Գրքամոլ Ակումբ. Խումբ Վեցերորդ. Հանդիպում XII. Դեն Բրաուն «Ինֆեռնո»

2019-12-11 1526

Ավ. Իսահակյանի անվան գրադարանում տեղի ունեցավ «Գրքամոլ» ակումբի 6-րդ խմբի վերջին քննարկումը։ Քննարկման առիթ էր դարձել ամերիկացի ժամանակակից գրող Դեն Բրաունի թվով չորրորդ վեպը՝ «Ինֆեռնոն»։ Այն հրատարակվել է 2013 թվականին և բավականին երկար ժամանակ ամենապահանջված գրքերից մեկն է եղել։ «Ինֆեռնոն» միստիկ թրիլլեր է, որի գլխավոր հերոսը Հարվարդի համալսարանի դասախոս Ռոբերտ Լենգդոնն է, ով մի օր արթնանում է հիվանդանոցում և բացարձակապես չի հիշում, թե ինչ է կատարվել իր հետ և ինչու է նա հայտնվել այնտեղ։ Իրադարձությունների անկանխատեսելի զարգացման արդյունքում պարզվում է, որ ամբողջ սցենարը ուներ մի նպատակ՝ օգտագործել գենետիկան մարդկության վերացման նպատակով։
Ակումբականները դիտեցին նաև համանուն ֆիլմը, ինչից հետո սկսվեց բուռն ու հակասական քննակում։ Հիմնական հարցը ընդհանուր գաղափարի շուրջ էր՝ արդյոք Զոբրիստի այն գաղափարը, թե գենետիկական վիրուսը մարդկության որոշ հատվածում կառաջացնի անծնելիություն և կլուծի երկրագնդի գերբնակեցման խնդիրը՝ չվնասելով մարդկանց՝ ճիշտ է։ Ոմանք կարծում էին, որ ոչ ոք չէր գնա այդ քայլին, որպեսզի լուծի հաջորդ սերնդի խնդիրները, իսկ ոմանք մտածում էին, որ ունենալով հնարավորություն, այն է՝ զոհել որոշակի մարդաքանակ փրկելու համար միլիարդավորներինը,  հնարավոր է գնային այդ քայլին, քանի որ չպետք է պատմական պահը բաց թողնվի։
Երկարատև քննարկումներից հետո 6-րդ խմբի անդամները հրաժեշտ տվեցին այդ օրվա հանդիպմանը, բազմակարծիք քննարկումներին ու այն ապրումները, որոնք զգացել էին Ինֆեռնոյի ընթերցման ժամանակ։

Դիտեք ավելին Գրքամոլ Ակումբ բաժնում

մեկնաբանություններ