Գրքամփինգ դեպի Արամյանցի դղյակ

2022-08-20 235

Գրքամոլ Ակումբը սկսեց իր ամառային նախագիծը՝ #գրՔամփինգը, որն իրենից ներկայացնում է գրքի քննարկումների շարք բնության գրկում։ Եվ անդրանիկ մեկնարկը տրվեց Լոռվա հրաշագեղ բնության գրկում՝ քննարկելով Ֆրանց Կաֆկայի «Դղյակը» Արամյանցի դղյակի հենց անմիջապես բակում։ Մինչև Արամյանցի դղյակ հասնելը ակումբականները կանգառ կատարեցին Սանահինի կամուրջի մոտ․ կամուրջը նաև օրվա քննարկվող գրքի սիմվոլիկան էր, և այդ կերպ հանդիպումն ավելի խորհրդանշական էր դարձել, քանի որ օրը ողոված էր դեպի գյուղ «կաֆկայական ընթացքով»։ Այնուհետև ակումբականները եղան Ախթալայի վանքում, որտեղ Տեր Հեթում քահանա Թարվերդյանից մանրամասն ծանոթացան վանքի պատմությանը, հարցուպատասխանի շնորհիվ ակումբականները ստացան իրենց հուզող հարցերի պատասխաններ, ինչպես նաև հետաքրքիր զրույց ունեցան գրականության մասին։ Դե իսկ երեկոյան էլ Արամյանցի դղյակն իր հյուրընկալ դարպասները բացեց Գրքամոլ Ակումբի համար, որի բակում առաջին անգամ տեղի ունեցավ գրքի քննարկում։ Քննարկվեց ոչ միայն բուն «Դղյակը» գործը, այլև Կաֆկան որպես գրող․ ինչպես գրքամփինգի նախագծում էր ներառված՝ մասնակիցներից մեկից ներկայացվեց «Ֆրանց Կաֆկայի աստվածաբանական հայացքները Դատավարությունում և Դղյակում» աշխատության մասին։ Օդը էլեկտրականացվել էր, քանի որ յուրահատուկ մի խորհուրդ էր ստացել այն վայրը, որտեղ անցկացվում էր մեր քննարկումը։ Քննարկումից հետո ակումբականներին ուղեկցեցին կիթառային երգերը և հետաքրքիր զրույցները խարույկի շուրջ, այնուհետև գրքամփինգի մասնակիցները գիշերն անցկացրին վրաններում՝ Արամյանցի դղյակի տարածքում։
Դեպի Երևան ետդարձին ակումբականները կանգառ կատարեցին Ալավերդի քաղաքում, եղան Ալավերդու պատկերասրահում, որտեղ ավելի ծանոթացան քաղաքի մշակութային կյանքին։

Հ.Գ. Հանդիպման բոլոր նկարներն՝ այստեղ:

 

Դիտեք ավելին Գրքամոլ Ակումբ բաժնում

մեկնաբանություններ