Գրքամփինգ դեպի Ստեփան Զորյանի տուն-թանգարան
2023-06-07 845
Հունիսի 24-25-ին Գրքամոլ ակումբը կազմակերպել էր հերթական գրքամփինգը։ Օրը սկսվեց դեպի Ստեփան Զորյանի տուն-թանգարան այցով։ Շատ ջերմ և հյուրընկալ ձևով մեզ դիմավորեց թանգարանի նախկին տնօրեն Լենա Անթառանյանը, ում շնորհիվ մասնակիցները ծանոթացան այն տանը, որտեղ գրողն անցկացրել էր իր ստեղծագործական կյանքի մեծ մասը, նրանից լսեցին հետաքրքիր պատմություններ Ստեփան Զորյանի անձնական կյանքից։ Տուն-թանգարանի բակում կազմակերպվեց շրջանաձև ընթերցանություն, որի ժամանակ ընթերցվեց և քննարկվեց «Ղաչաղան» պատմվածքը։ Զորյանի տան տաքուկ բակում համեղ հյուրասիրությունից հետո գրքամփինգի մասնակիցներն ուղևորվեցին դեպի Օձունի Սուրբ Աստվածածին եկեղեցի, որտեղ Տեր Արարատի ուղեկցությամբ ծանոթացան տաճարի պատմությանը։ Այնուհետև մասնակիցներն ուղևորվեցին դեպի Արևածագի ձոր, որտեղ տեղադրեցին իրենց վրանները։ Մեքենայի ճանապարհը բարդ էր և արկածային, ինչն էլ ավելի խորհրդավոր էր դարձնում ուղևորության ընթացքը։ Հենց Արևածագի ձորում, խարույկի շուրջ տեղավորվելուց հետո գրքամփինգցիները քննարկեցին «Ցանկապատ» պատմվածքը։
Վրաններում գիշերելուց հետո, առավոտյան նախաճաշելով Արևածագի ձորի հրաշք բնության գրկում, բառի ուղիղ իմաստով, Լոռվա սարերի արահետային ճանապարհներով մեքենայով ուղևորվեցինք դեպի Լոռվա բերդ։ Աննկարագրելի գեղեցիկ տեսապատկերներով ուղեկցվող ճանապարհը հիասքանչ էր, տեղ-տեղ՝ բարդ, սակայն բարեհաջող հասանք մինչև նշված վայրը, և ծանոթանալով բերդի պատմությանը, վայելելով մաքուր օդն ու զով եղանակը, վերադարձանք Երևան։
Մասնակիցները Լոռիից իրենց հետ տարան Զորյանի պատմությունների խորությունը, տխրությունն ու հուզականությունը, տիկին Լենայի հետաքրքիր պատմություններն ու ասմունքը, Արևածագի ձորի չքնաղ պատկերն ու անուշահամ լանչերը, որոնք միշտ արվում էին բնության գրկում։
Հ.Գ. Հանդիպման բոլոր նկարներն՝ այստեղ:
Դիտեք ավելին Գրքամոլ Ակումբ բաժնում
մեկնաբանություններ