Գրքամոլ Ակումբ. Բաց քննարկում. Գաբրիել Գարիսա Մարկես «Սերը Ժանտախտի Օրերին»

Հունիսի 4-ին «Գրքամոլ» ակումբը և «Բուկինիստ» գրախանութների ցանցը Դալմա Գարդեն Մոլի կանաչ հանգստի գոտում նախաձեռնել էին բաց հանդիպում, որի ընթացքում քննարկվեց աշխարհահռչակ կոլումբիացի գրող Գաբրիել Գարսիա Մարկեսի «Սերը ժանտախտի օրերին» վեպը (1985թ.): Ներկաներն անդրադարձան ստեղծագործության հիմքում ընկած շուրջ վաթսուն տարվա պատմություն ունեցող սիրո թեմային, սիրային այն եռանկյունուն, որում հայտնվել էին վեպի գլխավոր հերոսները, ամուսնական համակեցության և մահվան գաղափարներին: Նրանք նկատեցին, թե որքան տարբեր և հակասական են այդ հերոսների սիրո դրսևորումները: Ակումբի երկրորդ խմբի անդամների և քննարկման մյուս մասնակիցների ուշադրությունից չէր վրիպել նաև վեպում արծարծվող հավատարմության թեման, որը, թեև թվում է, պետք է «զոհ գնար» ֆիզիկական կապերին, սակայն այն հաղթահարում է ժամանակի և տարածության առաջ բերած խոչընդոտները: Առանձնահատուկ անդրադարձ կատարվեց երիտասարդության և ծերության, անցյալի և ներկայի թեմաներին: Նախկին երիտասարդ սիրահարները, որոնց բաժանել էր կյանքը, և որոնց կապում էին անցյալի հիշողությունները, ավելի քան կես դար անց, մահվանը շատ մոտ կանգնած լինելով, փորձում էին վերագտնել իրենց սերը: Մարկեսի վեպի վերաբերյալ  ներկաների կարծիքները տարբեր էին, սակայն դրանք էլ ավելի հետաքրքրացան, երբ գրքամոլցիները Ավ. Իսահակյանի անվան գրադարանում մասնակցեցին նաև ստեղծագործության հիման վրա նկարահանված համանուն ֆիլմի դիտմանը և համեմատականներ անցկացրին գրքի և կինոնկարի միջև: Խմբի երրորդ մակարդակի առաջին քննարկումը կարելի է համարել արդյունավետ և բեղմնավոր: Այժմ գրքամոլցիները պատրաստվում են հունիսի 18-ի փակ հանդիպմանը,  որի ընթացքում կքննարկվի Ֆրենսիս Սքոթ Ֆիցջերալդի «Մեծն Գեթսբին»: Իսկ մինչ այդ «Զանգակ» հրատարակչությունը և «Գրքամոլ» ակումբը համատեղ կազմակերպում են Ռեյ Բրեդբըրիի «Ֆարենհայթ 451» վեպի բաց քննարկումը, որը տեղի կունենա Ավ. Իսահակյանի անվան կենտրոնական գրադարանում՝ հունիսի 11-ին, ժամը՝ 17:00-ին: Քննարկմանը ներկա է գտնվելու նաև գրքի թարգմանչուհի Լուսինե Հարոյանը:

Հանդիպման բոլոր նկարներն՝ այստեղ: