Սեյրան Ղազարյան «Ատյան Անկախության»

2019-02-24 939

ԱՏՅԱՆ ԱՆԿԱԽՈՒԹՅԱՆ

(բոլոր բառերը սկսվում են «ա» տառով)

 

Անկախացանք։ Այնուհետև
Անմիջապես աղքատացանք։
Անհոգ անցյալն անդարձ անցավ,
Աշխատավորն անտերացավ։

Այնուհետև՝ անխիղճ, ագահ
Անհատների աթոռարշավ։
Այնուհետև՝ աթոռակիր
Արքաների աթոռադավ։

Այնուհետև՝ անտանելի
Արտագաղթը արտասահման։
«Անկախ» ազգիս այնքա՜ն, այնքա՜ն
Ազգատներ անշենացան։

Անշենացան, անտերացան,
Աշխարհներում անհետացան։
Այնուհետև՝ ազգակործան
Արհավիրքը ազգամիջյան։

Այս ամենին ավելացրած
Ազգամոռաց ազգաջոջեր,
Անծրագիր, աննպատակ
Ազգահալած ազգակոչեր։

Այս ամենին ավելացրած
Անհամերաշխ ազգաժողով,
Անմիաբան, անկենսունակ,
Անշնչացած ազգակորով։

Ահա այսպես անկախացանք,
Ահա այսպես անզորացանք։

Անկախության արշալույսին
Ավերումներ այնքա՜ն, այնքա՜ն,
Ազգապատկան արժեքների
Ամենօրյա ալան-թալան,
Արժեքավոր ապրանքների
Արտահոսքը արտասահման։

Ալան-թալան․․․ Ասես անխիղճ
Արաբները արշավեցին,
Արշավեցին, ավերեցին,
Ամբողջ ազգին անարգեցին։

Այս ամենին ավելացրած
Ամենօրյա աղքատացում,
Անօգնական աղքատների
Աշխուժացում․․․․ աղբանոցում։

Ահավասիկ արդյունքները
Աղավաղված անկախության,
Ահավասիկ ազգասերիս
Աղաչանքը աղերսաձայն․

- Ազգի ակտիվ, առաջադեմ,
Աշխատավոր, ազնիվ այրեր,
Արիացե՛ք, ամբողջացե՛ք,
Արհավիրքից ազգն ազատենք։

1996թ․

Հեղինակ՝ © Սեյրան Ղազարյան

Դիտեք ավելին Ստեղծագործություններ բաժնում

մեկնաբանություններ