Աշխարհի ամենահազվագյուտ և ամենաթանկ գրքերը

Թեև գրքասերները գիտեն, որ լավ գրքի իրական արժեքը կայանում է նրանում թե ինչ է այն տալիս ընթերցողին, սակայն գոյություն ունեն որոշ գրքեր, որոնք մյուսների համեմատ շատ ավելի բարձր արժեքով են վաճառվել:

1. Ուիլյամ Շեքսպիր «Առաջին թերթիկ» - 6.1 միլիոն դոլար. աշխարհի ամենահազվագյուտ գիրքը

Աշխարհի ամենահազվագյուտ գիրք տիտղոսը կրում է Ուիլյամ Շեքսպիրի «Առաջին թերթիկ» գործը։ Այս գլուխգործոցն ի սկզբանե կրել է «Ուիլյամ Շեքսպիրի կատակերգություններ, պատմություններ և ողբերգություններ» վերնագիրը, սակայն հետագայում կրճատվել է և այժմ առավել հայտնի է «First Folio» անունով։ «Առաջին թերթիկ»-ը Ուիլյամ Շեքսպիրի պիեսների առաջին հավաքագրված հրատարակությունն է, որը բաղկացած է եղել 900 էջից, որոնցում զետեղված են նրա 36 պիեսները։ Հայտնի է, որ գոյություն ունի մոտավորապես 233 օրինակ, ինչը այն դարձնում է չափազանց արժեքավոր: Գիրքը հավաքվել և հրատարակվել է 1623 թվականին՝ նրա մահից յոթ տարի անց։ Եվ քանի որ Շեքսպիրի շատ գրվածքներ դարերի ընթացքում անհետացել են, այդ իմաստով այս գրքի օրինակները համարվում են հազվագյուտ և արժեն 6,1 միլիոն դոլար։

2. Լեսթերի կոդեքս. երբևէ վաճառված ամենաթանկ գիրքը

«Լեսթերի կոդեքսը» 30,8 միլիոն դոլարով երբևէ վաճառված ամենաթանկ գիրքն է համարվում։ Այս գիրքը Լեոնարդո դա Վինչիի նոթատետրն է և իրենից ներկայացնում է ձեռագիր գիտական գրությունների, դիտարկումների և տեսությունների հավաքածու: Գրքի առանցքային թեման է ջրի շարժումը, գետերում ջրի հոսքը և այդ գործոնի վրա ազդող ճանապարհի խոչընդոտները։ Իր դիտարկումներից Դա Վինչին առաջարկություններ է արել կամուրջների կառուցման և էրոզիայի վերաբերյալ։

Գրքում արծարծվում է նաև Լուսնի պայծառության թեման. Լեոնարդոն ենթադրում էր, որ Լուսնի մակերեսը ծածկված է ջրով, որն արտացոլում է Արեգակի լույսը։ Այս մոդելում ջրի ալիքները հանգեցնում են նրան, որ լույսը արտացոլվում է բազմաթիվ ուղղություններով՝ բացատրելով, թե ինչու Լուսինն այնքան պայծառ չէ, որքան Արեգակը:

Նոթատետրը կաշվեպատ է, բաղկացած է 18 թերթից, որոնցից յուրաքանչյուրը կիսով չափ ծալված է և գրված է երկու կողմից՝ կազմելով ամբողջական 72 էջանոց փաստաթուղթ։ Ժամանակին թերթերը կապվում էին միմյանց հետ, բայց այժմ դրանք ցուցադրվում են առանձին: Այն գրվել է իտալերեն, որն ուղեկցվել է բազմաթիվ գծագրերով և դիագրամներով։

Այս գործն իր անունը ստացել է 1717 թվականին իր առաջին գնորդի՝ Թոմաս Կոկի պատվին, ով հետագայում դառնալով Լեսթերի (քաղաք Մեծ Բրիտանիայում) առաջին կոմսը, գիրքն անվանափոխել է։ Կոդեքսը երկրորդ անգամ անվանափոխվել է 1980 թվականին իր երկրորդ գնորդի՝ Արմանդ Համմերի կողմից, որի շնորհիվ գիրքը սկսել է կոչվել «Համմերի Կոդեքս»։ Համմերի մահից հետո` 1994 թվականին գիրքը կրկին աճուրդի է հանվել և այս անգամ այն գնել է Microsoft ընկերության հիմնադիր Բիլ Գեյթսը՝ 30,8 միլիոն դոլար արժողությամբ:

© Նյութի հեղինակ՝ Եսթեր Սարգսյան