Տարեկան 200 գիրք՝ սոցցանցերում անցկացրած ժամանակի դիմաց

2018-03-09 2668

Մեկ տարվա՝ սոցցանցերում անցկացրած ժամանակը կբավականացնի 200 գիրք կարդալու համար

Մի անգամ ամերիկացի միլիարդատեր Ուորեն Բաֆեթին հարցրել են՝ որն է նրա հաջողության գաղտնիքը։ Բաֆեթը ցույց է տվել գրքերի կույտը և պատասխանել․ «Օրական 500 էջ։ Ահա թե ինչպես է աշխատում գիտելիքը»։

Որքա՞ն ժամանակ է պետք տարեկան 200 գիրք կարդալու համար։

Եկեք նայենք վիճակագրությանը․

► Միջինում մարդ րոպեում կարդում է 150-350 բառ

► Հիմնակամում գեղարվեստական գրքերը լինում են 18,000-25,000 բառ

Հիմա կատարենք մի փոքր թվաբանություն․

► 200 գիրք x 25,000 բառ = 5,000,000 բառ

► 5,000,000 բառ ։ 150 բառ/ր = 33,333 րոպե

► 33,333 րոպե ։ 60 րոպե = 555 ժամ

(Հաշվարկները մոտավոր են և արդյունքները շատ հարաբերական)

Այսպիսով 200 գիրք կարդալու համար տարվա մեջ հարկավոր է 555 ժամ։

Եթե հաշվենք, որ միջինում մարդ օրական 2 ժամ է ծախսում սոցցանցերում, տարվա կտրվածքով կստացվի 730 ժամ, որի ընթացքում կարելի է կարդալ մոտավորապես 200-ից ավել գիրք։

Իհարկե, չոր թվաբանությունն ու կյանքը միշտ էլ տարբեր են, և այն նույն ժամանակ, երբ միայն թվաբանությամբ տարեկան կարելի է կարդալ անգամ 1000 կամ 2000 գիրք։ Իրականում դա այդքան էլ իրատեսական չէ, քանի որ բացի ընթերցանությունից յուրաքանչյուր մարդու անհրաժեշտ է ժամանակ ընտանիքի, ընկերների, անձնական հիգիենայի, տնային գործերի, աշխատանքի, ինչու չէ նաև համացանցի, հեռուստացույցի և մի շարք այլ զբաղմունքների համար։ Իմ անձնական պրակտիկայից կարող եմ ասել , որ ես տարեկան միջինում կարդում եմ 25 գիրք, որը չի կարելի ասել թե շատ է։

Ամեն դեպքում, յուրաքանչյուր տարվա սկզբում որոշ մարդիկ իրենց առջև նպատակ են դնում ավելի շատ գիրք կարդալ, քան նախորդ տարի։ Իմ նոթատետրի պլանների բաժնում ևս ամեն տարվա սկզբում լինում է նման նպատակ։ Ահա մի քանի խորհուրդ, եթե դուք էլ ինձ նման ցանկանում եք ավելի շատ գրքեր կարդալ 2018-ին։

1. Գնեք Քինդլ (Kindle) էլեկտրոնային գրքերի ընթերցիչ: Դրա հատուկ էկրանը չի վնասում աչքերը, և դրա միջոցով հազարավոր էլեկտրոնային գրքեր հասանելի են անվճար։

2. Գրանցվեք որևէ գրադարանում։ Ես ինքս տարիներ շարունակ Երևանի Ավ. Իսահակյանի անվան Կենտրոնական գրադարանի ընթերցող եմ։

3. Անդամագրվեք գրքի քննարկման ակումբների։ Ինքս Գրքամոլ ակումբի անդամ եմ։ Այսպիսի ակումբներն ուղղորդում են գրքերի ընտրության հարցում, պարտավորեցնում են օրվա մեջ մի քանի ժամ հատկացնել ընթերցանությանը և հիանալի միջավայր են նոր ընկերներ ձեռք բերելու համար։

4. Հետևեք GoodReads-ին և Գրքամոլին:

5. Հետևեք հրատարակիչների, գրողների, գրականագետների, թարգմանիչների, գրախանութների ՖԲ էջերին, որպեսզի տեղեկացված լինեք գրական նորություններին, գրախանութներում առկա զեղչերին և հատուկ առաջարկներին, որոնք շատ են հատկապես տոնական օրերին։

6. Դարձրեք գրախանութները ձեր զբոսանքի ու ժամանցի վայրերից մեկը։ Երևանում հետաքրքիր ու հարուստ գրախանութները և գրախանութ-սրճարաններն ավելանում են, որոնց միջավայրը տրամադրում է կարդալու։ Դրանցից են Հայ Գիրքը, Բուկինիստը, Բյուրոկրատը, Արտ Բրիջը և էլի շատ շատերը։

7. Եթե կարդում եք գիրք թղթային տարբերակով, անջատեք ինտերնետը, որպեսզի ոչ մի բան չշեղի ձեր ուշադրությունը։

Աղբյուրը՝ https://angelagrigoryan.wordpress.com

մեկնաբանություններ