մակմիլլանում ապրող խմբագիր Հարոլդ Լատամը նոր վիպագրության փնտրտուքների մեջ էր և կարդալով Միտչելի աշխատանքները՝ համաձայնվեց հրատարակել գիրքը։ Երբ գիրքը հրատարակելու որոշումն արդեն կայացված էր, Միտչելը սկսեց վերանայել գրքի բովանդակությունը և կատարեց որոշակի փոփոխություններ։ Վեպի վերջնական տարբերակը խմբագրելու պատիվը բաժին հասավ Միտչելի ամուսնուն՝ խմբագիր Ջոն Մարշին։ Ի վերջո, «Քամուց քշվածները» վեպը հրատարակվեց 1936 թվականի հունիսին։

3․ Առաջին հրատարակիչը, ով համաձայնվել է տպել «Լոլիտա» վեպը, եղել է «Օլիմպիա պրեսս»-ը

Վլադիմիր Նաբոկովի այս վեպն այնքան հակասական էր, որ միայն մեկ հրատարակչություն է համաձայնել տպագրել այն՝ 1955 թ․-ին։ Հետագայում՝ 1958թ․-ին, գրքի հրատարակումը մերժած ԱՄՆ- ի «Փութնամ» (Putnam) հրատարակչությունը մտափոխվեց, երբ վեպն արդեն հայտնի էր դարձել։ 

4․ Վիկտոր Հյուգոյի նախադասությունը` կազմված 823 բառից

Հյուգոյի «Թշվառները» (Les Misérables, 1862 թ.) վեպն ընթերցելիս ձեր աչքից չի վրիպի մի քանի էջանոց նախադասությունը, որը բացկացած է ոչ ավել, ոչ պակաս, քան 823 բառից։

5․ Ֆրենկ Բաումի «Օզի կախարդը» գրքի անվանման ծագման պատմությունը

Համաձայն Բաումների ընտանեկան լեգենդի՝ մի երեկո հեղինակը ճաշասենյակում հավաքված երեխաներին պատմում էր իր հեքիաթները, երբ նրանցից մեկը հարցրեց, թե որտեղ էին կատարվում այս իրադարձությունները։ Գրողը, արագ աչքի անցկացնելով սենյակում գտնվող իրերը, նկատեց հին բյուրոն, որտեղ փաստաթղթերը դասավորված էին ըստ այբբենական կարգի՝ վերևի շարքում՝ «Ա-Ն», իսկ ներքևի շարքում՝ «Օ-Զ» ֆայլերը, և բացականչեց, որ այդ երկիրը Օզ էր կոչվում։

6․ Չառլզ Դիքենսը շատ սնահավատ է եղել

Դիքենսը հավատում էր, որ եթե քնի դեմքով դեպի հյուսիս, ապա ավելի լավ կգրի։
Ճանապարհորդելուց նա ձեռքի տակ միշտ կողմնացույց էր պահում, որպեսզի ընթացքում նա դեմքով միշտ ճիշտ ուղղությամբ կանգնի, ինչպես նաև ամեն ինչին 3 անգամ էր դիպչում, քանի որ հավատում էր, որ դա հաջողություն է բերում։ Գրողը նաև հիպնոսի մեծ երկրպագու էր և «Ուրվականների ակումբ»-ի անդամ։

7․ Լև Տոլստոյը «Պատերազմ և խաղաղություն» վեպի գոյության համար պարտական է իր կնոջը

Լև Տոլստոյի կինը՝ Սոֆյան, ձեռքով կրկնօրինակել է 1400 էջանոց վեպը մոտ 7 անգամ։ Հիրավի, ինչերի ասես պատրաստ չէ իրական սերը։

8․ Ֆրենսիս Սքոթ Ֆիցջերալդը ստեղծել է բառեր, որոնք հետագայում դարձել են առօրյա խոսակցական բառապաշարի մաս

Օքսֆորդի անգլերեն բառարանում նշված է, որ հիանալի (wicked) բառի ամենավաղ կիրառումը իր լավ, ընտիր իմաստով հայտնաբերվել է Ֆիցջերալդի «Դրախտի այս կողմում» ստեղծագործության մեջ։ Ֆիցջերալդին է վերագրվում նաև շապիկ (T-shirt) բառն առաջին անգամ օգտագործելը։

9․ Չինաստանում արգելված մանկական գիրքը

Չինաստանի Հունան նահանգի կառավարիչը արգելել է Լուիս Քերոլի «Ալիսը Հրաշքների աշխարհում» գիրքը, քանի որ նա գտնում էր, որ կենդանիներին չպետք է տրվի մարդկանց լեզվով խոսելու ուժը, ինչպես նաև «կործանարար» էր համարում կենդանիներին և մարդկանց նույն մակարդակի վրա դնելու հանգամանքը։

10․ «Ֆարենհայթ 451»-ը ի սկզբանե կոչվել է «Հրշեջը»

Գիրքը «Հրշեջը» վերնագրելուց որոշ ժամանակ անց Ռեյ Բրեդբերին և նրա հրատարակիչները մտածեցին, որ դա շատ ձանձրալի անվանում է։ Կա տարածված լեգենդ, որ նոր անվան փնտրտուքով նրանք զանգահարեցին տեղական հրշեջ կայան և հետաքրքրվեցին, թե որն է թղթի այրման ջերմաստիճանը։ Հրշեջները խնդրեցին Բրեդբերիին մնալ կապի մեջ, այնուհետև այրեցին մի գիրք, չափեցին ջերմաստիճանը և հայտնեցին գրողին արդյունքները։

© Նյութի հեղինակ՝ Սեդա Գրիգորյան