12 արտառոց փաստ գրողների և գրքերի մասին

Գրական աշխարհում ամեն ինչ հնարավոր է։ Ի հաստատումն դրա ձեզ ենք ներկայացնում 12 անսովոր փաստ տարբեր գրողների կյանքի և ստեղծագործությունների մասին․

1. Բալզակն իր աշխատանքային օրը միշտ սկսում էր սուրճով։ Նա օրական մինչև 50 բաժակ թունդ սուրճ էր խմում կամ ծամում էր սուրճի հատիկները:
2. Ջոն Թոլքիենը քնում էր լոգարանում, որպեսզի իր խռմփոցով չխանգարի կնոջ հանգստին։
3. Ագաթա Քրիստին ամբողջ կյանքում տառապում էր դիսգրաֆիայով՝ հոգեկան ֆունկցիաների խանգարումով, որը նրան թույլ չէր տալիս բառի մեջ տառերը ճիշտ հերթականությամբ դասավորել, սակայն նա առանց որևէ դժվարության պատմությունները տպում էր գրամեքենայով։ Այն դեպքում, երբ վերջինս ձեռքի տակ չէր լինում, Ագաթան տեքստը թելադրում էր իր շրջապատում գտնվող մարդկանցից որևէ մեկին։
4. Հետմոդեռնիստական նովելների հեղինակ Ջեյմս Ջոյսը սարսափելի վախենում էր շներից:
5. «Շառաչ և ցասում» վեպի հեղինակ Ուիլյամ Ֆոլքները որոշ ժամանակ աշխատել է որպես փոստատար, մինչև չի պարզվել, որ իր կողմից առաքվող նամակների մեծ մասը նրա կողմից հայտնվում են աղբարկղում:
6. Ֆրանսիացի արձակագիր Ժորժ Պերեկը «La disparition» վեպը գրել է առանց e տառը օգտագործելու: Հետաքրքրականն այն է, որ այն ֆրանսերենում ամենատարածված տառն է։ Հետագայում վեպի թարգմանիչները ստիպված էին գլուխ կոտրել այն հարցի շուրջ, թե ինչպես կարելի է թարգմանել վեպն առանց օգտագործելու իրենց լեզվում ամենատարածված տառը՝ պահպանելով բնօրինակի տրամաբանությունը: Օրինակ, վեպի իսպաներեն թարգմանիչները վեպի թարգմանության ժամանակ խուսափել են a տառից, որպես իսպաներենում ամենաշատ օգտագործվող տառ, ռուսները՝ о տառից, իսկ ճապոնացիները՝ i:
7. Գրիմ եղբայրների հեքիաթներում գրեթե բոլոր բացասական կերպարները կանայք են։ Նրանք խաղում են կախարդների և չար խորթ մայրերի դերեր:
8. Անգլիացի գրող Բարբարա Քարթլենդը մեկ տարվա ընթացքում գրել է 26 վեպ, իսկ կյանքի ընթացքում՝ 723 գիրք, որը գրանցվել է Գինեսի ռեկորդների գրքում:
9. Ջոնաթան Սվիֆթը իր «Գուլիվերի ճանապարհորդությունները» գրքում նշել էր արբանյակների պտտման ճշգրիտ չափը և արագությունը` ավելի քան հարյուր տարի առաջ, քան այն կհայտնաբերվեր գիտնականների կողմից:
10. Ժամանակին «Քադբերի» ընկերությունը դպրոցականներին առաջարկում էր անվճար փորձարկել իրենց նոր շոկոլադները։ Հետագայում այդ երջանիկներից մեկը՝ Ռոալդ Դալը, ոգեշնչվելով այդ դեպքից գրում է հայտնի «Չարլին և շոկոլադի գործարանը» գիրքը:
11. Ձեռնարկատեր Թիմոթի Դեքսթերը իր 20 էջանոց «Խելացի միտք ունեցողների զվարճանքի համար» աշխատությունում չի օգտագործել որևէ կետադրական նշան։ Հեղինակը վրդովված ընթերցողներին առաջարկել է կետադրական նշանները դասավորել իրենց հայեցողությամբ։
12. Երբ Գաբրիել Գարսիա Մարկեսին դիմեցին իր «100 տարվա մենությունը» գրքի էկրանավորման համար, նա չմերժեց, սակայն որպես էկրանավորման պարտադիր պայման պահանջեց էկրանավորել վեպը գլուխ առ գլուխ՝ 100 տարվա ընթացքում՝ մեկ տարվա ընթացքում էկրանավորելով միայն մեկ գլուխ՝ 2 րոպե տևողությամբ: Կարելի է ասել, որ Մարկեսը գործնականում անհնարին է դարձրել վեպի էկրանավորումը։ 

© Նյութի հեղինակ՝ Սեդա Գրիգորյան