Անահիտ Հայրապետյան Բանաստեղծություններ
2018-10-18 5609
Բարեբախտաբար դու ունես
բոլոր հարցերի պատասխանները,
և ես ստիպված չեմ փորփրել հանրագիտարանները,
ուղղի՛ր իմ խոսքը,
չգիտեմ, թե որքան կմնամ այստեղ,
գուցե մեկ, երկու կամ երեք տարի,
ճոճանակը դատարկ է,
այն երբեք դատարկ չէր լինում,
անգամ գիշերը,
չգիտեմ՝ որքան կմնամ այստեղ,
գուցե մեկ, երկու կամ երեք տարի...
***
Ես գիտեմ իմ մասին ես մտածում
ու երգեր մռմռում իմ մասին
սաթի մեջ կորած ձորեր
ու լուսին նստած քո մեջքին
թեյի մեջ փոթորիկ
բիբի մեջ անձրեւ
մազերս վարարուն մի գետակ
պայտերով կաղին ես կոտրում
ու զգում քեզ լրիվ դատարկ
աչքերդ էշի պես հառել սենյակի դանդաղ անկյունին
կոնքերիդ լույսի շողեր ու կծու մի երգ իմ մասին
ես գիտեմ
իմ մասին ես երազում
ու երգեր մռմռում իմ մասին
լացիս մեջ բյուրեղյա շապիկ
որ ունես հիմա քո հագին
շուրթերդ հասան պռնկին
այրվեցիր
թռար քո տեղից
ճաքերը ի վերջո հատան
մարմինդ մի հազար տեղից
ու հիմա սոսինձը առած
աստղեր եմ դնում քո մեջքին
ես գիտեմ
իմ մասին ես մտածում ու երգեր մռմռում իմ մասին:
Դիտեք ավելին Բանաստեղծություններ բաժնում
մեկնաբանություններ