Գրքամոլ Ակումբ. Խումբ 8. Հանդիպում I. Ալբեր Քամյու «Օտարը»
2021-03-31 1231
Մարտի 20-ին Ավ․ Իսահակյանի անվան Կենտրոնական գրադարանում կայացավ «Գրքամոլ Ակումբ»-ի 8-րդ խմբի առաջին հանդիպումը։ Որպես քննարկման առաջին գիրք ընտրվել էր ֆրանսիացի նշանավոր արձակագիր, էսսեիստ, փիլիսոփա Ալբեր Քամյուի «Օտարը» վիպակը։
Քանի որ սա մասնակիցների առաջին հանդիպումն էր, սկզբում տեղի ունեցավ ընդհանուր ծանոթություն։ Յուրաքանչյուր մասնակից ներկայացնում էր իր անունը, ինչով է զբաղվում, և թե որ գրական հերոսի հետ է իրեն ասոցացնում։ Հնչեցին զանազան գրական հերոսների անուններ, ինչպիսիք են՝ Հարրի Հալլերը՝ «Տափաստանի գայլը» գրքից, Դեյզի Բյուքենենը` «Մեծն Գեթսբին» վեպից, Էլիզաբեթը՝ «Ուտել, աղոթել, սիրել…» գրքից, և այլք։
Այնուհետև ծանոթությանը հաջորդեց «Օտարը» գրքի քննարկումը։ Մասնակիցների շրջանակներում կարծիքները բազմազան էին։ Ներկաների մի մասը հերոսին՝ Մյորսոյին, ընկալում էին որպես զուրկ ամեն տեսակի զգացմունքներից, իբրև ամեն ինչին լիակատար անտարբերություն ցուցաբերող կերպար, իսկ ոմանք նրա մեջ տեսնում էին մի մարդու, ով ուշադիր կերպով նկատում էր իր շրջապատում կատարվող ամեն մանրուքին, ով օտար չէր բնությանը, կյանքի դեպքերին և հանգամանքներին, և ով իր քայլերով ամենևին էլ չէր ձգտում դուր գալ և քծնել հասարակությանը, իրեն ներկայացնում էր այնպիսին, ինչպիսին, որ կա՝ իր Հակաքրիստոս կերպարով հանդերձ:
Իրարամերժ տեսակետների արդյունքում քննարկումը բավականին թեժ էր, հետաքրքիր և արդյունավետ։
Ակումբի հաջորդ հանդիպումը տեղի կունենա ապրիլի 3-ին, որի ընթացքում քննարկվելու է Նիկոլայ Գոգոլի «Մեռած Հոգիներ» պոեմը:
Հ.Գ. Հանդիպման բոլոր նկարներն՝ այստեղ:
Դիտեք ավելին Գրքամոլ Ակումբ բաժնում
մեկնաբանություններ