Գրքամոլ Ակումբ. Խումբ Յոթերորդ. Հանդիպում VI. Ստեֆան Ցվայգ «Ամոկ»

2020-04-09 4021

Շարժվելով երկրում ստեղծված իրավիճակին համապատասխան՝ «Գրքամոլ» ակումբի 7-րդ խումբը որոշեց իր առաջիկա քննարկումներն իրականացնել առցանց՝ տեղափոխվելով Zoom հարթակ: Այս անգամ քննարկվեց ավստրիացի գրող և գրաքննադատ Ստեֆան Ցվայգի նովելներից մեկը՝ «Ամոկը»: Փոքրածավալ, բայց խոսուն, միևնույն ժամանակ գեղեցիկ շարադրանք ունեցող այս ստեղծագործությունը մի առեղծվածային բժշկի մասին է, որը պատմում է իր պատմությունը մի անծանոթի, միայն որին էլ վիճակված էր ականատես լինել այդ պատմության ողբերգական հանգուցալուծմանը: Քննարկման ընթացքում անհնար էր չանդրադառնալ Ցվայգի՝ որպես հրաշալի ու նրբանկատ մի հեղինակի առանձնահատկություններին, քանզի նա քչերից է, ով կարողանում է խորասուզվել մարդու ներաշխարհ և դիպչել նրա հոգեբանական ամենանուրբ գծերին: Խոսվեց այն մասին, որ նա յուրովի է ներկայացնում իր հերոսներին՝ փորձելով անել ամեն ինչ, որպեսզի ընթերցողը հնարավորինս լավ ճանաչի նրանց:
Ինչ վերաբերում է գլխավոր հերոսին, ապա վերլուծության ենթարկվեց ոչ միայն նրա խառնվածքը, բնավորությունը, այլև անդրադարձ եղավ նրա կերպարին՝ որպես բժշկի, քանզի ստեղծագործության տողերում ևս մեծ նշանակություն էր տրված այդ մասնագիտությանն ու դրա հետ կապված հերոսի ապրումներին: Կերպարային վերլուծություններից դուրս չմնացին նաև մյուսները՝ կինը, ով խորը արմատներ գցեց բժշկի սրտում, կնոջ օգնական ուղեկցորդը, սիրեկանը, իսկ հերոսներից զատ, քննարկվեցին նաև նովելում առկա տարբեր դրվագներ ու իրադարձություններ:
Հատկանշական է, որ առցանց քննարկումը ևս բավականին արդյունավետ էր, և ինչպես միշտ անցավ ուրախ ու հետաքրիքր մթնոլորտում:

Հանդիպման բոլոր նկարներն՝ այստեղ:

Դիտեք ավելին Գրքամոլ Ակումբ բաժնում

մեկնաբանություններ