10 ռուս գրողի 10 տարօրինակություն

2022-06-13 857

Հանճարները հաճախ հանճարեղ են նաև իրենց տարօրինակությունների մեջ։ Խոսենք դրանցից մի քանիսի մասին:

► Նիկոլայ Գոգոլը չէր սիրում լուսանկարվել և երբ նրան փորձում էին նկարահանել, նա սկսում էր ծամածռվել կամ ծածկել դեմքը։ Այդ պատճառով նա անցանկալի հյուր էր դարձել շատ տներում։
Ինչպես նաև Գոգոլը հայտնագործել է առաջին խաղային ատրակցիոններից մեկը։ Նրա թեթև ձեռքով հողմաղացը երեխաների համար վերածվում էր պտտվող անիվի, սակայն կարճ ժամանակ անց այդ զվարճանքը «արգելվեց» քննիչների կողմից։

► Երբ Չեխովը տեղափոխվեց Յալթա, նրա երկրպագուհիները նույնպես գնացին Ղրիմ։ Նրանք ամեն տեղ հետևում էին գրողին՝ ակնկալելով գրավել նրա ուշադրությունը։ Այս կանանց «Անտոնովկա» էին անվանում։

► Ալեքսանդր Կուպրինը, մեկ անգամ որևէ նոր օծանելիքի հոտը առնելուն պես, կարողանում էր ճշգրիտ նշել դրա բոլոր բաղադրիչները:

► Պուշկինը բարդույթավորվում էր կնոջ բարձր հասակից: Վերջինս 10 սանտիմետր ավելի բաձրահասակ էր Պուշկինից, ուստի երբ նրանք միասին միջոցառումների էին գնում, Ալեքսանդր Սերգեևիչը փորձում էր կնոջից որոշակի հեռավորության վրա գտնվել։

► Այրվող նավից փախչելու ժամանակ Տուրգենևը մի կողմ էր հրել իր ճանապարհին հանդիպող կանանց ու երեխաներին և նույնիսկ փորձել էր կաշառել նավաստիներից մեկին։ Հետագայում նա՝ ամաչելով իր արարքից՝ որպես ապաշխարության նշան ներառել է այդ դրվագը իր «Հրդեհը ծովում» նովելում։

► Կռիլովի անփութությունն ու ծուլությունը քաջ հայտնի էին նրա ծանոթներին։ Պատրաստվելով պալատական դիմակահանդեսին՝ նա ընկերներից խորհուրդ է հարցրել, թե ինչ տեսքով ներկայանա միջոցառմանը և ստացել է այս պատասխանը՝ «Դու, Իվան Անդրեևիչ, լվացվի՛ր և սանրի՛ր մազերդ և քեզ ոչ ոք չի ճանաչի»։

► Մայակովսկին ատում էր կետադրական նշանները, շփոթվում դրանց մեջ և հաճախ ուղղակի անտեսում էր դրանք։

► Ցանկանալով ամուսնանալ որպես ազնիվ մարդ՝ հարսանիքից առաջ Լև Տոլստոյը հարսնացուին է տվել իր անձնական օրագրերը, որոնցում ամփոփված էր գրողի ամբողջ կյանքը` ներառյալ նրա բուռն անցյալը, մոլախաղերով տարվածությունը և արատավոր հարաբերությունների մասին մանրամասները։ Կարդացածը այնպես էր գամվել Սոֆյա Անդրեևնայի հիշողության մեջ, որ թունավորել էր ո՛չ միայն նրա հարսանեկան տոնակատարությունը, այլ նաև՝ ողջ հետագա կյանքը:

► Հետաքրքրական է, որ գիտական ​​շրջանակներում Վլադիմիր Նաբոկովը հիմնականում հայտնի է ոչ թե որպես գրող, այլ որպես ականավոր լեպիդոպտերիստ՝ թիթեռների մասնագետ: Որոշ ժամանակ նրա եկամուտի աղբյուրը հիմնականում  հետազոտություններն էին, և ոչ թե ստեղծագործական գործունեությունը։

► Հանճարներից շատերը հոգեկան խանգարումներ են ունեցել, բայց Լերմոնտովի ընտանիքը կարծես թե դրանք բոլորը մեկ տեղում է հավաքել. նրա պապը տառապում էր դեպրեսիայով, ինչի հետևանքով ինքնասպանություն է գործել, մայրը վատառողջ էր և սրված նյարդայնությամբ էր տառապում, հայրը հաճախ ուժգին զայրույթի նոպաներ էր ունենում և աչքի էր ընկնում դաժանությամբ, իսկ գրողի մի շարք հարազատներին շիզոիդ և շիզոտիմիկ հոգեկան խանգարումներ էին վերագրում։

© Նյութի հեղինակ՝ Սեդա Գրիգորյան

Դիտեք ավելին Հետաքրքրի մասին բաժնում

մեկնաբանություններ