Գրքամոլ Ակումբ. Քննարկում առաջին. Ջեյն Օսթին «Հպարտություն և նախապաշարմունք»

2014-09-10 4307

  Սեպտեմբերի 8-ին Ավ. Իսահակյանի անվան կենտրոնական գրադարանի դահլիճում «Գրքամոլ Ակումբ»-ի շրջանակներում տեղի ունեցավ արդեն իսկ երկար սպասված ակումբի անդրանիկ քննարկումը, որին ներկա էին ակումբի բոլոր 21 անդամները: Ինչպես արդեն տեղեկացվել էր՝ քննարկվելիք գիրքն էր անգլուհի նշանավոր գրող Ջեյն Օսթինի «Հպարտություն և նախապաշարմունք» գիրքը, որտեղ պատմվում է, թե ինչպես անգլիացի հարուստ հողատեր Դարսին հմայվում է մանր ազնվականի դուստր էլիզաբեթի աշխույժ մտքով և արժանավայել պահվածքով: Ակումբում քննարկումն անցավ բավական թեժ և ջերմ գրական մթնոլորտում: Ինչպես նշում էին ակումբի ընթերցասերները, Օսթինի այս ստեղծագործությունն իրենց հնարավորություն տվեց ավելի մոտիկից ծանոթանալու 18-րդ դարի անգլիական կենցաղին, Բենեթների՝ այն ժամանակվա տիպիկ անգլիական ընտանիքի առօրյային, ինչպես նաև բազմաթիվ իրարամերժ և համանման կարծիքներով ակումբի անդամները քննարկեցին, թե ինչպես կարող էր սերը միաժամանակ հաղթել հարուստ երիտասարդի հասարակական դիրքից ու ազգակցական կապերից բխող նրա հպարտությունը և դրա մասին տեղի հասարակության բացասական կարծիքից առաջացած՝ աղջկա նախապաշարմունքը և վեհ գտնվեր ամեն ինչից: Բավական աշխույժ մթնոլորտում կարծիքներով փոխանակվելուց հետո Ակումբի անդամները բաժանվեցին թիմերի, որտեղ քննարկվեցին վեպի բոլոր հերոսները, գրքում առկա Հպարտությունն ու Նախապաշարմունքը և անհատական խմբերով դրանք ներկայացրին բոլորին: Ակումբի հաջորդ հանդիպումը նախատեսված է սեպտեմբերի 22-ին, որտեղ քննարկվելու է հայ գրող Ալեքսանդր Շիրվանզադեի «Ալինա» ստեղծագործությունը: Հ.Գ. Այսպիսով մեկնարկային սկիզբ դրվեց մի ակումբի, որտեղ գրադարանի հյուրընկալ պատերի ներքո մեկ վայրում հավավքում են խելացի և երիտասարդ ընթերցողներ, ովքեր սիրում են կարդալ ու քննարկել իրենց կարդացած գրքերը և դրանով իսկ «վարակում» են իրենց շրջապատին: «Գրքամոլ Նախաձեռնությունը»-ն հասնում է իր առաքելության կատարմանը՝ այն է, հայ հասարակության մեջ՝ և՛ համացանցի միջոցով, և՛ երիտասարդ ընթերցասերներով բարձրացնել սերը դեպի ընթերցանությունը:               

Դիտեք ավելին Գրքամոլ Ակումբ բաժնում

մեկնաբանություններ