«Ձեր էջի շնորհիվ մենք հասկացանք, թե ինչ բան է գիրքը». Արձագանքներ ֆեյսբուքյան էջի մասին-Առավոտ Երիտասարդական

  «Մարդը ստեղծված է այն գրքերից, որոնք կարդացել է». սա ֆեյսբուքյան «Գրքամոլ» էջի կարգախոսն է. ընդամենը մի քանի ամիս գործող «Գրքամոլ»-ը հասցրել է հազարավոր օգտատերերի սիրելի էջը դառնալ - գրում է Առավոտ Երիտասարդական լրատվական կայքը Գրքամոլ էջի հետ անցկացրած հարցազրույցի արդյունքում: Ստորև ներկայացնում ենք այն ամբողջությամբ: -Ինչպե՞ս որոշեցիք բացել էջը: -Գաղափարն առաջացավ շատ սովորական: Սկզբում ուզում էինք Facebook-ում ստեղծել մի այնպիսի տիրույթ, որի միջոցով մարդիկ հնարավորություն կունենան ծանոթանալ հայտնի գրողների, նրանց գրած գրքերի, ինչպես նաև բանաստեղծների և մի շարք այլ ժանրի ստեղծագործողների աշխատանքների հետ, ու քանի որ այսօր մարդկանց մի ստվար զանգված իրենց օրվա զգալի մասը հատկացնում է համացանցին, ուստի հենց վերջինիս միջոցով էլ ցանկացանք այդ ամենը մատուցել նրանց: -Սովորաբար ինչե՞ր են տեղադրվում ձեր էջում: -Էջի հիմնական մասը զբաղեցնում են մեջբերումները այն գրքերից, որոնք որ անձամբ կարդացել ենք մենք ադմիններով և դուրս ենք գրել այդ մեջբերումները, ո՛չ ինչ-որ ռուսական էջերից ենք թարգմանում տեղադրում մեզ մոտ, ո՛չ էլ մյուս հայկական կայքերից ու ֆորումներից: Երբեմն էլ մեզ հետադարձ կապով մեջբերումներ ուղարկում են մեր էջի հետևողները, ցանկանալով և՛ օգնել մեզ, և՛ լրացնել բաղ թողածը: Բացի մեջբերումներից տեղադրվում են նաև ժամանակի հայտնի մտածողների մտքերը, նրանց աֆորիզմներն ու ստեղծագործությունները: Անտարբեր չենք նաև այսօրվա հայ երիտասարդ ստեղծագործողների նկատմամբ, ովքեր որ ամեն օր մեզ հետադարձ կապով ուղարկում են իրենց ստեղծագործությունները և խնդրում տեղադրել մեզ մոտ: Ու ասեմ, որ ամեն անգամ կարդալով այդ ստեղծագործությունները ուղղակի երեք ադմիններս էլ ապշում ենք, թե ինչքան տաղանդավոր ստեղծագործողներ ունենք մենք, ովքեր կարող եմ վստահաբար ասել, իրենց գրածներով ոչնչով չեն զիջում և ոչ մի արտասահմանյան գրողի: Կայքում «Մեր ստեղծագործությունները» բաժին կա, որտեղ հավաքվում են նրանց բոլոր ուղարկածները, ցանկացողները կարող են մտնել և կարդալ: Երբեմն էլ, երբ հայտնի հայ կամ արտասահմանյան գրողի ծննդյան կամ մահվան տարելից է լինում, անպայման տվյալ օրը հիշատակում ենք այդ մասին: -Այսինքն ծանրաբեռնվածությունը շա՞տ է, որ երեք ադմինով եք աշխատում: -Գիտեք, երբ որ գործը սիրում ես ու դա անում ես նվիրվելով նրան ամբողջ հոգով, ծանրաբեռնվածություն և այլն քեզ համար դառնում են միայն մանրուքներ, անգամ ինչ-որ տեղ էլ հաճելի է դառնում այդ ծանրաբեռնվածությունը, որովհետև այդ ժամանակ ավելի շատ ես սիրածդ գործով զբաղվում: - Իսկ թարմացումներն ի՞նչ հաճախականությամբ են լինում էջում: - Պարտադիր ամեն օր, չենք սիրում հիասթափեցնել մեր ընթերցողին ով ամեն վայրկյան սպասում է նոր թարմացման: Տարբեր օրեր տարբեր քանակությամբ, օր է եղել որ մեկ, օր է եղել որ տասնյակներով հրապարակումներ ենք արել: -Իսկ ի՞նչ եք կարծում, մարդիկ հետաքրքրված են ձեր էջով: -Սկզբում, երբ որ էջը նոր էր բացվել, մտածում էինք թե ամենաշատը մի քանի հազար like կարող էինք ունենալ և այդքան էլ մեծ հետաքրքրություն չէր կարողանա առաջացնել համացանցում, ամենաշատը 5000-6000: Բայց երբ տեսանք հետագայում ավելացող մարդկանց թիվը, հասկացանք որ հետաքրքվողների թիվը իրոք մեծ է: Հիմա տեսեք, արդեն 29.000-ին ենք մոտենում (հարցազրույցն անցկացվել է անցած տարի): Ճիշտ է, հնարավոր է որ նրանցից ոչ բոլորն են գրքամոլներ, բայց ասեմ Ձեզ, օրեկան էջին ուղարկվող բազմաթիվ նամակներից կարելի է ենթադրել, որ հետաքրքրվողները իրոք բավականին շատ են. մարդիկ ամեն հարցով, ինչ իրենց պետք է գրքի համար մեզ են դիմում. օրինակի համար թե որտեղից կարող են գտնել այս գիրքը (շատ դեպքերում մենք ենք ունենում ու անձամբ ենք տալիս նրանց), կամ իրենց ինչ գիրք խորհուրդ կտային կարդալ (երբեմն էլ իրենք են մեզ առաջարկում), առաջարկում են գրքի քննարկումներ լինեն, որոնք ընթանում են շատ ակտիվ, էլ չեմ խոսում որ նամակների կեսից ավելին միայն շնորհակալական խոսքեր են: Այսինքն հասարակությունը իրոք հետաքրքրված է էջով, հետևաբար և գիրք կարդալով: Ու ամենահետաքրքրականն այն է, որ երբեմն էլ ստանում ենք այպիսի բովանդակությամբ նամակներ, ու հատկապես տղաներից, ՈՐ ՁԵՐ ԷՋԻ ՇՆՈՐՀԻՎ ՄԵՆՔ ՀԱՍԿԱՑԱՆՔ ԹԵ ԻՆՉ ԲԱՆ Է ԳԻՐՔԸ ՈՒ ՀԻՄԱ ՁԵՐ ՀՐԱՊԱՐԱԿՈՒՄՆԵՐԻՆ ԶՈՒԳԱՀԵՌ ՍԿՍԵԼ ԵՄ ԸՆԹԵՐՑԵԼ ՏՎՅԱԼ ԳՐՔԵՐԸ: Էդ ժամանակ ես հասկանում, որ իրոք շատերը արածդ գործը գնահատում են ու հետաքրքրությունը էջի նկատմամբ գնալով էլ ավելի մեծանում է: -Իսկ ինչու՞ հենց Գրքամոլ: -Իսկ ի՞նչ: Հավատացեք, որ մոլը գրքի դեպքում ոչ մի բացասական իմաստ չունի: Շատ կուզենայինք, որ այսօր բոլորն էլ Գրքամոլներ լինեին մեր երկրում: -Ըստ ձեզ այսօր մենք ունե՞նք դրա պակասությունը: -Չկա մի հասարակություն, որտեղ բոլորն էլ գիրք կարդացողներ լինեն: Նույնն էլ մեզ մոտ է, կան և՛ կարդացողներ, և՛ չկարդացողներ: Միանշանակ չենք կարող ասել կա դրա պակասությունը թե ոչ, բայց մի բան կուզենանք նշել դրա հետ կապված: Այսօր շատ մարդիկ սիրում են խոսել ու մուննաթ տոնով քննադատել հետևյալը, որ «այսօրվա երիտասարդությունը գիրք չի կարդում, մոռացել է թե ինչ բան է գիրքը, մեր սերունդը կործանման եզրին է, ինչ պետք է անել որպեսզի երիատասրդը ձեռքը գիրք վերցնի» և այլն և այլն հայրենասիրական ճառեր: Բոլոր էդպես մտածողներին կցանկանայինք որ հասկանային հետևյալը: Եթե երիատասարդը, կամ սերունդը (իրենք շատ են սիրում էդ բառն օգտագործել էլի) տունը նստած իր համար գիրք է կարդում, ո՞րտեղից էտ ասողները պետք է իմանան մեր սերունդը կարդացող է թե չէ: Եթե մարդը իր համար տանը նստած իր գիրքն է կարդում, նա իր գիրքը չի վերցնելու վազելով գնա հրապարակի մեջտեղը կանգնի ու բարձր գոռա «տեսե՜՜՜՜՜՜՜՜ք ես գիրք եմ կարդում», կարդացողը խելոք իր համար գիրքը իր տան մեջ կարդում է անցնում է առաջ: Մեզ թվում է հենց իրենք, էդ ասողներն են առաջին հերթին գիրք չկարդացողները. ռուսը մի հատ լավ խոսք ունի է, ասում է «человек чаще всего говорит о том в чем нуждается»: Եթե գտնում են, որ ընդհանրապես չկարդացող սերունդ է մեծանում, թող իրենք առաջին հերթին գիրք կարդան ու մյուսներին քարոզեն նույնը, քննադատելը միշտ էլ հեշտ է, ու ընդհանրապես կարծում եմ գիրք կարդացող մարդը իրեն էդպիսի արտահայտություն թույլ չի տա: Միգուցե կրկվում ենք կներեք, բայց օրեկան բազմաթիվ եկած նամակներից միանշանակ կարող ենք ասել, որ շատ էլ լավ կարդացող սերունդ ունենք մենք, ճիշտ է գերակշռում են աղջիկները: -Լավ, իսկ ձեզ ի՞նչ օգուտ է տալիս էջը: -Բնական է որ facebook-ով փող աշխատել հնարավոր չէ և ոչ մի նյութական օգուտ չունենք: Օգուտը միայն մեր անունն է, մեր համբավն ու առաքելությունը, նպաստել ու զարգացնել հասարակության մեջ սերը դեպի գիրքը, դեպի գրականությունը, դեպի մեծ գրողներն ու իրենց հետաքրքիր կյանքը: Հավատացեք, որ երբ գործդ գնահատված է շատերի կողմից ու դրա մասին լսում ես շատ անգամներ տարբեր մարդկանցից, քեզ համար դրանից ավելի մեծ օգուտ լինել չի էլ կարող: -Լավ, շնորհակալ ենք հետաքրքիր զրույցի համար, ձեր էջին մաղթում ենք անխափան աշխատանք: